ກະຊວງຍຸຕິທຳ ເຜີຍແຜ່ເຊື່ອມຊຶມເອກະສານສຳຄັນຂອງພັກ

ໃນວັນທີ 24 ກໍລະກົດ 2020 ກະຊວງຍຸຕິທຳ ຈັດພິທີເຜີຍແຜ່ເຊື່ອມຊຶມເອກະສານສຳຄັນຂອງພັກ ພາຍໃຕ້ການເປັນປະທານຂອງ ສະຫາຍ ໄຊສີ ສັນຕິວົງ ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງຍຸຕິທຳ; ມີບັນດາຄະນະບໍລິຫານງານພັກກະຊວງ, ຄະນະໜ່ວຍພັກບັນດາກົມ, ສະມາຊິກພັກສົມບູນ ແລະ ສຳຮອງຂອງກະຊວງຍຸຕິທຳເຂົ້າຮ່ວມ ຈຳນວນ 218 ສະຫາຍ, ຍິງ 75 ສະຫາຍ.

ເອກກະສານທີ່ນຳມາເຜີຍແຜ່ເຊື່ອມຊຶມຄັ້ງນີ້ ປະກອບມີ ມະຕິກອງປະຊຸມຄົບຄະນະ ຄັ້ງທີ 10 ຂອງຄະນະບໍລິຫານງານສູນກາງພັກ ສະໄໝທີ X ໂດຍແມ່ນ ສະຫາຍ ໄຊສີ ສັນຕິວົງ ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງຍຸຕິທຳ ເປັນຜູ້ເຜີຍແຜ່; ມະຕິຂອງກົມການເມືອງສູນກາງພັກ ສະບັບເລກທີ 107/ກມສພ, ລົງວັນທີ 30 ເມສາ 2020 ວ່າດ້ວຍ ການພັດທະນານະຄອນຫຼວງວຽງຈັນ ໃນໄລຍະໃໝ່ ເຜີຍແຜ່ໂດຍ ສະຫາຍ ປ.ອ ເສີມສຸກ ສິມພະວົງ ຮອງເລຂາຄະນະບໍລິຫານງານພັກກະຊວງ, ຮອງລັດຖະມົນຕີກະຊວງຍຸຕິທຳ ແລະ ມະຕິຂອງກົມການເມືອງສູນກາງພັກ ສະບັບເລກທີ 112/ກມສພ, ລົງວັນທີ 2 ມິຖຸນາ 2020 ວ່າດ້ວຍ ການຍົກສູງຄຸນນະພາບການດຳເນີນຄະດີຕາມຂະບວນຍຸຕິທຳ ເຜີຍແຜ່ໂດຍ ສະຫາຍ ໄພວີ ສີບົວລິພາ ກຳມະການຄະນະບໍລິຫານງານພັກກະຊວງ, ຮອງລັດຖະມົນຕີກະຊວງຍຸຕິທຳ. ຈຸດປະສົງ ເພື່ອໃຫ້ສະມາຊິກພັກກະຊວງຍຸຕິທຳ ກຳແໜ້ນບັນດາເນື້ອໃນຂອງກອງປະຊຸມຄົບຄະນະ ຄັ້ງທີ 10 ຂອງຄະນະບໍລິຫານງານສູນກາງພັກ ສະໄໝທີ X, ຊຶ່ງໄດ້ສະຫຼຸບຕີລາຄາຜົນສຳເລັດໃນການຈັດຕັ້ງຜັນຂະຫຍາຍມະຕິກອງປະຊຸມຄົບຄະນະ ຄັ້ງທີ 7, 8 ແລະ 9 ສະໄໝທີ່ X ຕິດພັນກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນເງິນຕາ 6 ເດືອນຕົ້ນປີ ແລະ ທິດທາງແຜນການໃນຕໍ່ໜ້າ; ແລະຮັບຮູ້ເນື້ອໃນມະຕິກົມການເມືອງສູນກາງພັກ ວ່າດ້ວຍການພັດທະນານະຄອນຫຼວງວຽງຈັນ ໃນໄລຍະໃໝ່ ແລະ ມະຕິວ່າດ້ວຍການຍົກສູງຄຸນນະພາບຂອງການດຳເນີນຄະດີຕາມຂະບວນຍຸຕິທຳ. ພ້ອມນັ້ນ. ສະຫາຍເລຂາຄະນະບໍລິຫານງານພັກກະຊວງ ຍັງໄດ້ເນັ້ນໃຫ້ເພີ່ມຄວາມຮັບຜິດຊອບຂອງຄະນະໜ່ວຍພັກ, ສະມາຊິກພັກແຕ່ລະສະຫາຍ ຊ່ວຍຄະນະບໍລິຫານງານກະຊວງ ໃນການຄົ້ນຄວ້າ, ຜັນຂະຫຍາຍມະຕິຕ່າງໆ ເປັນແຜນງານ, ໂຄງການລະອຽດ ພ້ອມທັງເສີມຂະຫຍາຍບົດບາດນຳພາ-ຊີ້ນຳ, ຕິດຕາມ, ກວດກາ ແລະ ຊຸກຍູ້ ການຈັດຕັ້ງປະຕິບັດຕົວຈິງ ຕາມຂອບເຂດຄວາມຮັບຜິດຊອບຂອງຕົນ ໃຫ້ມີປະສິດທິພາບ ແລະ ປະສິດທິຜົນສູງ.

ພາຍຫຼັງເຜີຍແຜ່ເຊື່ອມຊຶມເອກະສານສຳຄັນຕ່າງໆຂອງພັກແລ້ວ ໃນພິທີຍັງໄດ້ມອບໃບຢັ້ງຢືນ ໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ມອບໃບຍ້ອງຍໍຜົນງານປະຈຳປີ 2019 ໃຫ້ບັນດາໜ່ວຍພັກ ແລະ ສະມາຊິກພັກ, ພະນັກງານ-ລັດຖະກອນ ຂອງກະຊວງຍຸຕິທຳ.

ຂຽນຂ່າວ-ຖ່າຍພາບ: ຊາຍພິມພອນ ສີຣິວົງໄຊ