ທະນາຄານຮ່ວມທຸລະກິດລາວ-ຫວຽດ ມອບເຄື່ອງໃຫ້ ກະຊວງຍຸຕິທໍາ

Primary tabs

          ໃນຕອນເຊົ້າຂອງວັນທີ 30 ສິງຫາ 2021 ຢູ່ທີ່ຫ້ອງຮັບແຂກ ຂອງກະຊວງຍຸຕິທໍາ ໄດ້ຈັດພິທີມອບ-ຮັບເຄື່ອງຊ່ວຍໃນການປ້ອງກັນການແຜ່ລະບາດພະຍາດໂຄວິດ 19 ຕາງໜ້າທະນາຄານຮ່ວມທຸລະກິດລາວ-ຫວຽດ ກ່າວມອບໂດຍ ທ່ານ ພິມພອນ ສຸດທິວົງ ຫົວໜ້າພະແນກແກ້ໄຂ ໜີ້ ແລະ ຄຸ້ມຄອງຫຼັກຊັບ ແລະ ກ່າວຮັບໂດຍ ທ່ານ ຄໍາພອນ ສີປະເສີດ ຫົວໜ້າຫ້ອງການ ກະຊວງຍຸຕິທຳ ໂດຍມີພະນັກງານທັງສອງຝ່າຍຕາງໜ້າເຂົ້າຮ່ວມເປັນສັກຂີພະຍານ.
          ຈຸດປະສົງກໍເພື່ອເປັນການປະກອບສ່ວນປະຕິບັດມາດຕະການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ 19 ບໍ່ໃຫ້ແຜ່ລາມ. ເຄື່ອງທີ່ນຳມາມອບໃນຄັ້ງນີ້ ຊຶ່ງປະກອບມີ: ໜ້າກາກອະນາໄມ ຈໍານວນ 6 ແກັດ, ເຄື່ອງວັດແທກອຸນນະພູມ ຈໍານວນ 3 ເຄື່ອງ, ເຈວລ້າງມື ຈໍານວນ 50 ກ່ອງ ລວມມູນຄ່າທັງໝົດ 7,250,000 ກີບ (ເຈັດລ້ານສອງແສນຫ້າສິບພັນກີບ). ສໍາລັບເຄື່ອງຈຳນວນດັ່ງກ່າວ ແມ່ນຈະໄດ້ນຳໄປແຈກຢາຍໃຫ້ບັນດາ ພະນັກງານ-ລັດຖະກອນ ຂອງກະຊວງຍຸຕິທຳ ເພື່ອນຳໃຊ້ເຂົ້າໃນການຕ້ານ ແລະ ສະກັດກັ້ນ ການແຜ່ລະບາດຂອງພະຍາດ ໂຄວິດ19 ໃນປັດຈຸບັນ.
ຂ່າວ-ພາບ: ໄຊຍະສິດ