ທ່ານລັດຖະມົນຕີກະຊວງຍຸຕິທຳ ລົງຕິດຕາມຊຸກຍູ້ວຽກງານຍຸຕິທຳຢູ່ສອງແຂວງພາກເໜືອ.

          ໃນລະຫວ່າງວັນທີ 8-12 ກຸມພາ 2021 ທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທຳ ພ້ອມດ້ວຍຄະນະໄດ້ລົງເຄື່ອນໄຫວວຽກງານ ຢູ່ ແຂວງ ຫົວພັນ ແລະ ແຂວງ ຊຽງຂວາງ ຈຸດປະສົງ ແມ່ນເພື່ອຕິດຕາມກວດກາ ແລະ ຊຸກຍູ້ວຽກງານຍຸຕິທຳຮາກຖານ. ໃນວັນທີ 8 ກຸມພາ 2021 ທ່ານ ລັດຖະມົນຕີ ກໍໄດ້ເຂົ້າພົບ ທ່ານ ວັນໄຊ ແພງຊຸມມາ ເຈົ້າແຂວງ ຫົວພັນ ເພື່ອລາຍງານຈຸດປະສົງໃນການມາເຮັດວຽກໃນຄັ້ງນີ້ ພ້ອມນັ້ນ ເຈົ້າແຂວງກໍໄດ້ສະແດງຄວາມຍ້ອງຍໍຊົມເຊີຍ ຕໍ່ ທ່ານລັດຖະມົນຕີພ້ອມຄະນະທີ່ໄດ້ລົງມາເຮັດວຽກ ແລະ ອວຍພອນໃຫ້ລັດຖະມົນຕີມີຜົນສຳເລັດໃນການລົງຕິດຕາມຊຸກຍູ້ວຽກງານ.
          ຈາກນັ້ນ, ທ່ານລັດຖະມົນຕີກໍໄດ້ເຂົ້າຮ່ວມເຮັດວຽກນຳພະແນກຍຸຕິທຳແຂວງ ຫົວພັນ ແລະ ບັນດາຫ້ອງການຍຸຕິທຳເມືອງຂອງແຂວງ ເພື່ອຮັບຟັງການລາຍງານສະພາບການຈັດຕັ້ງ ແລະ ການເຄື່ອນໄຫວປະຕິບັດໜ້າທີ່ວຽກງານຂອງພະແນກຍຸຕິທຳ ໃນໄລຍະຜ່ານມາ ໂດຍສະເພາະດ້ານດີ, ດ້ານອ່ອນ ແລະ ຂໍ້ຄົງຄ້າງທີ່ຈະຕ້ອງສືບຕໍ່ປັບປຸງແກ້ໄຂໃນຕໍ່ໜ້າ. ຈາກນັ້ນ, ທ່ານລັດຖະມົນຕີກໍໄດ້ມີຄຳເຫັນໂອ້ລົມຕໍ່ພະນັກງານໃນຂະແໜງຍຸຕິທຳ ໂດຍໄດ້ເນັ້ນໜັກໃຫ້ພະນັກງານຍຸຕິທຳຕ້ອງມີຄຸນທາດການເມືອງທີ່ໜັກແໜ້ນ, ມີຈັນຍາບັນ, ຈັນຍາທຳ ພ້ອມກັນເອົາໃຈໃສ່ປະຕິບັດວຽກງານ ວິຊາສະເພາະດ້ວຍຄວາມຮັບຜິດຊອບສູງ ພ້ອມດຽວກັນນັ້ນ ທ່ານລັດຖະມົນຕີກໍໄດ້ມອບເງິນຈໍານວນໜຶ່ງ ເພື່ອຊຸກຍູ້ວຽກງານຍຸຕິທຳຮາກຖານໃຫ້ແກ່ພະແນກຍຸຕິທຳ ແລະ ບັນດາຫ້ອງການຍຸຕິທຳເມືອງ ຂອງແຂວງ ຫົວພັນ ພາກສ່ວນລະ 10,000,000 ກີບ. ລວມທັງໝົດ 110,000,000 ກີບ (ໜຶ່ງຮ້ອຍສິບລ້ານກີບ) ແລະ ໃນວັນທີ 11 ກຸມພາ 2021 ທ່ານລັດຖະມົນຕີກະຊວງຍຸຕິທຳ ພ້ອມດ້ວຍຄະນະ ກໍໄດ້ເຂົ້າພົບ ທ່ານ ບຸນຈັນ ສີວົງພັນ ເຈົ້າແຂວງ ຊຽງຂວາງ ໃນການເຂົ້າພົບໃນເທື່ອນີ້ກໍເພື່ອລາຍງານເຖິງຈຸດປະສົງໃນການລົງມາເຮັດວຽກໃນຄັ້ງນີ້ ຊຶ່ງ ທ່ານເຈົ້າແຂວງກໍໄດ້ສະແດງຄວາມຂອບໃຈຍ້ອງຍໍຊົມເຊີຍ ແລະ ອວຍພອນໃຫ້ທ່ານລັດຖະມົນຕີ ພ້ອມຄະນະປະສົບຜົນສຳເລັດໃນການເຄື່ອນໄຫວວຽກງານ. ຈາກນັ້ນ, ທ່ານລັດຖະມົນຕີພ້ອມຄະນະກໍໄດ້ລົງເຮັດວຽກນຳພະແນກຍຸຕິທຳແຂວງ ແລະ ບັນດາຫ້ອງການຍຸຕິທຳເມືອງ ແຂວງ ຊຽງຂວາງ ແລະ ໄດ້ຮັບຟັງການລາຍງານສະພາບການປະຕິບັດໜ້າທີ່ວຽກງານ ໃນໄລຍະຜ່ານມາຂອງພະແນກຍຸຕິທຳ ແລະ ບັນດາຫ້ອງການຍຸຕິທຳເມືອງ ຊຶ່ງເຫັນໄດ້ດ້ານດີ, ດ້ານອ່ອນ ແລະ ຂໍ້ຄົງຄ້າງ ທີ່ຈະຕ້ອງໄດ້ແກ້ໄຂໃນຕໍ່ໜ້າ.
          ຈາກນັ້ນ, ທ່ານລັດຖະມົນຕີ ກໍໄດ້ມີຄຳເຫັນຄຳໂອ້ລົມ ໂດຍທ່ານໄດ້ເນັ້ນໜັກໃຫ້ພະນັກງານທຸກຄົນ ຂອງຂະແໜງການຍຸຕິທຳຕ້ອງໄດ້ຍົກສູງບົດບາດຄວາມຮັບຜິດຊອບໃນການປະຕິບັດໜ້າທີ່ວຽກງານໃຫ້ໄດ້ຮັບຜົນສຳເລັດຕາມຄາດໝາຍທີ່ວາງໄວ້ ພ້ອມນັ້ນ, ທ່ານລັດຖະມົນຕີກໍໄດ້ມອບເງິນຈຳນວນ 80,000,000 ກີບ ໃຫ້ພະແນກຍຸຕິທຳ ແລະ ຫ້ອງການຍຸຕິທຳເມືອງ 7 ເມືອງຂອງແຂວງຊຽງຂວາງ ເພື່ອນຳເຂົ້າໃຊ້ເຂົ້າໃນວຽກງານຍຸຕິທຳຮາກຖານ.
ຂ່າວ: ພະແນກວາລະສານ ແລະ ໜັງສືພິມ
ຖ່າຍພາບ: ໄຊຍາສິດ