ທ່ານຮອງລັດຖະມົນຕີກະຊວງ ຍຸຕິທຳ ລົງຊຸກຍູ້ວຽກງານຍຸຕິທຳ ຢູ່ແຂວງ ຊຽງຂວາງ

Primary tabs

          ໃນວັນທີ 29 ເມສາ 2022 ທ່ານ ບຸນທາ ຊົງເຢີທ່າວ, ຮອງເລຂາຄະນະບໍລິຫານງານພັກ, ຮອງລັດຖະມົນຕີກະຊວງຍຸຕິທໍາ ພ້ອມດ້ວຍຄະນະ ໄດ້ລົງເຄື່ອນໄຫວຊຸກຍູ້ວຽກງານຢູ່ ແຂວງ ຊຽງຂວາງ ໃນໂອກາດທີ່ລົງເຄື່ອນໄຫວວຽກງານຄັ້ງນີ້ ທ່ານ ຮອງລັດຖະມົນຕີ ກະຊວງ ຍຸຕິທໍາ ພ້ອມດ້ວຍຄະນະໄດ້ເຂົ້າພົບ ທ່ານ ສີວິໄລ ແສງຈະເລີນ, ຮອງເຈົ້າແຂວງ ຊຽງຂວາງ ເພື່ອແຈ້ງຈຸດປະສົງໃນການລົງເຄື່ອນໄຫວວຽກງານຄັ້ງນີ້ ໃຫ້ ທ່ານ ຮອງເຈົ້າແຂວງໄດ້ຮັບຊາບໂດຍສະເພາະແມ່ນການຊຸກຍູ້ການຈັດຕັ້ງປະຕິບັດ 2 ວາລະແຫ່ງຊາດ ຂອງພະແນກຍຸຕິທຳແຂວງ ແລະ ຫ້ອງການຍຸຕິທຳເມືອງ ໄລຍະແຕ່ປີ 2022 ຫາ 2023.
          ຫຼັງຈາກນັ້ນ ທ່ານ ຮອງລັດຖະມົນຕີ ພ້ອມດ້ວຍຄະນະກໍໄດ້ເຂົ້າພົບປະ ແລະ ເຮັດວຽກນຳຄະນະນໍຳພະແນກຍຸຕິທຳແຂວງ, ຫ້ອງການຍຸຕິທໍາເມືອງ 7 ເມືອງ ແລະ ພະນັກງານວິຊາການ. ໂດຍໄດ້ຮັບຟັງການລາຍງານສະພາບການເຄື່ອນໄຫວວຽກງານໃນໄລຍະ1ປີຜ່ານມາ ແລະ ທິດທາງແຜນການປະຈຳປີ 2022 ຈາກ ທ່ານ ມົນຕີ ອຸດົມ, ຫົວໜ້າພະແນກຍຸຕິທໍາແຂວງ ເປັນຕົ້ນ ວຽກງານການເມືອງ-ແນວຄິດ, ວຽກງານຈັດຕັ້ງ ແລະ ພະນັກງານ, ວຽກງານການສ້າງນິຕິກຳໃຕ້ກົດໝາຍ, ວຽກງານໂຄສະນາເຜີຍແຜ່ກົດໝາຍ, ວຽກງານປະຕິບັດຄຳຕັດສີນຂອງສານ, ວຽກງານທະບຽນສານ, ວຽກງານຍຸຕິທຳຮາກຖານຕິດພັນກັບວຽກງານ 3 ສ້າງ, ວຽກງານການສ້າງບ້ານ ແລະ ຄອບຄົວແບບຢ່າງປະຕິບັດກົດໝາຍ ແລະ ວຽກງານອຶ່ນໆ ໂດຍໄດ້ຍົກໃຫ້ເຫັນຜົນງານດ້ານດີທີ່ຕ້ອງໄດ້ເສີມຂະຫຍາຍ, ດ້ານອ່ອນ, ຂໍ້ຄົງຄ້າງທີ່ຈະຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ. ນອກຈາກນັ້ນ ບັນດາກົມ ກໍໄດ້ພັດປ່ຽນກັນຂື້ນ ແນະນຳບາງວຽກງານ ທີ່ກ່ຽວຂ້ອງ ກັບໜ້າວຽກຂອງຕົນ ຕໍ່ກັບ ພະນັກງານ ຂອງພະແນກ ຍຸຕິທຳແຂວງ ຊຽງຂວາງ.
          ໃນຕອນທ້າຍຂອງກອງປະຊຸມ ທ່ານ ບຸນທາ ຊົງເຢີທ່າວ, ຮອງລັດຖະມົນຕີກະຊວງຍຸຕິທຳ ກໍໄດ້ມີຄຳເຫັນໂອ້ລົມ ກ່ອນອື່ນ ທ່ານ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ພະແນກຍຸຕິທໍາ ຍາດມາໄດ້ໃນໄລຍະຜ່ານມາ ພ້ອມນັ້ນທ່ານກໍໄດ້ເນັ້ນໜັກໃຫ້ຄະນະພັກ-ຄະນະນຳຂອງພະແນກຍຸຕິທຳ ເອົາໃຈໃສ່ເພີ່ມທະວີສຶກສາອົບຮົມການເມືອງ-ນໍາພາແນວຄິດໃຫ້ກວ້າງຂວາງ, ເລີກເຊິ່ງ, ຄົ້ນຄວ້າ, ເຊື່ອມຊຶມ, ກໍາແໜ້ນແນວທາງນະໂຍບາຍຂອງພັກ, ກົດໝາຍ ແລະ ລະບຽບການຂອງລັດ, ເອົາໃຈໃສ່ເຄື່ອນໄຫວຈັດຕັ້ງປະຕິບັດວຽກງານຂອງຕົນໂດຍຕິດພັນກັບການຈັດຕັ້ງຜັນຂະຫຍາຍ 2 ວາລະແຫ່ງຊາດຢ່າງແຂງແຮງ ແລະ ເປັນຂະບວນການ ເປັນຕົ້ນ ວຽກງານກວດກາ, ວຽກງານສ້າງ ແລະ ປັບປຸງນິຕິກຳຂັ້ນແຂວງ, ວຽກງານໂຄສະນາເຜີຍແຜ່ກົດໝາຍ, ວຽກງານສ້າງບຸກຄະລາກອນທາງດ້ານກົດໝາຍ, ວຽກງານບໍລິການທາງດ້ານກົດໝາຍ, ເພີ່ມທະວີຄວາມສາມັກຄີ ແລະ ເປັນເອກະພາບພາຍໃນ, ຍົກສູງສະຕິຕໍ່ການຈັດຕັ້ງ, ຄວາມເປັນເຈົ້າການ, ຄວາມເປັນແບບຢ່າງ ແລະ ຍົກສູງຄວາມຮັບຜິດຊອບຕໍ່ໜ້າທີ່ການເມືອງ ຂອງຕົນໃຫ້ສຳເລັດຕາມຄາດໝາຍ ແລະ ທິດທາງແຜນການທີ່ໄດ້ກຳນົດໄວ້ໃຫ້ມີປະສິດທິຜົນ.
          ໃນໂອກາດລົງເຄື່ອນໄຫວຊຸກຍູ້ວຽກງານຢູ່ ແຂວງ ຊຽງຂວາງ ໃນຄັ້ງນີ້ ທ່ານ ຮອງລັດຖະມົນຕີ ກະຊວງຍຸຕິທຳ ກໍໄດ້ມອບຄອມພີວເຕີ, ເຄື່ອງປີນເອກສານ,ໂປເຈັກເຕີ້, ງົບປະມານ, ປຶ້ມປະມວນກົດໝາຍອາຍາ ແລະ ປຶ້ມປະມວນກົດໝາຍແພ່ງ ຈຳນວນໜຶ່ງ ໃຫ້ແກ່ ພະແນກຍຸຕິທຳແຂວງ ແລະ ບັນດາຫ້ອງການຍຸຕິທຳເມືອງ ຂອງ ແຂວງ ຊຽງຂວາງ ເພື່ອນຳໃຊ້ເຂົ້າໃນການ ເຄື່ອນໄຫວວຽກງານຍຸຕິທຳ ປະຈຳປີ 2022. ກ່າວຮັບໂດຍທ່ານ ຫົວໜ້າພະແນກ ແລະ ຜູ້ຕາງໜ້າ ຫ້ອງການ ຍຸຕິທຳເມືອງ.
ຂຽນຂ່າວ, ຖ່າຍພາບ: ສົມຫວັງ ບົວລະພັນ