ພິທີເຊັນເອກະສານມອບ-ຮັບ ທຶນ ລະຫວ່າງ ກະຊວງຍຸຕິທຳ ກັບ ມູນນິທິເອເຊຍ ທີ່ ກະຊວງຍຸຕິທຳ

Primary tabs

          ພິທີເຊັນເອກະສານມອບ-ຮັບ ທຶນ ລະຫວ່າງ ກະຊວງຍຸຕິທຳ ກັບ ມູນນິທິເອເຊຍ ໄດ້ຈັດຂຶ້ນໃນວັນທີ 14 ກັນຍາ 2021 ຜ່ານມາ ຢູ່ທີ່ກະຊວງຍຸຕິທຳ ຕາງໜ້າກະຊວງຍຸຕິທຳ (ຜູ້ປະຕິບັດໂຄງການ) ໂດຍ ທ່ານ ຄຳພອນ ສີປະເສີດ ຫົວໜ້າຫ້ອງການ, ກະຊວງຍຸຕິທຳ; ຕາງໜ້າມູນນິທິເອເຊຍ (ຜູ້ໃຫ້ທຶນ) ໂດຍ ທ່ານ ທອດ ວໍເຊວ ຜູ້ຕາງໜ້າມູນນິທິເອເຊຍ ປະຈຳ ສປປ ລາວ. ໂດຍໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ເກດສະໜາ ພົມມະຈັນ ຮອງລັດຖະມົນຕີກະຊວງຍຸຕິທຳ; ບັນດາຄະນະນຳ, ຜູ້ຕາງໜ້າຈາກກົມທີ່ຈັດຕັ້ງປະຕິບັດໂຄງການ ຂອງກະຊວງຍຸຕິທຳ.
          ພິທີເຊັນເອກະສານມອບ-ຮັບທຶນ ຄັ້ງນີ້ ເພື່ອນຳໃຊ້ເຂົ້າໃນການຈັດຕັ້ງປະຕິບັດກິດຈະກຳ ໃນປີທີ ສອງຂອງໂຄງການ ທີ່ເລີ່ມແຕ່ ວັນທີ 1 ສິງຫາ 2021 ເຖິງວັນທີ 31 ກໍລະກົດ 2022. ການມອບ-ຮັບທຶນດັ່ງກ່າວ ແມ່ນນະໂຍບາຍຂອງລັດຖະບານ ສປປ ລາວ ເວົ້າສະເພາະ ແມ່ນກະຊວງຍຸຕິທຳ ຕໍ່ກັບວຽກງານການພົວພັນ ແລະ ຮ່ວມມືສາກົນ ເພື່ອລະດົມທຶນ ແລະ ວິຊາການ ໃນຍຸດທະສາດການສ້າງລັດທີ່ປົກຄອງດ້ວຍກົດໝາຍ ຂອງ ສປປ ລາວ ຊຶ່ງຍາມໃດ ລັດກໍຖືສຳຄັນຕໍ່ກັບວຽກງານດັ່ງກ່າວ.
          ທຶນໃນການມອບ-ຮັບ ຄັ້ງນີ້ ມີຈຳນວນ 1,598,095,000 ກີບ (ໜຶ່ງຕື້ຫ້າຮ້ອຍເກົ້າໝື່ນແປດລ້ານເກົ້າໝື່ນຫ້າພັນກີບ) ຊຶ່ງຈະນຳໃຊ້ເຂົ້າໃນວຽກງານ ການຊ່ວຍເຫຼືອທາງດ້ານກົດໝາຍ; ວຽກງານການໄກ່ເກ່ຍຂໍ້ຂັດແຍ່ງຂັ້ນບ້ານ; ວຽກງານໂຄສະນາເຜີຍແຜ່ກົດໝາຍ ລວມເຖິງການສ້າງບຸກຄະລາກອນກົດໝາຍ ໃຫ້ແກ່ຮາກຖານບ້ານ ແລະ ກຸ່ມບ້ານ ເພື່ອເປັນການສ້າງເງື່ອນໄຂ ແລະ ເອື້ອຍອຳນວຍຄວາມສະດວກໃຫ້ແກ່ປະຊາຊົນບັນດາເຜົ່າ ໄດ້ເຂົ້າເຖິງກົດໝາຍ ໃຫ້ນັບມື້ນັບຫຼາຍຂຶ້ນ.
ຂ່າວ-ພາບ: ຊາຍພິມພອນ