ໃນວັນທີ 30 ມີຖຸນາ 2019 ຜ່ານມານີ້ ກະຊວງໄປສະນີ ໂທລະຄົມມະນາຄົມ ແລະ ການສື່ສານ ໄດ້ຮ່ວມກັບສະມາຄົມໄອຊີທີລາວ ຈັດງານແຂ່ງຂັນ ໄອຊີທີລາວ 2019 ທີ່ໂຮງແຮມ ດອນຈັນພາເລດ, ເປັນກຽດເຂົ້າຮ່ວມໂດຍ ທ່ານ ພູທອງ ສີສະຫວັດ, ຮັກສາຫົວໜ້າກົມເຕັກໂນໂລຊີການສື່ສານຂໍ້ມູນຂ່າວສານ ກະຊວງໄປສະນີ ໂທລະຄົມມະນາຄົມ ແລະ ການສື່ສານ, ມີບັນດາແຂກຖືກເຊີນ ພ້ອມດ້ວຍພາກສ່ວນທີ່ເຂົ້າຮ່ວມໃນການແຂ່ງຂັນເຂົ້າຮ່ວມ.

ຈຸດປະສົງຂອງການແຂ່ງຂັນໃນຄັ້ງນີ້ ແມ່ນເພື່ອສົ່ງເສີມໃຫ້ນັກຮຽນ-ນັກສຶກສາ, ນັກຄົ້ນຄວ້ານັກພັດທະນາຈາກຂະແໜງການພາກລັດ, ພາກເອກະຊົນ ກໍຄືບັນດາບໍລິສັດ ແລະ ທຸກຄົນໃນສັງຄົມລາວໄດ້ມີໂອກາດສະແດງຄວາມສາມາດໃນການພັດທະນາເຕັກໂນໂລຊີດ້ານ ICT ບໍ່ວ່າຈະເປັນຜະລິດຕະພັນ, ການບໍລິການ ແລະ ນະວັດຕະກຳດ້ານ ICT ຂອງຕົນ. ພ້ອມນັ້ນ ກໍເພື່ອເປັນການສົ່ງເສີມ ເພື່ອເປັນການສ້າງຄວາມເຊື່ອຖື ແລະ ເຮັດໃຫ້ຊື່ສຽງຂອງຜະລິດຕະພັນຂອງຄົນລາວສາມາດນຳໃຊ້, ໃຫ້ມີຄຸນນະພາບ ແລະ ໃຫ້ການບໍລິການໄດ້ທັງພາຍໃນ ແລະ ສາກົນ, ໃນການແຂ່ງຂັນແບ່ງອອກເປັນ 2 ໝວດໃຫຍ່ຄື: ໝວດທົ່ວໄປ ແລະ ໝວດນັກສຶກສາ ຜ່ານການຄັດເລືອກຈາກຜະລິດຕະພັນທີ່ສົ່ງເຂົ້າທັງໝົດເກືອບ 25 ຜະລິດຕະພັນ ແລະ ໄດ້ມີຜະລິດຕະພັນທີ່ຜ່ານເຂົ້າຮອບຄັດເລືອກ ແລະ ມີ 15 ຜະລິດຕະພັນ ໃນນີ້ແອັບກົດໝາຍລາວຊຶ່ງເປັນຜະລິດຕະພັນ ຂອງກະຊວງຍຸຕິທໍາ, ກົມໂຄສະນາເຜີຍແຜ່ກົດໝາຍ ກໍໄດ້ນຳເອົາແອັບກົດໝາຍລາວເຂົ້າປະກວດ ໃນງານ lao ICT Award 2019 ແລະ ກໍສາມາດເຂົ້າຊິງໃນຮອບສຸດທ້າຍຂອງການແຂ່ງຂັນ ແລະ ໃນນີ້ແອັບກົດໝາຍລາວ ກໍສາມາດຍາດໄດ້ລາງວັນ ຮອງອັນດັບສາມ ໄດ້ຮັບຂັນໂລລາງວັນ ພ້ອມດ້ວຍເງິນສົດຈຳນວນ 3.000.000 ກີບ (ສາມລ້ານກີບ).

ຂຽນຂ່າວ: ປາວີຄຳ ເພັດທະລາກຸນ; ພາບ: ສຸກສາຄອນ ຈັນທະວຸດ