Submitted by xaiyphimphone on
ໃນລະຫວ່າງວັນທີ 24-26 ເມສາ 2017ທີ່ຜ່ານມາ ກົມໂຄສະນາເຜີຍແຜ່ກົດໝາຍ ກະຊວງຍຸຕິທຳ ຮ່ວມກັບໂຄງການຈັດຕັ້ງປະຕິບັດແຜນແມ່ບົດພັດທະນາລັດທີ່ປົກຄອງດ້ວຍກົດໝາຍ ໄດ້ລົງເຄື່ອນໄຫວໂຄສະນາເຜີຍແຜ່ກົດໝາຍ ຢູ່ 3 ເມືອງຂອງແຂວງຫົວພັນ ຄື: ເມືອງວຽງໄຊ, ເມືອງຊຽງຄໍ້, ເມືອງແອດ ໂດຍການນຳພາຂອງທ່ານ ພູທອນ ແກ້ວດວງມະນີ ຫົວໜ້າກົມໂຄສະນາເຜີຍແຜ່ກົດໝາຍ ເຂົ້າຮ່ວມມີທ່ານ ສົມພອນ ອິນຄະວິໄລ ຫົວ ໜ້າພະແນກຍຸຕິທຳແຂວງຫົວພັນ ຮອງຫົວໜ້າພະແນກ, ພະນັກງານ-ລັດຖະກອນ ຕະຫຼອດຮອດພໍ່ແມ່ປະຊາຊົນພາຍໃນເມືອງຂອງແຂວງຫົວພັນເຂົ້າຮວ່ມຮັບຟັງຢ່າງພ້ອມພຽງ.
ໃນພິທີຜູ້ເຂົ້າຮວ່ມໄດ້ຮັບຊົມການສາຍຮູບເງົາທີ່ມີເນື້ອຫາສ່ອງແສງເຖິງບາງມາດຕາຂອງກົດໝາຍທີ່ຕິດພັນກັບການດຳລົງຊີວິດຂອງປະຊາຊົນ ຫຼັງຈາກນັ້ນໃນພິທີກໍໄດ້ເປີດໂອກາດໃຫ້ພໍ່ແມ່ປະຊາຊົນ ໄດ້ສົນທະນາແບບຖາມ-ຕອບກຽ່ວກັບກົດໝາຍ ແລະ ຂັ້ນຕອນການເຂົ້າເຖິງຂະບວນການຍຸຕິທຳ ແລະ ຂໍ້ມູນຂ່າວສານທາງດ້ານກົດໝາຍ ພ້ອມດຽວກັນນັ້ນ ກໍມີການແຈກປື້ມກົດໝາຍ, ແຜ່ນຊີດີ, ແຜ່ນພັບ ແລະ ເສື້ອທີ່ລະນຶກຈຳນວນໜຶ່ງໃຫ້ ແກ່ພໍ່ແມ່ປະຊາຊົນອີກດ້ວຍ.
ຈຸດປະສົງຂອງການເຜີຍແຜ່ໂຄສະນາກົດໝາຍໃນຄັ້ງນີ້ ກໍເພື່ອເປັນການສ້າງສະຕິເຄົາລົບ ແລະ ປະຕິບັດກົດໝາຍໃຫ້ແກ່ປະຊາຊົນ 3 ເມືອງຂອງແຂວງຫົວພັນ ໃຫ້ມີຄວາມຕື່ນຕົວຫັນເອົາແນວທາງຂອງພັກ, ລັດຖະທຳມະນູນ ແລະ ກົດໝາຍ ເປັນບ່ອນອີງໃນການປະພຶດປະຕິບັດ ເພື່ອເຮັດໃຫ້ການເຄື່ອນໄຫວດຳລົງຊີວິດຂອງປະຊາຊົນບັນດາເຜົ່າ ສອດຄ່ອງຕາມແນວທາງນະໂຍບາຍຂອງພັກ, ກົດໝາຍ ແລະ ລະບຽບການ ເຮັດໃຫ້ສັງຄົມມີຄວາມສະຫງົບ, ສີວິໄລ ແລະ ຍຸຕິທຳ.
ໃນຕອນທ້າຍ ທ່ານ ພູທອນ ແກ້ວດວງມະນີ ຫົວໜ້າກົມໂສະນາເຜີຍແຜ່ກົດໝາຍ ກໍໄດ້ສະແດງຄວາມຂອບໃຈຕໍ່ຄະນະພັກ-ຄະນະນຳ ແລະ ພໍ່ແມ່ປະຊາຊົນ ທີ່ໃຫ້ການຕ້ອນຮັບຢ່າງອົບອຸ່ນ ແລະ ເຂົ້າຮວ່ມຮັບຟັງການເຜີຍແຜ່ກົດໝາຍດ້ວຍຄວາມເອົາໃຈໃສ່. ໃນໂອກາດດຽວກັນ ທ່ານ ສົມພອນ ອິນຄະວິໄລ ຫົວໜ້າພະແນກຍຸຕິທຳແຂວງຫົວພັນ ກໍໄດ້ສະແດງຄວາມຂອບໃຈຕໍ່ຄະນະພັກ-ຄະນະນຳກະຊວງຍຸຕິທຳ ທີ່ໄດ້ລົງມາເຜີຍແຜ່ກົດໝາຍໃຫ້ປະຊາຊົນຢູ່ທີ່ແຂວງຫົວພັນໃນຄັ້ງນີ້.
ຂຽນຂ່າວ: ອ່ອນຄຳ ໄຊຍະວົງ ຖ່າຍພາບ: ວິກກີ້
ນັກຂ່າວກົມໂຄສະນາເຜີຍແຜ່ກົດໝາຍ