ກອງປະຊຸມພິຈາລະນາຮັບຮອງ "ຮ່າງ" ດຳລັດວ່າດ້ວຍຫ້ອງການໄກ່ເກ່ຍຂໍ້ຂັດແຍ່ງທາງດ້ານເສດຖະກິດເອກະຊົນ ແລະ "ຮ່າງ" ດຳລັດວ່າດ້ວຍຄ່າແຮງງານຂອງຜູ້ໄກ່ເກ່ຍ ແລະ ຜູ້ຕັດສີນຂໍ້ຂັດແຍ່ງທາງດ້ານເສດຖະກິດ.

Primary tabs

          ໃນວັນທີ 31 ສິງຫາ 2021 ຢູ່ທີ່ໂຮງແຮມຄຣາວພລາຊາ ສູນແກ້ໄຂຂໍ້ຂັດແຍ່ງທາງດ້ານເສດຖະກິດ, ກະຊວງຍຸຕິທຳ ໄດ້ຈັດກອງປະຊຸມພິຈາລະນາຮັບຮອງ"ຮ່າງ" ດຳລັດວ່າດ້ວຍຫ້ອງການໄກ່ເກ່ຍຂໍ້ຂັດແຍ່ງທາງດ້ານເສດຖະກິດເອກະຊົນ ແລະ "ຮ່າງ" ດຳລັດວ່າດ້ວຍຄ່າແຮງງານຂອງຜູ້ໄກ່ເກ່ຍ ແລະ ຜູ້ຕັດສີນຂໍ້ຂັດແຍ່ງທາງດ້ານເສດຖະກິດ ໂດຍການເປັນປະທານຂອງ ທ່ານ ໄພວີ ສີບົວລິພາ ລັດຖະມົນຕີກະຊວງຍຸຕິທຳ. ມີບັນດາທ່ານຮອງລັດຖະມົນຕີ, ຫົວໜ້າຫ້ອງການ, ຫົວໜ້າກົມ, ຮອງກົມ, ຜູ້ຕາງໜ້າຈາກກະຊວງພາຍໃນ, ກະຊວງການເງິນ, ຫ້ອງວ່າການສຳນັກງານນາຍົກລັດຖະມົນຕີ, ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ ພ້ອມດ້ວຍຄະນະຮັບຜິດຊອບເຂົ້າຮ່ວມ ເພື່ອປະກອບຄຳເຫັນ ແລະ ພິຈາລະນາຮັບຮອງ ເອົາດຳລັດສອງສະບັບດັ່ງກ່າວ.
อาจเป็นรูปภาพของ 1 คน และกำลังยืน
          ໃນກອງປະຊຸມ ທ່ານ ນາງ ດວງມະນີ ລາວມາວ ຫົວໜ້າສູນແກ້ໄຂຂໍ້ຂັດແຍ່ງທາງດ້ານເສດຖະກິດ ໄດ້ລາຍງານສະພາບການສ້າງ ຮ່າງດຳລັດວ່າດ້ວຍຫ້ອງການໄກ່ເກ່ຍຂໍ້ຂັດແຍ່ງທາງດ້ານເສດຖະກິດເອກະຊົນ ແລະ ຮ່າງດຳລັດວ່າດ້ວຍຄ່າແຮງງານຂອງຜູ້ໄກ່ເກ່ຍ ແລະ ຜູ້ຕັດສີນຂໍ້ຂັດແຍ່ງທາງດ້ານເສດຖະກິດ ຊຶ່ງທ່ານໄດ້ຍົກໃຫ້ເຫັນ ສະພາບການປະຕິບັດວຽກງານແກ້ໄຂຂໍ້ຂັດແຍ່ງທາງດ້ານເສດຖະກິດໃນໄລຍະຜ່ານມາ, ເຫດຜົນ ແລະ ຄວາມຈຳເປັນ, ໂຄງປະກອບ ແລະ ຄາດຄະເນຜົນໄດ້ຮັບ ໃນການສ້າງ 2 ຮ່າງດຳລັດດັ່ງກ່າວ; ຈາກນັ້ນ, ຜູ້ເຂົ້າຮ່ວມ ກໍໄດ້ປະກອບຄຳເຫັນຢ່າງກົງໄປກົງມາກ່ຽວກັບບັນດາເນື້ອໃນ ເພື່ອໃຫ້ 2 ຮ່າງດຳລັດດັ່ງກ່າວ ມີເນື້ອໃນຄົບຖວນ, ສົມບູນຍິ່ງຂຶ້ນ ກ່ອນທີ່ຈະນຳສະເໜີຕໍ່ລັດຖະບານໃນຂັ້ນຕໍ່ໄປ.
ກອງປະຊຸມໃນຄັ້ງນີ້ ໄດ້ຮັບການສະໜັບສະໜູນຈາກໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ.
ຂຽນຂ່າວ-ຖ່າຍພາບ: ຊາຍພິມພອນ ສີຣິວົງໄຊ
ປະເພດຂ່າວ: