ພະແນກຍຸຕິທຳແຂວງ ບໍລິຄຳໄຊ ກະກຽມປະເມີນພະນັກງານ - ລັດຖະກອນ ປະຈໍາປີ 2020

ໃນວັນທີ 24 ພະຈິກ 2020 ທີ່ຜ່ານມາ ພະແນກຍຸຕິທຳແຂວງ ບໍລິຄຳໄຊ ໄດ້ຈັດກອງປະຊຸມປະເມີນຜົນການຈັດຕັ້ງປະຕິບັດໜ້າທີ່ວຽກງານຂອງພະນັກງານ-ລັດຖະກອນປະຈໍາປີ 2020 ຂຶ້ນໂດຍການເປັນປະທານຂອງ ທ່ານ ຄຳຜັນ ສິດໄຊຍະສານ ຮອງຫົວໜ້າພະແນກຸຕິທຳແຂວງ ມີຄະນະພະແນກ, ຫົວໜ້າ, ຮອງຫົວໜ້າຂະແໜງ ແລະ ວິຊາການພາຍໃນພະແນກຍຸຕິທຳເຂົ້າຮ່ວມທັງໝົດ 36 ທ່ານ, ຍິງ 12 ທ່ານ.

ທ່ານ ສະພັງທອງ ພົມມະຈັກ ຫົວໜ້າຂະແໜງ ຈັດຕັ້ງ-ພະນັກງານ ແລະ ກວດກາ ໄດ້ເຜີຍແຜ່ເອກະສານດຳລັດ ເລກທີ300/ລບ, ລົງວັນທີ 13 ກັນຍາ 2017 ວ່າດ້ວຍການປະເມີນຜົນວຽກງານການປະຕິບັດວຽກງານຂອງພະນັກງານ-ລັດຖະກອນ ແລະ ຄຳແນະນຳການຈັດຕັ້ງປະຕິບັດດຳລັດ ວ່າດ້ວຍການປະເມີນພະນັກງານລັດຖະກອນ ເລກທີ 06/ພນ, ລົງວັນທີ 2 ພຶດສະພາ 2018 ເພື່ອເຮັດໃຫ້ການປະເມີນພະນັກງານ-ລັດຖະກອນມີຄວາມສຳເລັດ ແລະ ເຂົ້າໃຈຕື່ມ ໃນການປະຕິບັດໜ້າທີ່ວຽກງານໃນຄວາມຮັບຜິດຊອບ, ມີການຕໍານິ, ຕິຊົມ ເພື່ອປັບປຸງດ້ານອ່ອນເຮັດໃຫ້ພະນັກງານ-ລັດຖະກອນ ໄດ້ຮັບການປັບປຸງແກ້ໄຂໃຫ້ດີຂຶ້ນໃນຕໍ່ໜ້າ. ທ່ານ ຄຳຜັນ ສິດໄຊຍະສານ ຮອງຫົວໜ້າພະແນກ ກໍໄດ້ມີຄໍາເຫັນໂອ້ລົມ ຕໍ່ພະນັກງານ-ລັດຖະກອນ ໂດຍທ່ານໄດ້ເນັ້ນໜັກໃຫ້ ພະນັກງານພະແນກຍຸຕິທໍາແຂວງ ຈົ່ງເຊີດຊູຄວາມຮັບຜິດຊອບການເມືອງ ແລະ ເອົາໃຈໃສ່ຕໍ່ການຕີລາຄາໃຫ້ໜູ່ເພື່ອນດ້ວຍຄວາມຈິງໃຈ ແລະ ມີຄວາມຮັບຜິດຊອບສູງໂດຍປະສະຈາກອັກຄະຕິຕໍ່ກັນ ເພື່ອຊຸກຍູ້ກໍ່ສ້າງຊຶ່ງກັນແລະກັນ ໃຫ້ເປັນພະນັກງານທີ່ດີເດັ່ນ ແລະ ກາຍເປັນພະນັກງານສືດທອດໃນຕໍ່ໜ້າ.

ຂ່າວ: ບຸນເລີດ ລັດທະພອນ

ພາບ: ນາງໄພວັນ ພຽນວົງ

ປະເພດຂ່າວ: