ພະແນກຍຸຕິທຳແຂວງ ບໍລິຄຳໄຊ ທາບທາມຮ່າງຂໍ້ຕົກລົງ

ໃນຕອນເຊົ້າວັນທີ 26 ພະຈິກ 2020 ຢູ່ທີ່ຫ້ອງປະຊຸມ ພະແນກຍຸຕິທຳແຂວງ ບໍລິຄຳໄຊ ໄດ້ຜ່ານຮ່າງນິຕິກຳ ກ່ຽວກັບ ຂໍ້ຕົກລົງ ວ່າດ້ວຍ ນະໂຍບາຍ ແລະ ລາຄາຫົວໜ່ວຍທົດແທນ ຕໍ່ຊັບສິນທີ່ໄດ້ຮັບຜົນກະທົບຈາກໂຄງການປັບປຸງ ແລະ ສ້ອມແປງທາງຫຼວງແຫ່ງຊາດ ເລກທີ 13 ໄຕ້ ແຂວງ ບໍລິຄຳໄຊ ໃຫ້ກຽດເປັນປະທານໂດຍ ທ່ານ ຄຳຜັນ ສິດໄຊຍະສານ ຮອງຫົວໜ້າພະແນກຍຸຕິທຳ ຜູ້ຊີ້ນຳວຽກນິຕິກຳ ພະແນກຍຸຕິທຳແຂວງ ມີທ່ານ ທອງດອມ ຈັນທະລາ ຮອງຫົວໜ້າພະແນກ ສະຖາບັນຄົ້ນຄ້ວາໂຍທາທິການ ແລະ ຂົນສົ່ງ ກະຊວງໂຍທາທິການ ແລະ ການຂົນສົ່ງ ພ້ອມດ້ວຍຄະນະຮັບຜິດຊອບຂັ້ນແຂວງ ແລະ ຫົວໜ້າ, ຮອງຫົວໜ້າຂະແໜງພາຍໃນພະແນກຍຸຕິທຳແຂວງ ບໍລິຄຳໄຊເຂົ້າຮ່ວມຈຳນວນ 13 ທ່ານ, ຍິງ 03 ທ່ານ. ທ່ານ ນາງ ພິດສະໄໝ ໂຄດປັນຍາ ຫົວໜ້າຂະແໜງ ກົດໝາຍ ໄດ້ຜ່ານຈຸດປະສົງພ້ອມທັງສະເໜີໃຫ້ຜູ້ເຂົ້າຮ່ວມທຸກຄົນຈົ່ງໄດ້ເອົາໃຈໃສ່ຄົ້ນຄ້ວາ ແລະ ປະກອບຄໍາຄິດເຫັນໃສ່ຮ່າງຂໍ້ຕົກລົງວ່າດ້ວຍນະໂຍບາຍ ແລະ ລາຄາຫົວໜ່ວຍທົດແທນຊັບສິນທີ່ໄດ້ຮັບຜົນກະທົບຈາກໂຄງການປັບປຸງ ແລະ ສ້ອມແປງທາງຫຼວງແຫ່ງຊາດ ເລກທີ 13 ໄຕ້ ແຂວງ ບໍລິຄຳໄຊ. ຊຶ່ງຂໍ້ຕົກລົງດັ່ງກ່າວປະກອບມີ 39 ມາດຕາ ແລະ 10 ໝວດ. ໃນກອງປະຊຸມຜູ້ເຂົ້າຮ່ວມກໍ່ໄດ້ປະກອບຄໍາຄິດຄໍາເຫັນໃສ່ຮ່າງຂໍ້ຕົກລົງ ເພື່ອຊອກຫາຄວາມສອດຄ່ອງໂດຍອີງໃສ່ສະພາບແວດລ້ອມຂອງ 3 ເມືອງ, ພາຍໃນແຂວງ ບໍລິຄຳໄຊ. ໂດຍສະເພາະລາຄາຫົວໜ່ວຍທົດແທນໃຫ້ແກ່ຜູ້ທີ່ໄດ້ຮັບຜົນກະທົບຈາກໂຄງການດັ່ງກ່າວ ເຊິ່ງຜ່ານການຄົ້ນຄ້ວາຮ່າງຂໍ້ຕົກລົງດັ່ງກ່າວຕົກລົງເອກະພາບກັນ ຕັດອອກ 4 ມາດຕາ ແລະ ຕັດອອກ 1 ໜວດ.

ຕອນທ້າຍ ທ່ານ ຄຳຜັນ ສິດໄຊຍະສານ ຮອງຫົວໜ້າພະແນກຍຸຕິທຳ ໄດ້ກ່າວວ່າໂດຍປະຕິບັດຕາມ ສິດ, ໜ້າທີ່, ພາລະບົດບາດ ແລະ ອີງຕາມກົດໝາຍວ່າດ້ວຍການປົກຄອງທ້ອງຖິ່ນສະບັບເລກທີ 68/ສພຊ, ລົງວັນທີ 14 ທັນວາ 2015 ແລະ ກົດໝາຍວ່າດ້ວຍການສ້າງນິຕິກຳ ສະບັບເລກທີ 19/ສພຊ, ລົງວັນທີ 12 ກໍລະກົດ 2012 ເພື່ອເຮັດໃຫ້ຂໍ້ຕົກລົງສະບັບນີ້ມີຜົນສັກສິດ ແລະ ນຳໃຊ້ໄດ້ໃນຕໍ່ໜ້າ ໃຫ້ມີເນື້ອໃນຖືກຕ້ອງ, ຄົບຖ້ວນ ແລະ ບໍ່ຂັດກັບກົດໝາຍ.

ຂ່າວໂດຍ: ບຸນເລີດ ລັດທະພອນ

ຖ່າຍພາບ: ນາງ ໄພວັນ ພຽນວົງ

ປະເພດຂ່າວ: