ພະແນກຍຸຕິທຳແຂວງ ບໍລິຄຳໄຊ ສະຫຼຸບ ແລະ ຖອດຖອນບົດຮຽນການລົງຝຶກງານຂອງນັກສຶກສາ

          ໃນວັນທີ 31 ມີນາ 2021 ຜ່ານມາ ຢູ່ທີ່ຫ້ອງປະຊຸມຂອງພະແນກຍຸຕິທຳແຂວງ ບໍລິຄຳໄຊ ໄດ້ເປີດກອງປະຊຸມສະຫລຸບຕີລາຄາການລົງຝຶກງານຂອງນັກສຶກສາທີ່ມາຈາກສະຖາບັນຍຸຕິທຳແຫ່ງຊາດລະບົບຊັ້ນສູງ 3 ປີ ສົກຮຽນ 2020-2021 ຈຳນວນ 12 ທ່ານ, ຍິງ 5 ທ່ານ. ໂດຍການເປັນປະທານຮ່ວມຂອງ ທ່ານ ບົວພັນ ຈັນທະວິລຸນ ຮອງຫົວໜ້າພະແນກຍຸຕິແຂວງ ບໍລິຄຳໄຊ ແລະ ທ່ານ ບຸນຕາ ສ.ຜາບມີໄຊ ຫົວໜ້າສະຖາບັນຍຸຕິທຳແຫ່ງຊາດ ມີອາຈານ , ພະນັກງານ ແລະ ນັກສຶກສາຝຶກງານເຂົ້າຮ່ວມ.
          ທ່ານ ບົວພັນ ຈັນທະວິລຸນ ຮອງຫົວໜ້າພະແນກຍຸຕິທໍາແຂວງ ກໍໄດ້ລາຍງາຍໂດຍຫຍໍ້ກ່ຽວກັບການລົງຝຶກງານຂອງນັກສຶກສາໃນຄັ້ງນີ້ ຊຶ່ງໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ໂດຍສະເພາະ ແມ່ນຢູ່ພະແນກຍຸຕິທຳແຂວງ. ຈຸດປະສົງຕົ້ນຕໍການຝຶກງານຂອງນັກສຶກສາເພື່ອເປັນການຖອດຖອນບົດຮຽນ, ຊອກຮູ້ປະສົບການ ນຳພະນັກງານ ທຸກພາກສ່ວນໃນການຈັດຕັ້ງປະຕິບັດວິຊາສະເພາະ ເພື່ອນຳໄປປະກອບໃສ່ໃນການຄົ້ນຄວ້າຂຽນບົດໂຄງການຈົບຊັ້ນ ແລະ ອື່ນໆ ການຝຶກງານຂອງນັກສຶກສາໄດ້ແບ່ງໄປຝຶກຕາມສຳນັກງານຫ້ອງການ ທີ່ນັກສຶກສາເລືອກ ຄື: ສະພາປະຊາຊົນແຂວງ, ສານປະຊາຊົນເຂດ 1 ມີ 4 ທ່ານ, ເມືອງ ຄຳເກີດມີ 2 ທ່ານ, ເມືອງ ບໍລິຄັນມີ 1 ທ່ານ ແລະ ພະແນກຍຸຕິທຳແຂວງ ມີ 3 ທ່ານ.
          ຕອນທ້າຍ ທ່ານ ບຸນຕາ ສ.ຜາບມີໄຊ ຫົວໜ້າສະຖາບັນຍຸຕິທຳແຫ່ງຊາດ ກໍໄດ້ໃຫ້ກຽດ ໂອ້ລົມ ຕໍ່ນັກສຶກສາ ກ່ອນອື່ນໝົດທ່ານໄດ້ສະແດງຄວາມຍ້ອງຍໍຊົມເຊີຍຕໍ່ການນຳພະແນກຍຸຕິທຳແຂວງທີ່ໄດ້ເອົາໃຈໃສ່ຊີ້ນຳ-ນຳພາ, ອົບຮົມ ແລະ ຊ່ວຍເຫຼືອນັກສຶກສາຈົນສາມາດສຳເລັດໃນການປະຕິບັດໜ້າທີ່ ພ້ອມນັ້ນ ທ່ານກໍໄດ້ຍົກໃຫ້ເຫັນຈຸດດີ, ຈຸດອ່ອນ ຂອງການລົງຝຶກງານໃນຄັ້ງນີ້ ຊຶ່ງມີຫຼາຍບັນຫາທີ່ຕ້ອງໄດ້ເອົາໃຈໃສ່ ແລະ ແກ້ໄຂໃນຕໍ່ໜ້າ.
ພາບ, ຂ່າວໂດຍ: ນາງ ສຸກສາຄອນ ທະວີສຸກ
ປະເພດຂ່າວ: