ພິທີດັ່ງກ່າວໄດ້ຈັດຂຶ້ນໃນຕອນເຊົ້າຂອງວັນທີ 16 ພະຈິກ 2020 ຢູ່ທີ່ຫ້ອງວ່າການແຂວງ ບໍລິຄຳໄຊ, ໂດຍຊ້ອງໜ້າ ທ່ານ ປອ. ກອງແກ້ວ ໄຊສົງຄາມ ເລຂາພັກແຂວງ ເຈົ້າແຂວງ ບໍລິຄຳໄຊ, ມີຄະນະຫ້ອງວ່າການແຂວງ, ຄະນະພະແນກຍຸຕິທຳແຂວງ, ພ້ອມດ້ວຍພະນັກງານວິຊາການ ເຂົ້າຮ່ວມເປັນສັກຂີພະຍານຢ່າງພ້ອມພຽງ.

ໃນພິທີ ທ່ານ ບຸນສົງ ເພັດຈະເລີນ ຄະນະປະຈຳພັກແຂວງ ຫົວໜ້າຄະນະຈັດຕັ້ງແຂວງ ໄດ້ຜ່ານຂໍ້ຕົກລົງຂອງທ່ານເຈົ້າແຂວງ ບໍລິຄຳໄຊ ສະບັບເລກທີ 675/ຂບຊ, ລົງວັນທີ 11 ພະຈິກ 2020 ວ່າດ້ວຍການແຕ່ງຕັ້ງ ທ່ານ ສົມໃຈ ຄຸນພະໄຊ ກໍາມະການພັກແຂວງ ຫົວໜ້າພະແນກຍຸຕິທໍາແຂວງ ໄປເປັນຮັກສາການຫົວໜ້າຫ້ອງວ່າການແຂວງ ແລະ ຂໍ້ຕົກລົງຂອງທ່ານເຈົ້າແຂວງ ບໍລິຄຳໄຊ ສະບັບເລກທີ 677/ຂບຊ ລົງວັນທີ 11 ພະຈິກ 2020 ວ່າດ້ວຍການຍົກຍ້າຍ ແລະ ແຕ່ງຕັ້ງ ທ່ານ ປອ. ນາງ ວິໄລ ພິລາວົງ ຮອງຫົວໜ້າຫ້ອງວ່າການແຂວງ ໄປເປັນຮັກສາການຫົວໜ້າພະແນກຍຸຕິທຳແຂວງ ແລະ ຂໍ້ຕົກລົງຂອງຄະນະປະຈຳພັກແຂວງ ສະບັບເລກທີ 606/ຄປພ.ຂບຊ ລົງວັນທີ 11 ພະຈິກ 2020 ວ່າດ້ວຍການບົ່ງຕົວແຕ່ງຕັ້ງ ສະຫາຍ ປອ. ນາງ ວິໄລ ພິລາວົງ ເປັນເລຂາໜ່ວຍພັກ ພະແນກຍຸຕິທຳແຂວງ.

ໃນພິທີ ຍັງໄດ້ຮັບຟັງການໂອ້ລົມຂອງທ່ານເຈົ້າແຂວງ ເຊິ່ງທ່ານໄດ້ຍົກໃຫ້ເຫັນວ່າ ການປັບປຸງ, ຍົກຍ້າຍ, ແຕ່ງຕັ້ງໜ້າທີ່ຄວາມຮັບຜິດຊອບຂອງພະນັກງານ-ລັດຖະກອນ ເປັນວຽກປົກກະຕິ ແລະ ເປັນຫຼັກການຂອງພັກ ເພື່ອເຮັດໃຫ້ລະບົບກົງຈັກການຈັດຕັ້ງພັກ-ລັດ ໃນລະບົບການເມືອງໃຫ້ມີຄວາມເຕີບໃຫຍ່ເຂັ້ມແຂງ ແລະ ໜັກແໜ້ນ ພ້ອມນີ້ ທ່ານຍັງໄດ້ເນັ້ນໜັກໃຫ້ຫົວໜ້າພະແນກຍຸຕິທຳ ຜູ້ໃໝ່ຈົ່ງເອົາໃຈໃສ່ຫຼາຍບັນຫາ ເປັນຕົ້ນ ຕ້ອງກຳແໜ້ນສິດ, ໜ້າທີ່ ພາລະບົດບາດຂອງຕົນ ກໍ່ຄືກົມກອງວາງອອກ ຮັບປະກັນການປະຕິບັດລັດຖະທຳມະນູນ ແລະ ລະບຽບຫຼັກການຂອງພັກ-ລັດ, ຮັກສາຄວາມສາມັກຄີເປັນເອກະພາບພາຍໃນພັກ ແລະ ໝູ່ຄະນະ, ມີແບບແຜນເຂັ້ມງວດໃນການເຮັດວຽກ ນຳພາເປັນໝູ່ຄະນະ, ມີການປະສານສົມທົບກັບການນຳພາຂອງພັກ, ມີທັດສະມະຫາຊົນຖືກຕ້ອງ ຮູ້ຮັບຟັງ ແລະ ເລືອກເຟັ້ນຄຳຄິດ-ຄຳເຫັນ, ມີແບບແຜນວິທີນຳພາທີ່ມີວິທະຍາສາດ ແລະ ມີຄວາມໂປ່ງໃສ, ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ແກ່ພະນັກງານ-ລັດຖະກອນ

ພາບ - ຂ່າວໂດຍ : ພະແນກຍຸຕິທຳແຂວງ