ຫ້ອງການຍຸຕິທຳເມືອງ ໄຊຈຳພອນ ດຳເນີນການກວດກາ ແລະ ປະເມີນໜ່ວຍພັກ.

ໃນວັນທີ 17 ພະຈິກ 2020 ຢູ່ຫ້ອງການຍຸຕິທໍາເມືອງ ໄຊຈຳພອນ ແຂວງ ບໍລິຄຳໄຊ ໄດ້ເປີດປະຊຸມປະເມີນ ແລະ ກວດກາໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂຶ້ນໂດຍການເປັນປະທານຂອງ ສະຫາຍ ສອນໄຊ ໄຊຍະທິຈັກ ເລຂາໜ່ວຍພັກ ຫົວໜ້າຫ້ອງການຍຸຕິທໍາເມືອງ ໃຫ້ກຽດເຂົ້າຮ່ວມໂດຍສະຫາຍ ຟິຊິກ ອີນບຸນພອນ, ສະຫາຍ ກອນສີ ຈຸມລີວົງ ຄະນະຮັບຜິດຊອບຂັ້ນເມືອງ, ມີຄະນະໜ່ວຍພັກ ແລະ ສະມາຊິກພັກເຂົ້າຮ່ວມ.

ສະຫາຍ ສອນໄຊ ໄຊຍະທິຈັກ ເລຂາໜ່ວຍພັກ ຂຶ້ນຜ່ານ ຄຳສັ່ງຂອງກົມການເມືອງສູນກາງພັກ ສະບັບເລກທີ 01/ກມສພ, ລົງວັນທີ 03 ມັງກອນ 2078 ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ຄຳແນະນໍາຂອງຄະນະຈັດຕັ້ງສູນກາງພັກ ສະບັບເລກທີ 291/ຄຈສພ, ລົງວັນທີ 26 ເມສາ 2018 ກ່ຽວກັບການຈັດຕັ້ງຄຳສັ່ງຂອງກົມການເມືອງສູນກາງພັກ, ສະຫາຍ ລາຕີ ທິດປະສົງ ຮອງເລຂາ ໜ່ວຍພັກ ຮອງຫົວໜ້າຫ້ອງການຍຸຕິທໍາເມືອງ ໄດ້ຜ່ານຄຳສັ່ງ ຂອງຄະນະປະຈຳພັກແຂວງ ບໍລິຄຳໄຊ ສະບັບເລກທີ 827/ຄປພ ຂບຊ ລົງວັນທີ 23 ກໍລະກົດ 2018 ວ່າດ້ວຍການເພີ່ມທະວີການກໍ່ສ້າງ ແລະ ກວດກາໜ່ວຍພັກປອດໃສ, ເຂັ້ມແຂງ, ໜັກແໜ້ນ. ຫຼັງຈາກນັ້ນ, ສະຫາຍ ສອນໄຊ ໄຊຍະທິຈັກ ກໍໄດ້ຜ່ານບົດສະຫຼູບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳ ປີ 2020 ແລະ ທິດທາງແຜນການ ປີ 2021, ຜ່ານບົດສຳຫຼວດຕົນເອງຂອງສະມາຊິກພັກແຕ່ລະສະຫາຍ ມີການປະກອບຄຳເຫັນຕຳນິສົ່ງຂ່າວຊຶ່ງກັນ ແລະ ກັນ ເພື່ອປັບປຸງ ແລະ ແກ້ໄຂໃນຕໍ່ໜ້າຕາມ 5 ເນື້ອໃນ ຄື: ດ້ານການເມືອງ-ແນວຄິດ, ດ້ານການຈັດຕັ້ງ, ດ້ານແບບແຜນວິທີເຮັດວຽກ ແລະ ດ້ານຄວາມຮັບຜິດຊອບຕໍ່ໜ້າທີ່ການເມືອງ. ຜ່ານການປະເມີນຜົນເຫັນວ່າ ໄດ້ສະມາຊິກພັກແຂງ ຈຳນວນ 6 ສະຫາຍ, ຍິງ 1 ສະຫາຍ ເທົ່າກັບ 90% ແລະ ສະເໜີໜ່ວຍພັກຍຸຕິທຳເມືອງ ໄຊຈຳພອນ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳ ປີ 2020 .

ໃນຕອນທ້າຍສະຫາຍ ສອນໄຊ ໄຊຍະທິຈັກ ເລຂາໜ່ວຍພັກ ກໍໄດ້ມີຄຳເຫັນໂອ້ລົມຕໍ່ກອງປະຊຸມ ໂດຍເນັ້ນໃຫ້ສະມາຊິກພັກແຕ່ລະສະຫາຍເອົາໃຈໃສ່ຮັກສາ ແລະ ຝຶກຝົນຫຼໍ່ຫຼອມຕົນເອງ, ເສີມຂະຫຍາຍດ້ານຕັ້ງໜ້າເພື່ອໃຫ້ລ້ອນໜ້າທີ່ການເມືອງທີ່ພັກ-ລັດ ມອບໝາຍໃຫ້ດ້ວຍຄວາມຮັບຜິດຊອບສູງ ສູ້ຊົນຮັກສາມູນເຊື້ອໃຫ້ ໜ່ວຍພັກຍຸຕິທຳເມືອງ ໄຊຈຳພອນ ສືບຕໍ່ໄດ້ເປັນໜ່ວຍພັກປອດໃສ, ເຂັ້ມແຂງ, ໜັກແໜັນໃນປີຕໍ່ໄປ.

ຂ່າວ ແລະ ພາບ: ສົມໃຈ ຫວ່າງ

ຫ້ອງການຍຸຕິທຳເມືອງ

ປະເພດຂ່າວ: