ເມືອງ ຄຳເກີດ ແຂວງ ບໍລິຄຳໄຊ ປະກາດບ້ານແບບຢ່າງປະຕິບັດກົດໝາຍ

ໃນວັນທີ 19 ພະຈິກ 2020 ທີ່ຜ່ານມາ ຢູ່ຫ້ອງການກຸ່ມພັດທະນາທົ່ງແສນ ເມືອງ ຄຳເກີດ ແຂວງ ບໍລິຄຳໄຊ ໄດ້ຈັດພິທີປະກາດບ້ານແບບຢ່າງປະຕິບັດກົດໝາຍຂື້ນ ໃຫ້ກຽດເປັນປະທານໂດຍ ທ່ານ ວິໄລ ສີສະມຸດ ຮອງເລຂາພັກເມືອງ ຄຳເກີດ ມີຕາງໜ້າຈາກກອງບັນຊາການປກຊ - ປກສ, ຫ້ອງການທີ່ກ່ຽວຂ້ອງ ພ້ອມດ້ວຍອຳນາດການປົກຄອງ ແລະ ພໍ່ແມ່ປະຊາຊົນພາຍໃນ 7 ບ້ານເຂົ້າຮ່ວມ ຢ່າງພ້ອມພຽງ.

ທ່ານ ຫວັງເນັ່ງ ກາງເສົາວາງ ກໍາມະການພັກເມືອງ ຫົວໜ້າກໍ່ສ້າງຮາກຖານປະຈໍາກຸ່ມບ້ານ ທົ່ງແສນ ໄດ້ຂື້ນຜ່ານບົດລາຍງານສະພາບລວມຂອງກຸ່ມບ້ານຊຶ່ງທ່ານໄດ້ກ່າວເຖິງການພັດທະນາຂອງບ້ານໃນອາດີດຈົນຮອດປະຈຸບັນ ແລະ ແຜນການພັດທະນາໃນຕໍ່ໜ້າແກ້ໄຂຊິວິດການເປັນຢູ່ຂອງປະຊາຊົນໃຫ້ດີຂື້ນລວມທັງການເຄື່ອນໄຫວວຽກງານຍຸຕິທໍາຮາກຖານປະຈໍາ ປີ 2020 ຈາກນັ້ນ ທ່ານ ຄໍາໝັ້ນ ໄຊມູນວົງ ຫົວໜ້າຫ້ອງການຍຸຕິທໍາກໍໄດ້ ຜ່ານຂໍ້ຕົກລົງຂອງລັດຖະມົນຕີກະຊວງຍຸຕິທໍາ ສະບັບເລກທີ່ 1399/ກຍ, ລົງວັນທີ 07 ທັນວາ 2017 ວ່າດ້ວຍການສ້າງຄອບຄົວ ແລະ ບ້ານແບບຢ່າງປະຕິບັດກົດໝາຍ ເຊີ່ງມີ 4 ບ້ານຄື: ບ້ານ ໃຫຍ່ທົ່ງແສນ, ບ້ານ ວັງຜາ, ບ້ານ ນໍ້າເດີນ, ບ້ານ ໜອງເມກ ມີຄອບຄົວແບບຢ່າງປະຕິບັດກົດໝາຍທັງໝົດ 1,288 ຄອບຄົວ ພ້ອມທັງມອບໃບຢັ້ງຢືນການເປັນຄອບຄົວ ແລະ ບ້ານແບບຢ່າງປະຕິບັດກົດໝາຍ ໃຫ້ກຽດຂື້ນມອບໃນຄັ້ງນີ້ ໂດຍທ່ານ ວິໄລ ສີສະມຸດ ຮອງເລຂາພັກເມືອງ ຜູ້ຊີ້ນໍາວຽກງານຍຸຕິທໍາ.

ຖ່າຍພາບ ແລະ ຂຽນຂ່າວ : ຫ້ອງການຍຸຕິທຳ ເມືອງ

ປະເພດຂ່າວ: