ກອງປະຊຸມທາບທາມວ່າການຫົວໜ້າພະແນກຍຸຕິທໍາແຂວງ ບໍລິຄຳໄຊ

ໃນວັນທີ 27 ຕຸລາ 2020 ທີ່ຜ່ານມາ ພະແນກຍຸຕິທໍາແຂວງ ບໍລິຄໍາໄຊ ໄດ້ເປີດກອງປະຊຸມທາບທາມ ວ່າການຫົວໜ້າພະແນກຍຸຕິທໍາແຂວງ ຂຶ້ນ ໂດຍການເປັນປະທານຂອງ ທ່ານ ບຸນຄຳ ໄຊເຍຍລໍວື ຄະນະປະຈໍາພັກແຂວງ ປະທານກວດກາພັກ-ລັດແຂວງ ບໍລິຄໍາໄຊ, ມີຄະນະຮັບຜິດຊອບຂັ້ນແຂວງ, ຄະນະພະແນກຍຸຕິທໍາແຂວງ ພ້ອມດ້ວຍພະນັກງານ-ລັດຖະກອນເຂົ້າຮ່ວມທັງໜົດ 39 ທ່ານ, ຍິງ 14ທ່ານ.

ໃນກອງປະຊຸມ ທ່ານ ວັນໄຊ ເຮຍຈັນທະສອນ ຮອງຄະນະຈັດຕັ້ງແຂວງ ບໍລິຄໍາໄຊ ໄດ້ຜ່ານມະຕິ ສະບັບເລກທີ 030 /ກມສພ, ລົງວັນທີ 3 ມັງກອນ 2018 ວ່າດ້ວຍມາດຕະຖານພະນັກງານນຳພາ-ຄຸ້ມຄອງ ແລະ ມະຕິສະບັບເລກທີ 12 /ຄບພ.ກຍ, ລົງວັນທີ 14 ກຸມພາ 2019 ວ່າດ້ວຍມາດຕະຖານຂອງພະນັກງານນຳພາ-ຄຸ້ມຄອງຂອງຂະແໜງການຍຸຕິທໍາ, ຊຶ່ງມາດຕະຖານພະນັກງານນຳພາ ຕ້ອງມີຄວາມຮູ້, ຄວາມສາມາດທາງດ້ານວິຊາສະເພາະກົດໝາຍໃນລະດັບຊັ້ນສູງຂຶ້ນໄປ, ມີຄວາມສາມາດນຳພາຜັນຂະຫຍາຍ ແລະ ຈັດຕັ້ງປະຕິບັດບັນດາມະຕິ ແລະ ຄໍາສັ່ງຂອງພັກ ເຂົ້າເຖິງຊີວິດຕົວຈິງຂອງພະນັກງານ ແລະ ປະຊາຊົນ ຢ່າງທົ່ວເຖິງ.

ຕອນທ້າຍ ທ່ານ ປະທານ ກໍໄດ້ອະທິບາຍຊີ້ແຈງເງື່ອນໄຂ ແລະ ເຫດຜົນຂອງການທາມທາບໃນຄັ້ງນີ້ ເພື່ອເຮັດໃຫ້ພະນັກງານ-ລັດຖະກອນພາຍໃນພະແນກຍຸຕິທໍາແຂວງທຸກຄົນ ຕ້ອງໄດ້ເອົາໃຈໃສ່ຍົກສູງການຕັດສີນໃຈຂອງຕົນເອງຢ່າງເລິກເຊິ່ງ, ມີຄວາມອຸ່ນອ່ຽນ, ທຸ່ນທ່ຽງ ແລະ ເຊື່ອໝັ້ນຕໍ່ການນຳພາຂອງພັກ, ຮູ້ຜັນຂະຫຍາຍແນວທາງເຂົ້າໃນວຽກງານຂອງຕົນທີ່ຮັບຜີດຊອບ.

ພາບ-ຂ່າວ: ບຸນເລີດ ລັດຖະພອນ