ພະແນກຍຸຕິທຳແຂວງ ລົງຊຸກຍູ້ວຽກງານວິຊາສະເພາະຢູ່ຫ້ອງການຍຸຕິທຳເມືອງ 4 ເມືອງຂອງແຂວງບໍລິຄໍາໄຊ

          ເພື່ອເຮັດໃຫ້ວຽກງານພາຍໃນຂົງເຂດຍຸຕິທໍາຢູ່ທ້ອງຖິ່ນມີຄວາມເຂັ້ມແຂງໃນທຸກດ້ານ ໃນວັນທີ 12–14 ມັງກອນ 2021 ຜ່ານມານີ້ ທ່ານ ປອ ນາງ ວິໄລ ພິລາວົງ ວ່າການຫົວໜ້າພະແນກຍຸຕິທຳແຂວງ ພ້ອມດ້ວຍບັນດາຫົວໜ້າຂະແໜງ, ຮອງຫົວໜ້າຂະແໜງການທີ່ກ່ຽວຂ້ອງ ໄດ້ລົງເຄື່ອນໄຫວເຮັດວຽກຮ່ວມກັບພະນັກງານຫ້ອງການຍຸຕິທໍາເມືອງ ບໍລິຄັນ, ເມືອງ ວຽງທອງ, ເມືອງ ຄໍາເກີດ ແລະ ເມືອງ ປາກກະດິງ ເພື່ອຊຸກຍູ້ວຽກງານວິຊາສະເພາະບາງໜ່ວຍງານຈົ່ງເອົາໃຈໃສ່ປະຕິບັດຢ່າງເຂັ້ມງວດຕໍ່ໜ້າທີ່ ທີ່ໄດ້ຮັບມອບໝາຍ.
          ໃນການລົງເຄື່ອນໄຫວເຮັດວຽກຄັ້ງນີ້ ໄດ້ຮັບຟັງການລາຍງານຂອງແຕ່ລະເມືອງເຊິ່ງສະແດງໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ແລະ ຈັດຕັ້ງປະຕິບັດໄດ້: ວຽກງານຈັດຕັ້ງປະຕິບັດຄຳຕັດສິນຂອງສານ, ວຽກງານທະບຽນສານ, ວຽກງານໂຄສະນາເຜີຍແຜ່ກົດໝາຍ, ປະເມີນບ້ານ ແລະ ຄອບຄົວແບບຢ່າງປະຕິບັດກົດໝາຍ, ນອກນັ້ນ ບາງເມືອງກໍ່ໄດ້ມີການປັບປຸງຊັບຊ້ອນພະນັກງານເພື່ອໃຫ້ສອດຄ່ອງກັບຄວາມຮູ້ ແລະ ໜ້າທີ່ຮັບຜິດຊອບ ແລະ ໄດ້ຕີລາຄາເຫັນວ່າ: ສະຕິເຄົົາລົບກົດໝາຍຂອງປະຊາຊົນບໍ່ທັນສູງ ຈິ່ງເຮັດໃຫ້ມີຂໍ້ຂັດແຍ່ງເກີດຂຶ້ນຫຼາຍ ແລະ ບາງຂໍ້ຂັດແຍ່ງແມ່ນໄດ້ຮັບການແກ້ໄຂຕາມຂະບວນການຍຸຕິທຳ. ທ່ານ ປອ ນາງວິໄລ ພິລະວົງ ວ່າການຫົວໜ້າພະແນກຍຸຕິທໍາແຂວງ ກໍໄດ້ມີຄຳເຫັນໂອ້ລົມ ກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ຜົນງານໃນໄລຍະຜ່ານມາ ແລະ ເນັ້ນໜັກບາງບັນຫາທີ່ຍັງປະຕິບັດບໍ່ໄດ້ຕາມຄາດໝາຍທີ່ວາງໄວ້ຍ້ອນການລະບາດຂອງພະຍາດໂຄວິດ 19 ເຮັດໃຫ້ວຽກງານສາມາດເຄື່ອນໄຫວບໍ່ສະດວກເຊັ່ນ: ວຽກງານໂຄສະນາເຜີຍແຜ່ກົດໝາຍ ຊຶ່ງບໍ່ສາມາດເຕົ້າໂຮມພໍ່,ແມ່ ປະຊາຊົນໄດ້ ແລະ ຮຽກຮ້ອງຫົວໜ້າຫ້ອງການຍຸຕິທໍາເມືອງໃຫ້ມີຄວາມອຸ່ນອ່ຽນ ທຸ່ນທຽ່ງ, ເອົາໃຈໃສ່ສຶກສາອົບຮົມການເມືອງ - ແນວຄິດໃຫ້ແກ່ອ້າຍເອື້ອຍນ້ອງພະນັກງານ ແລະ ຕັ້ງໜ້າຜັນຂະຫຍາຍແນວທາງຂອງພັກ, ກົດໝາຍຂອງລັດເຂົ້າໃນໜ້າທີ່ຮັບຜິດຊອບຂອງຕົນ ໃຫ້ມີບົດບາດທີ່ສູງຂຶ້ນກ່ວາເກົ່າ ແລະ ເອົາໃຈໃສ່ໃນການສ່ອງແສງລາຍງານຕໍ່ຂັ້ນເທິງຢ່າງເປັນປົກກະຕິ.
ຂ່າວ : ພາບ : ນາງ ໄພວັນ ພຽນວົງ