ຜັນຂະຫຍາຍຜົນສຳເລັດກອງປະຊຸມວຽກງານຍຸຕິທຳທົ່ວປະເທດຕິດພັນກັບການລົງຊຸກຍູ້ວຽກງານວິຊາສະເພາະຢູ່ເມືອງ ຜາອຸດົມ ແຂວງ ບໍ່ແກ້ວ.

ໃນຕອນບ່າຍຂອງວັນທີ 24 ກັນຍາ 2020 ທ່ານ ຄຳຫຼ້າ ອຸດທະຍອດ, ເລຂາໜ່ວຍພັກ, ກຳມະການພັກແຂວງ, ຫົວໜ້າພະແນກຍຸຕິທໍາແຂວງ ບໍ່ແກ້ວ, ພ້ອມດ້ວຍຄະນະໄດ້ລົງຈັດຕັ້ງຜັນຂະຫຍາຍຜົນສຳເລັດຂອງກອງປະຊຸມວຽກງານຍຸຕິທຳທົ່ວປະເທດ ປະຈຳປີ 2019 ຢູ່ເມືອງ ຜາອຸດົມ, ໂດຍມີທ່ານ ຫົວໜ້າຫ້ອງການຍຸຕິທໍາເມືອງ ຜາອຸດົມ ພ້ອມດ້ວຍຄະນະ ແລະ ພະນັກງານ-ລັດຖະກອນເຂົ້າຮ່ວມທັງໝົດຈໍານວນ 11 ທ່ານ ຍິງ 03 ທ່ານ.
ທ່ານ ສົມຈິດ ງາສານກອງ ຫົວໜ້າຫ້ອງການຍຸຕິທໍາເມືອງ ຜາອຸດົມ ກໍໄດ້ລາຍງານການຈັດຕັ້ງປະຕິບັດວຽກງານໃນໄລຍະ 9 ເດືອນຜ່ານມາ, ເປັນຕົ້ນ ແມ່ນວຽກງານຈັດຕັ້ງປະຕິບັດຄໍາຕັດສີນຂອງສານ, ວຽກງານໂຄສະນາເຜີຍແຜ່ກົດໝາຍ, ວຽກງານສົ່ງເສີມລະບົບຍຸຕິທໍາ, ວຽກງານທະບຽນສານ ແລະ ວຽກງານ ອື່ນໆທີ່ປິ່ນອ້ອມ ຜ່ານການລາຍງານເຫັນວ່າມີທັງດ້ານດີ, ດ້ານອອ່ນ ແລະ ຂໍ້ຄົງຄ້າງ ທີ່ຈະຕ້ອງສືບຕໍ່ປັບປຸງແກ້ໄຂໃນຕໍ່ໜ້າ. ຈາກນັ້ນ, ທ່ານ ສຸລິເດດ ບັນດາກອນ ຮອງຫົວໜ້າພະແນກຍຸຕິທໍາແຂວງ ບໍ່ແກ້ວ ກໍໄດ້ເຜີຍແຜ່ບົດສະຫຼຸບວຽກງານຍຸຕິທໍາປະຈຳປີ 2019 ແລະ ທິດທາງແຜນການປີ 2020. ການລົງເຄື່ອນໄຫວວຽກງານຢູ່ເມືອງ ຜາອຸດົມ ໃນຄັ້ງນີ້ ນອກຈາກການຜັນຂະຫຍາຍຜົນສໍາເລັດຂອງກອງປະຊຸມວຽກງານຍຸຕິທຳທົ່ວປະເທດແລ້ວ ຍັງເປັນການລົງຕິດຕາມ, ກວດກາ ແລະ ຊຸກຍູ້ ການເຄື່ອນໄຫວວຽກງານຮອບດ້ານຂອງຂະແໜງຍຸຕິທໍາຕື່ມອີກ.

ໃນຕອນທ້າຍ ທ່ານ ຄໍາຫຼ້າ ອຸດທະຍອດ ຫົວໜ້າພະແນກຍຸຕິທໍາແຂວງ ບໍ່ແກ້ວ ກໍໄດ້ມີຄໍາເຫັນໂອ້ລົມ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ກັບຜົນງານ ແລະ ຜົນສໍາເລັດທີ່ຫ້ອງການຍຸຕິທໍາເມືອງຜາອຸດົມ ຍາດມາໄດ້ຕະຫຼອດໃນໄລຍະ 9 ເດືອນຜ່ານມາ, ພ້ອມທັງເນັ້ນໜັກໃຫ້ເມືອງ ຜາອຸດົມ ຈົ່ງສືບຕໍ່ເສີມຂະຫຍາຍຈຸດດີ, ແກ້ໄຂດ້ານອ່ອນ ແລະ ດ້ານຄົງຄ້າງຂອງຕົນ, ພ້ອມດຽວກັນນັ້ນກໍໄດ້ມອບຕູ້ລຳໂພງ 1 ໜ່ວຍ ແລະ ຊຸດຈໍແອວຊີດີ ເພື່ອນຳໃຊ້ເຂົ້າໃນວຽກງານໂຄສະນາເຜີຍແຜ່ກົດໝາຍ, ເຄື່ອງທີ່ນຳມາໃນຄັ້ງນີ້ໄດ້ຮັບການຊ່ວຍເຫຼືອຈາກໂຄງການເຊກາ ໂດຍຜ່ານກົມໂຄສະນາເຜີຍແຜ່ກົດໝາຍ ກະຊວງຍຸຕິທຳ.

ຖ່າຍພາບ-ຂຽນຂ່າວ: ພຸດທະຈັກ ວິໄລພອນ

ປະເພດຂ່າວ: