ກໍາມະບານຮາກຖານພະແນກຍຸຕິທຳແຂວງ ບໍ່ແກ້ວ ເອົາໃຈໃສ່ຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ

ກໍາມະບານຮາກຖານພະແນກຍຸຕິທຳແຂວງ ບໍ່ແກ້ວໄດ້ເອົາໃຈໃສ່ຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າເຫັນວ່າມີຄວາມສຳເລັດຫຼາຍດ້ານ ດັ່ງນັ້ນ, ການປະເມີນຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າຈຶ່ງໄດ້ເປີດກອງປະຊຸມຂຶ້ນໃນຕອນເຊົ້າຂອງວັນທີ 14 ຕຸລາ 2020 ຢູ່ທີ່ຫ້ອງປະຊຸມພະແນກຍຸຕິທຳແຂວງ ບໍ່ແກ້ວ ໂດຍການເປັນປະທານຂອງ ສະຫາຍ ສຸລິເດດ ບັນດາກອນ ປະທານກຳມະບານຮາກຖານພະແນກຍຸຕິທຳແຂວງ, ເປັນກຽດເຂົ້າຮ່ວມຂອງສະຫາຍ ຄຳຫຼ້າ ອຸດທະຍອດ ກໍາມະການພັກແຂວງ, ເລຂາໜ່ວຍພັກ, ຫົວຫນ້າພະແນກຍຸຕິທຳແຂວງ ແລະ ສະມາຊິກກໍາມະບານພາຍໃນພະແນກເຂົ້າຮ່ວມຢ່າງພ້ອມພຽງ.
ໃນພິທີ ສະຫາຍ ສຸລິເດດ ບັນດາກອນ ປະທານກໍາມະບານຮາກຖານ ພະແນກຍຸຕິທຳແຂວງ ໄດ້ຕີລາຄາຄືນຜົນການຈັດຕັ້ງປະຕິບັດວຽກງານກໍາມະບານ ພ້ອມທັງວາງທິດທາງແຜນການຄາດໝາຍສູ້ຊົນຂອງກໍາມະບານຮາກຖານພະແນກຍຸຕິທຳແຂວງ ບໍ່ແກ້ວ ໄດ້ຍົກໃຫ້ເຫັນຜົນງານດ້ານດີຫຼາຍດ້ານ ໂດຍສະເພາະແມ່ນວຽກງານການເມືອງ-ແນວຄິດ, ການປະຕິບັດວຽກງານວິຊາສະເພາະ ແລະ ກໍ່ສ້າງບຳລຸງພາຍໃນ, ພະແນກຍຸຕິທຳແຂວງ ບໍ່ແກ້ວ ມີສະມາຊິກກໍາມະບານທັງຫມົດ 28 ສະຫາຍ ຍິງ 14 ສະຫາຍ, ການປະເມີນ ແມ່ນຖືເອົາເນື້ອໃນ ຂໍ້ແຂ່ງຂັນ 5 ເປັນເຈົ້າຂອງສະຫະພັນກໍາມະບານລາວວາງອອກ ແລະ ໄດ້ຖືວຽກງານການເມືອງ-ແນວຄິດເປັນວຽກສໍາຄັນເຂົ້າໃນການຈັດຕັ້ງປະຕິບັດ ປັບປຸງ ທັດສະນະຫຼັກໝັ້ນຊົນຊັ້ນກໍາມະກອນ, ຍົກສູງຄວາມຮູ້ ຄວາມສາມາດ, ມີສະຕິເຄົາລົບລະບຽບກົດໝາຍ, ສະມາຊິກກໍາມະບານ ກໍາມະກອນມີຄວາມໜັກແໜ້ນເຂັ້ມແຂງ, ໄລຍະຜ່ານມາແມ່ນໄດ້ເກັບເງິນບໍາລຸງສະມາຊິກກໍາມະບານ ແລະ ເງິນກອງທຶນຊ່ວຍເຫຼືອເຊິ່ງກັນ ແລະ ກັນ. ໃນການປະເມີນສະມາຊິກກໍາມະບານແຕ່ລະສະຫາຍ ໄດ້ຜ່ານຜົນງານບົດປະເມີນຜົນຕົນເອງອັນໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ແລະ ວິທີປັບປຸງແກ້ໄຂ ແລະ ໝູ່ຄະນະປະກອບຄໍາຄິດເຫັນເພື່ອຕໍານິສົ່ງຂ່າວ ກໍ່ສ້າງຊ່ວຍເຫຼືອເຊິ່ງກັນ ແລະ ກັນ ເຮັດໃຫ້ສະມາຊິກກໍາມະບານແຕ່ລະສະຫາຍ ມີຄວາມກ້າວໜ້າ ກ້າວໄປສູ່ການປະກາດ ແລະ ຮັບຮອງເປັນກໍາມະບານຮາກຖານ 5 ເປັນເຈົ້າໃນຕໍ່  ຫນ້າ.

ຈາກນັ້ນ, ສະຫາຍ ຄຳຫຼ້າ ອຸດທະຍອດ ກໍາມະການພັກແຂວງ ຫົວຫນ້າພະແນກຍຸຕິທຳແຂວງ ກໍໄດ້ມີຄໍາເຫັນໃຫ້ສະມາຊິກກໍາມະບານຈົ່ງເພີ່ມທະວີວຽກງານການເມືອງ-ແນວຄິດ, ເອົາໃຈໃສ່ປະຕິບັດໜ້າທີ່ວຽກງານວິຊາສະເພາະດ້ວຍຄວາມຮັບຜິດຊອບສູງ, ມີຄວາມສາມັກຄີຊ່ວຍເຫຼືອຊຶ່ງກັນ ແລະ ກັນ ຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າຂອງສູນກາງກຳມະບານລາວ ໃຫ້ເປັນຂະບວນການຝົດຟື້ນ.

ຂຽນຂ່າວ-ຖ່າຍພາບ: ພຸດທະຈັກ ວິໄລພອນ

ປະເພດຂ່າວ: