ໜ່ວຍຊາວໜຸ່ມພະແນກຍຸຕິທໍາແຂວງ ບໍ່ແກ້ວ ປະເມີນຜົນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ປະຈໍາປີ 2020.

ໃນຕອນບ່າຍຂອງວັນທີ 22 ກັນຍາ 2020 ຢູ່ທີ່ຫ້ອງປະຊຸມພະແນກຍຸຕິທໍາແຂວງ ບໍ່ແກ້ວ ໜ່ວຍຊາວໜຸ່ມ ພະແນກຍຸຕິທໍາແຂວງ ໄດ້ເປີດກອງປະຊຸມປະເມີນຜົນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ປະຈໍາປີ 2020 ຂຶ້ນໂດຍເປັນປະທານ ສະຫາຍ ນາງ ສີພອນ ແອ່ນວິໄລ ເລຂາໜ່ວຍຊາວໜຸ່ມພະແນກຍຸຕິທຳແຂວງ, ໂດຍການເຂົ້າຮ່ວມຂອງ ສະຫາຍ ນາງ ສາຄອນ ບານຸວົງ ກຳມະການໜ່ວຍພັກ, ຫົວໜ້າຂະແໜງສົ່ງເສີມວຽກງານຍຸຕິທຳ, ຜູ້ຊີ້ນຳວຽກງານອົງການຈັດຕັ້ງມະຫາຊົນພ້ອມດ້ວຍຊາວໜຸ່ມພາຍໃນພະແນກ.

ສະຫາຍ ນາງ ສີພອນ ແອ່ນວິໄລ ເລຂາໜ່ວຍຊາວໜຸ່ມພະແນກຍຸຕິທຳແຂວງ ໄດ້ຜ່ານບົດສະຫຼຸບ ການຈັດຕັ້ງປະຕິບັດຂໍ້ແຂ່ງຂັນ 4 ບຸກ ປະຈໍາປີ 2020 ແລະ ທິດທາງແຜນການໃນ ປີ 2021 ເຊິ່ງໄດ້ສະແດງໃຫ້ເຫັນຜົນສໍາເລັດຫຼາຍດ້ານໃນໄລຍະຜ່ານມາເປັນຕົ້ນ: ດ້ານການເມືອງແນວຄິດ ຄະນະໜ່ວຍຊາວໜຸ່ມຂອງພວກເຮົາແຕ່ລະສະຫາຍແມ່ນມີແນວຄິດອຸ່ນອ່ຽງ, ທຸ່ນທ່ຽງ, ມີວິໄນ, ມີແບບແຜນການນໍາພາ, ມີແນວຄິດເປັນເອກະພາບຕໍ່ແນວທາງນະໂຍບາຍຂອງພັກ, ລະບຽບກົດຫມາຍຂອງລັດ ເປັນເຈົ້າການໃນການຈັດຕັ້ງປະຕິບັດຂໍ້ແຂ່ງ ຂັນ 4 ບຸກ ເຊັ່ນວ່າ: ບຸກດ້ານແນວຄິດ, ດ້ານການຈັດຕັ້ງ, ດ້ານການຝຶກຝົນຫຼໍ່ຫຼອມຮໍ່າຮຽນ ແລະ ບຸກດ້ານການສ້າງວິຊາຊີບ-ວຽກເຮັດງານທໍາ, ພ້ອມທັງເປັນແບບຢ່າງເຕົ້າໂຮມຄວາມສາມັກຄີໃຫ້ແກ່ມະຫາຊົນ ແລະ ພໍ່ແມ່ປະຊາຊົນບັນດາເຜົ່າ, ໜ່ວຍຊາວໜຸ່ມພະແນກຍຸຕິທຳແຂວງ ມີສະມາຊິກຊາວໜຸ່ມທັງຫມົດ 20 ສະຫາຍ, ຍິງ 11 ສະຫາຍ, ນອກຈາກນີ້ໜ່ວຍຊາວໜຸ່ມຂອງພວກເຮົາຍັງໄດ້ ສ້າງເງິນກອງທຶນຊ່ວຍເຫຼືອເຊິ່ງກັນ ແລະ ກັນ, ຈາກນັ້ນ ສະມາຊິກຊາວໜຸ່ມແຕ່ລະສະຫາຍກໍ່ໄດ້ຜ່ານໃບປະເມີນຜົນການຈັດຕັ້ງປະຕິບັດຂໍ້ແຂ່ງຂັນ 4 ບຸກ ເພື່ອໃຫ້ໝູ່ຄະນະໄດ້ຕໍານິຕິຊົມກໍ່ສ້າງຊ່ວຍເຫຼືອເຊິ່ງກັນ ແລະ ກັນ ເປັນບ່ອນອີງໃນການຈັດຕັ້ງປະຕິບັດໃນຕໍ່ຫນ້າ, ຜ່ານການປະເມີນສາມາດສະຫຼຸບຕີລາຄາຈັດແບ່ງປະເພດໄດ້: ປະເພດແຂງ ແລະ ສາມາດຮັກສາມູນເຊື້ອ ແລະ ນາມມະຍົດທຸງໄຊນຳໜ້າໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກໄດ້ 5 ປີຊ້ອນ.

ຕອນທ້າຍພິທີ ສະຫາຍ ນາງ ສາຄອນ ບານຸວົງ ກຳມະການໜ່ວຍພັກ, ຫົວໜ້າຂະແໜງສົ່ງເສີມວຽກງານຍຸຕິທຳ, ຜູ້ຊີ້ນຳອົງການຈັດຕັ້ງມະຫາຊົນໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາຕໍ່ກັບຄະນະໜ່ວຍ ແລະ ສະມາຊິກຊາວໜຸ່ມແຕ່ລະສະຫາຍຈົ່ງສືບຕໍ່ເອົາໃຈໃສ່ການຮ່ວມຊີວິດປະຈໍາເດືອນເປັນປົກກະຕິ, ເອົາໃຈໃສ່ຝຶກຝົນຫຼໍ່ຫຼອມຊອກຮູ້ຮໍ່າຮຽນເອົາບັນດານິຕິກໍາ, ເອກະສານທີ່ເປັນບົດ, ຍົກລະດັບວິຊາສະເພາະ, ພ້ອມທັງສູ້ຊົນປະຕິບັດໜ້າທີ່ວຽກງານໃຫ້ດີ ແລະ ສ້າງຊີວິດການເປັນຢູ່ຂອງຕົນເອງ ແລະ ຄອບຄົວໃຫ້ສູງຂຶ້ນ, ສໍາຄັນແມ່ນດ້ານແນວຄິດ, ກໍາແຫນ້ນດ້ານການຈັດຕັ້ງ, ເພີ່ມຄວາມເປັນແບບຢ່າງການນໍາພາແບບແຜນວິທີເຮັດວຽກ ແລະ ຂະບວນການຕ່າງໆສົມກັບຄໍາເວົ້າທີ່ວ່າ: ຊາວໜຸ່ມເປັນແຂນຂວາຂອງພັກ ເປັນກະດູກສັນຫຼັງຂອງຊາດ.

ພາບ-ຂ່າວ: ພຸດທະຈັກ ວິໄລພອນ

ປະເພດຂ່າວ: