ປະກາດການແຕ່ງຕັ້ງຫົວໜ້າຫ້ອງການຍຸຕິທຳເມືອງຜູ້ໃໝ່

ວັນທີ 24 ກໍລະກົດ 2020 ທີຜ່ານ ຢູ່ທີ່ຫ້ອງປະຊຸມຫ້ອງການຍຸຕິທຳເມືອງເມິງ ແຂວງບໍ່ແກ້ວ ໄດ້ຈັດພິທີປະກາດການແຕ່ງຕັ້ງຫົວໜ້າຫ້ອງການຍຸຕິທຳເມືອງເມິງຜູ້ໃໝ່ ໂດຍການເປັນປະທານຮ່ວມຂອງ ທ່ານ ຄຳຫຼ້າ ອຸດທະຍອດ ກຳມະການພັກແຂວງ ຫົວໜ້າພະແນກຍຸຕິທຳແຂວງບໍ່ແກ້ວ ແລະ ທ່ານ ສົມນຶກ ອິນທະພົມ ກໍາມະການພັກເມືອງ ຮອງເຈົ້າເມືອງ ເມືອງເມິງ, ມີບັນດາຄະນະພະແນກ ແລະ ຫົວໜ້າຫ້ອງການຍຸຕິທໍາເມືອງ ພ້ອມດ້ວຍພະນັກ ງານ-ລັດຖະກອນ ແລະ ແຂກຖືກເຊີນເຂົ້າຮ່ວມທັງໝົດ 19 ທ່ານ, ຍິງ 2 ທ່ານ.

ທ່ານ ສັງວອນ ບົວພາແກ້ວ ຮັກສາການຫົວໜ້າຫ້ອງການຍຸຕິທຳເມືອງເມິງ ໄດ້ຂຶ້ນຜ່ານບົດສະຫຼຸບການຊີ້ນຳ-ນຳພາໃນໄລຍະຜ່ານມາ. ຈາກນັ້ນ, ທ່ານ ຫຸມແກ້ວ ອ້ອຍແຂມທອງ ຫົວໜ້າຄະນະຈັດຕັ້ງເມືອງໄດ້ຜ່ານຂໍ້ຕົກລົງຂອງທ່ານເຈົ້າເມືອງ ເມືອງເມິງ ວ່າດ້ວຍການແຕ່ງຕັ້ງ ທ່ານ ທອງລຸນ ວິໄລທອງ ເປັນຫົວໜ້າຫ້ອງການຍຸຕິທຳເມືອງເມິງຜູ້ ໃໝ່.

ຕອນທ້າຍ ທ່ານ ຄຳຫຼ້າ ອຸດທະຍອດ ກໍໄດ້ໃຫ້ກຽດໂອ້ລົມ ກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ຫ້ອງການຍຸຕິທຳເມືອງສາມາດຍາດມາໄດ້ໃນໄລຍະຜ່ານມາ ແລະ ໄດ້ເນັ້ນໜັກໃຫ້ຫົວໜ້າຫ້ອງການຍຸຕິທຳ ເມືອງເມິງຜູ້ໃໝ່ ຈົ່ງເອົາໃຈໃສ່ສືບຕໍ່ຊີ້ນຳ-ນຳພາທາງດ້ານການເມືອງ-ແນວຄິດ, ສຸມໃສ່ການເຄື່ອນໄຫວຈັດຕັ້ງປະຕິ ບັດວຽກງານວິຊາສະເພາະໃຫ້ໜັກແໜ້ນເຂັ້ມແຂງ, ເຕົ້າໂຮມຄວາມສາມັກຄີ, ປະຕິບັດຕາມພາລະບົດບາດ, ສິດ ແລະ ໜ້າທີ່ ຕາມການຈັດຕັ້ງມອບໝາຍໃຫ້ປະສົບຜົນສໍາເລັດຕາມຄາດໝາຍທີ່ວາງໄວ້.

ພາບ-ຂ່າວ: ຫ້ອງການຍຸຕິທໍາເມືອງເມິງ