ປາຖະກະຖາລະນຶກວັນຄ້າຍວັນເກີດ ປະທານ ສຸພານຸວົງ

ຕອນບ່າຍຂອງວັນທີ 23 ກໍລະກົດ 2020 ຢູ່ທີ່ຫ້ອງປະຊຸມພະແນກຍຸຕິທຳແຂວງບໍ່ແກ້ວໄດ້ຈັດພິທີປາຖະກະຖາລະນຶກວັນຄ້າຍວັນເກີດ ປະທານ ສຸພານຸວົງ ຄົບຮອບ 111 ປີ (13 ກໍລະກົດ 1909 – 13 ກໍລະກົດ 2020) ໃຫ້ກຽດເຂົ້າຮ່ວມ ແລະ ປາຖະກະຖາໂດຍ ທ່ານ ສຸລິເດດ ບັນດາກອນ ຮອງຫົວໜ້າພະແນກຍຸຕິທໍາແຂວງບໍ່ແກ້ວ ມີຫົວໜ້າ ຮອງຫົວໜ້າຂະແໜງ, ພ້ອມດ້ວຍພະນັກງານ-ລັດຖະກອນ ພາຍໃນພະແນກຍຸຕິທຳເຂົ້າຮ່ວມຢ່າງພ້ອມພຽງ.

ທ່ານ ສຸລິເດດ ບັນດາກອນ ໄດ້ປາຖະກະຖາ ແລະ ເລົ່າໃຫ້ຮູ້ວ່າ: ທ່ານ ປະທານ ສຸພານຸວົງ ເກີດເມື່ອວັນທີ 13 ກໍລະກົດ 1909 ທີ່ແຂວງຫຼວງພະບາງ ໃນຄອບຄົວເຊື້ອເຈົ້າ ແຕ່ເປັນຜູ້ທີ່ມີນໍ້າໃຈດູດດື່ມ, ມີນໍ້າໃຈຕໍ່ສູ້ອົງອາດກ້າຫານ, ມີທັດສະນະຫຼັກໝັ້ນ, ມີນໍ້າໃຈເສຍສະຫຼະອັນສູງສົ່ງ ເພື່ອຊາດ, ເພື່ອປະຊາຊົນ ຕະຫຼອດຊີວິດຂອງເພິ່ນບໍ່ວ່າຢູ່ໃນຕຳແໜ່ງໃດເພິ່ນກໍອຸທິດໝົດຈິດໝົດໃຈ, ຄວາມສາມາດ ແລະ ຫົວຄິດປະດິດສ້າງຂອງຕົນເຂົ້າໃນວຽກງານລວມ, ແມ່ນຜູ້ທີມີຄວາມຈົງຮັກພັກດີຕໍ່ອຸດົມການປະຕິວັດຢ່າງເດັດຂາດ, ຕໍ່ສູ້ຢ່າງກ້າແກ່ນພິລະອາດຫານ ຍາມໃດເພິ່ນກໍຍົກສູງສະຕິເຄົາລົບລະບຽບວິໄນຕໍ່ການຈັດຕັ້ງ, ນັບຖືໝູ່ຄະນະ, ເອື້ອເຟື້ອເພື່ອແຜ່, ຮັກແພງມິດສະຫາຍຢ່າງຈິງໃຈ, ດໍາລົງຊີວິດດ້ວຍຄວາມສຸດຈະລິດ ແລະ ງ່ຍດາຍ ເປັນປັນຍາຊົນຜູ້ຍິ່ງໃຫຍ່, ເປັນເຊື້ອເຈົ້າທີ່ມີນໍ້າໃຈຮັກຊາດ. ປະທານ ໄກສອນ ພົມວິຫານ ໄດ້ເວົ້າເຖິງ ປະທານ ສຸພານຸວົງວ່າ: ຊື່ສຽງຮຽງນາມ ຂອງສະຫາຍໄດ້ພົ້ນເດັ່ນຂຶ້ນໃນຖານະທີ່ເປັນນັກຮົບຮັກຊາດຮຸ່ນທໍາອິດ ທີ່ໄດ້ເອົາຊີວິດຂອງຕົນຜູກພັນກັບການປະຕິວັດຕະຫຼອດມາ ໂດຍບໍ່ງໍ້ງ່ຽງຕໍ່ຄວາມລໍາບາກ, ຄວາມເສຍສະຫຼະໃດໆ ກະທັ້ງເຖິງບໍ່ຫວາດຫວັ່ນຕໍ່ກັບການຈັບກຸມຄຸມຂັງຂອງສັດຕູ, ຍາມໃດກໍຕໍ່ສູ້ເພື່ອອຸດົມຄະຕິປະຕິວັດອັນສູງສົ່ງ, ເພື່ອຄວາມເປັນເອກະລາດ ແລະ ຄວາມວັດທະນະຖາວອນຂອງປະເທດຊາດ, ເພື່ອອິດສະຫຼະພາບ ແລະ ຄວາມຢູ່ດີກິນດີຂອງປະຊາຊົນ, ປະທານ ສຸພານຸວົງ ເປັນຜູ້ໜຶ່ງໃນບັນດາຜູ້ນຳທີ່ດີເດັ່ນ ແລະ ເຄົາລົບປະຊາຊົນລາວເຜົ່າຕ່າງໆ ຍາມໃດເພິ່ນກໍຍົກສູງສິດ ແລະ ຜົນປະໂຫຍດຂອງຊາດຂອງປະຊາຊົນສູງກວ່າຜົນປະໂຫຍດສ່ວນຕົວ ແລະ ຄອບຄົວ ຜົນງານດັ່ງກ່າວໄດ້ກາຍເປັນແວ່ນແຍງໃຫ້ແກ່ຜູ້ສືບທອດຄົນຮຸ່ນຫຼັງໄດ້ຮໍ່າຮຽນ ແລະ ລະນຶກເຖິງຜົນງານ, ຄຸນງາມຄວາມດີຂອງເພິ່ນ ເພື່ອເປັນບົດຮຽນໃນການຈັດຕັ້ງປະຕິບັດວຽກງານໃນຕໍ່ໜ້າ.

ພາບ-ຂ່າວ: ພະແນກຍຸຕິທໍາແຂວງບໍ່ແກ້ວ