ພະແນກຍຸຕິທຳແຂວງ ບໍ່ແກ້ວ ມອບ LCD ແລະ ເຄື່ອງສຽງ ໃຫ້ຫ້ອງການຍຸຕິທຳເມືອງ

ໃນຕອນເຊົ້າຂອງວັນທີ 16 ຕຸລາ 2020 ຢູ່ທີ່ຫ້ອງປະຊຸມພະແນກຍຸຕິທຳແຂວງ ບໍ່ແກ້ວ ໄດ້ມີການມອບ LCD ແລະ ເຄື່ອງສຽງ ໃຫ້ແກ່ຫ້ອງການຍຸຕິທຳເມືອງ 3 ເມືອງ: ເມືອງ ປາກທາ, ເມືອງ ຕົ້ນເຜິ້ງ ແລະ ເມືອງ ເມິງ ໂດຍໃຫ້ກຽດມອບໂດຍທ່ານ ຄຳຫຼ້າ ອຸດທະຍອດ ກຳມະການພັກແຂວງ ຫົວໜ້າພະແນກຍຸຕິທຳແຂວງ ແລະ ຮັບໂດຍ ບັນດາຫົວໜ້າຫ້ອງການຍຸຕິທຳເມືອງ 3 ເມືອງ, ມີຮອງຫົວໜ້າພະແນກ, ບັນດາຫົວໜ້າຫ້ອງການຍຸຕິທຳເມືອງ, ຫົວໜ້າຂະແໜງ, ຮອງຫົວໜ້າຂະແໜງ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມ.

ຈຸດປະສົງໃນການມອບ LCD ແລະ ເຄື່ອງສຽງ ເທື່ອນີ້ເພື່ອປະກອບສ່ວນໃຫ້ແກ່ວຽກງານໂຄສະນາເຜີຍແຜ່ກົດໝາຍ ຢູ່ຂັ້ນເມືອງໃຫ້ມີຄວາມທັນສະໄໝ ແລະ ມີປະສິດທິພາບສູງຂຶ້ນກວ່າເກົ່າ, ເຄື່ອງທີ່ນຳມາມອບໃນຄັ້ງນີ້ໄດ້ຮັບການສະໜັບສະໜູນຈາກໂຄງການ ( CEGGA ) ໂດຍຜ່ານກົມໂຄສະນາເຜີຍແຜ່ກົດໝາຍ ກະຊວງຍຸຕິທໍາ.