ພິທີ ເປີດຊຸດຝຶກອົບຮົມກົດໝາຍໄລຍະສັ້ນ 45 ວັນ ໃຫ້ພະນັກງານຫຼັກແຫຼ່ງເມືອງ ຫ້ວຍຊາຍ ແຂວງ ບໍ່ແກ້ວ

ໃນວັນທີ 15 ຕຸລາ 2020 ຜ່ານມານີ້ ຢູ່ທີ່ສູນຝຶກອົບຮົມຂອງເມືອງ ຫ້ວຍຊາຍ ແຂວງ ບໍ່ແກ້ວ ໄດ້ຈັດພິທີເປີດຊຸດຝຶກອົບຮົມກົດໝາຍຂັ້ນພື້ນຖານລະບົບບໍາລຸງໄລຍະສັ້ນ 45 ວັນ ໃຫ້ພະນັກງານຫຼັກແຫຼ່ງ ແລະ ພະນັກງານສືບທອດຂອງເມືອງ ຫ້ວຍຊາຍ ຊຸດທີ I ປະຈໍາປີ 2020 ຂຶ້ນ ໂດຍການເປັນປະທານຂອງ ທ່ານ ຈອມສີ ລັດຕະນະປັນ ຄະນະປະຈໍາພັກແຂວງ ຮອງເຈົ້າແຂວງ ບໍ່ແກ້ວ, ເຂົ້າຮ່ວມມີ ທ່ານ ຫົງແກ້ວ ວິໄນວົງ ກໍາມະການພັກແຂວງ, ເລຂາພັກເມືອງ, ເຈົ້າເມືອງ ຫ້ວຍຊາຍ ແລະ ທ່ານ ຄໍາຫຼ້າ ອຸດທະຍອດ ກໍາມະການພັກແຂວງ ເລຂາໜ່ວຍພັກ ຫົວໜ້າພະແນກຍຸຕິທໍາແຂວງ ບໍ່ແກ້ວ ມີບັນດາຄະນະປະຈໍາພັກ, ກໍາມະການພັກເມືອງ, ຫົວໜ້າຫ້ອງການ, ແຂກຖືກເຊີນ, ຄູຝຶກ ແລະ ນັກຝຶກອົບຮົມເຂົ້າຮ່ວມທັງໝົດ 92 ທ່ານ, ຍິງ 15 ທ່ານ.

ໃນພິທີດັ່ງກ່າວ ທ່ານ ຄໍາຫຼ້າ ອຸດທະຍອດ ຫົວໜ້າພະແນກຍຸຕິທໍາແຂວງ ໄດ້ຜ່ານແຜນການເປີດຊຸດຝຶກອົບຮົມວ່າ ການເປີດຊຸດຝຶກອົບຮົມຄັ້ງນີ້ ແມ່ນເພື່ອເຮັດໃຫ້ພະນັກງານຫຼັກແຫຼ່ງ ແລະ ພະນັກງານສືບທອດຂັ້ນເມືອງ ໄດ້ຍົກລະດັບຄວາມຮູ້ທາງດ້ານກົດໝາຍອັນເປັນລະບົບພື້ນຖານ ແນໃສ່ສ້າງເງື່ອນໄຂໃຫ້ແກ່ການຄຸ້ມຄອງລັດ, ຄຸ້ມຄອງເສດຖະກິດສັງຄົມດ້ວຍກົດໝາຍໃຫ້ມີປະສິດທິພາບ ແລະ ປະສິດທິຜົນສູງ. ເປົ້າໝາຍຜູ້ເຂົ້າຮ່ວມຝຶກອົບຮົມຄັ້ງນີ້ ມີບັນດາຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ, ອົງການຈັດຕັ້ງມະຫາຊົນ, ສອງກອງບັນຊາການປ້ອງກັນຊາດ-ປ້ອງກັນຄວາມສະຫງົບ ແລະ ເລຂາພັກບ້ານ ລວມທັງໝົດ 51 ທ່ານ, ຍິງ 10 ທ່ານ ປະກອບມີ 32 ວິຊາຮຽນ, ມີ 32 ກົດໝາຍ, ມີ 22,5 ໜ່ວຍກິດ ແລະ 360 ຊົ່ວໂມງ, ໃຊ້ເວລາຮຽນທັງໝົດ 45 ວັນຈຶ່ງສໍາເລັດ.

ໃນຕອນທ້າຍພິທີ ທ່ານ ຈອມສີ ລັດຕະນະປັນ ຄະນະປະຈຳພັກແຂວງ, ຮອງເຈົ້າແຂວງ ໄດ້ໃຫ້ທິດຊີ້ນຳໂດຍໄດ້ເນັ້ນໜັກໃຫ້ຄະນະຮັບຜິດຊອບຂັ້ນແຂວງ, ຂັ້ນເມືອງ, ຄະນະຄູຝຶກ ແລະ ສຳມະນາກອນຕ້ອງແບ່ງວຽກ, ແບ່ງຄວາມຮັບຜິດຊອບ, ຈັດວາງຕາຕະລາງການຮຽນ-ການສອນໃຫ້ລະອຽດຈະແຈ້ງເປັນສຳຄັນ ຕິດພັນກັບການເອົາໃຈໃສ່ຄົ້ນຄວ້າເນື້ອໃນ ແລະ ກະກຽມແຕ່ງບົດສອນຕາມຫຼັກວິຊາບັນດາຫຼັັກມູນທິດສະດີ, ຫຼັກການຂອງກົດໝາຍປະຕິບັດໂມງ, ເວລາ ການຂຶ້ນຫ້ອງສອນຢ່າງເປັນປົກກະຕິ ແລະ ຮຽກຮ້ອງໃຫ້ນັກສຳມະນາກອນ ຈົ່ງພ້ອມກັນຕັ້ງໜ້າຕິດຕາມຮັບຟັງການບັນລະຍາຍຂອງຄູ-ອາຈານ ໃຫ້ມີຄວາມຮັບຮູ້ເຂົ້າໃຈກ່ຽວກັບເນື້ອໃນເອກະສານຢ່າງເລິກເຊິ່ງເຖິງຖອງ ຖືສຳຄັນການຍົກບັນຫາຂຶ້ນມາສົນທະນາແລກປ່ຽນຖອດຖອນບົດຮຽນເຊິ່ງກັນ ແລະ ກັນຢ່າງວະພາວິໄສ ເພື່ອເຮັດໃຫ້ການຝຶກອົບຮົມຄັ້ງນີ້ມີບັນຍາກາດອັນດີ ຮັບປະກັນໃຫ້ມີຜົນສຳເລັດຕາມລະດັບຄາດໝາຍ.

ຂຽນຂ່າວ-ຖ່າຍພາບ: ພຸດທະຈັກ ວິໄລພອນ