ແຂວງ ຜົ້ງສາລີ ເອົາໃຈໃສ່ຍົກລະດັບທາງດ້ານກົດໝາຍໃຫ້ພະນັກງານຫຼັກແຫຼ່ງ

Primary tabs

          ເພື່ອເຮັດໃຫ້ພະນັກງານຫຼັກແຫຼ່ງຂັ້ນແຂວງ ແລະ ເມືອງ ຜົ້ງສາລີ ມີຄວາມຮູ້ພື້ນຖານກ່ຽວກັບລັດຖະທໍາມະນູນ ແລະ ກົດໝາຍນັບມື້ນັບສູງຂຶ້ນ, ແນໃສ່ສ້າງເງື່ອນໄຂໃຫ້ແກ່ການຄຸ້ມຄອງລັດ - ຄຸ້ມຄອງສັງຄົມດ້ວຍກົດໝາຍ ແລະ ປະກອບສ່ວນການສ້າງ ລັດ ສປປ ລາວ ເປັນລັດທີ່ປົກຄອງດ້ວຍກົດໝາຍຂອງປະຊາຊົນ, ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນເທື່ອລະກ້າວ. ໃນຕອນເຊົ້າຂອງວັນທີ 21 ທັນວາ 2021 ຜ່ານມາ ພະແນກຍຸຕິທຳແຂວງ ຜົ້ງສາລີ ໄດ້ຈັດພິທີເປີດຮຽນກົດໝາຍຊັ້ນຕົ້ນລະບົບ 3 ເດືອນ ຊຸດທີ I ໃຫ້ພະນັກງານຫຼັກແຫຼ່ງຂັ້ນແຂວງ ແລະ ເມືອງ ຜົ້ງສາລີ ຂຶ້ນຢ່າງເປັນທາງການ ທີ່ສະໂມສອນໃຫ່ຍຂອງແຂວງຫຼັງເກົ່າຂອງແຂວງ ທີ່ເມືອງ ຜົ້ງສາລີ ໂດຍການເປັນປະທານຂອງ ທ່ານ ທອງຄຳ ລີລາວົງ ຫົວໜ້າພະແນກຍຸຕິທໍແຂວງ, ມີບັນດາທ່ານຄະນະຮັບຜິດຊອບຊີ້ນໍາການເປີດການຮຽນ-ການສອນ, ນັກວິທະຍາກອນ, ນັກສຳມະກອນ ແລະ ພະນັກງານ-ລັດຖະກອນພະແນກຍຸຕິທໍາແຂວງເຂົ້າຮ່ວມ.
          ໃນພິທີ ທ່ານ ຈັນສະໝອນ ຄຸນນະເລີດ ຮອງຫົວໜ້າພະແນກຍຸຕິທຳແຂວງ ຜົ້ງສາລີ ໄດ້ຂື້ນຜ່ານຂໍ້ຕົກລົງຂອງທ່ານເຈົ້າແຂວງ ວ່າດ້ວຍການອະນຸມັດເປີດຮຽນກົດໝາຍຊັ້ນຕົ້ນລະບົບ 3 ເດືອນ ໃຫ້ແກ່ພະນັກງານຫຼັກແຫຼ່ງຂັ້ນແຂວງ ແລະ ເມືອງ ຜົ້ງສາລີ ຊຸດທີ 1 ຂໍ້ຕົກລົງ ແຕ່ງຕັ້ງຄະນະຮັບຜິດຊອບຂັ້ນແຂວງວ່າດ້ວຍການເອົານັກວິທະຍາກອນ ເປີດຮຽນກົດໝາຍຊັ້ນຕົ້ນລະບົບ 3 ເດືອນ ຊຸດທີ 1 ແລະ ຜ່ານຂໍ້ຕົກລົງແຕ່ງຕັ້ງນັກສຳມະນາກອນ; ຈາກນັ້ນທ່ານ ນາງ ອຳໄພພອນ ຕ່ອມມະນີ ຮອງຫົວໜ້າພະແນກຍຸຕິທຳແຂວງ ຜົ້ງສາລີ ໄດ້ຂື້ນລາຍງານການກະກຽມຄວາມພ້ອມເປີດການຮຽນ-ການສອນກົດໝາຍຊັ້ນຕົ້ນລະບົບ 3 ເດືອນ ຊຸດທີ 1 ໃຫ້ແກ່ພະນັກງານຫຼັກແຫຼ່ງຂັ້ນແຂວງ ແລະ ເມືອງ ຜົ້ງສາລີ ໃນຄັ້ງນີ້ ມີນັກວິທະຍາກອນທັງໝົດ 31 ທ່ານ ຍິງ 3 ທ່ານ ມີຄະນະຮັບຜິດຊອບ 7 ທ່ານ ຍິງ 1 ທ່ານ ມີນັກສຳມະນະກອນມີ 47 ທ່ານ ຍິງ 19 ທ່ານ ຫຼັກສຸດການຮຽນທັງໝົດມີ 37 ວິຊາຮຽນ, 30 ໝ່ວຍກິດ, 450 ຊົ່ວໂມງ, 1 ໝ່ວຍກິດເທົ່າກັບ 15 ຊົ່ວໂມງ. ຈຸດປະສົງ ເປີດການຮຽນ-ການສອນກົດໝາຍຊັ້ນຕົ້ນລະບົບ 3 ເດືອນ ໃຫ້ແກ່ພະນັກງານຫຼັກແຫຼ່ງຂັ້ນແຂວງ ແລະ ເມືອງ ຜົ້ງສາລີ ຊຸດທີ 1 ແມ່ນການລວບລວມເອົາບັນດາກົດໝາຍທີ່ສອດຄ່ອງກັບສະພາບທ້ອງຖື່ນ ແລະ ເປັນພື້ນຖານໃນການເຮັດໜ້າທີ່ຊີ້ນຳ-ນຳພາຄຸ້ມຄອງລັດ-ຄຸ້ມຄອງເສດຖະກິດ-ສັງຄົມໃຫ້ມີຄວາມສອດຄ່ອງກົມກຽວ ແລະ ໄປຕາມລັດຖະທຳມະມຸນ ແລະ ກົດໝາຍຊື່ງເປັນພື້ນຖານອັນສຳຄັນໃຫ້ແກ່ການສ້າງລັດໃຫ້ກາຍເປັນລັດທີ່ປົກຄອງດ້ວຍລະບຽບກົດໝາຍ ແລະ ເພື່ອເປັນການຍົກລະດັບຄວາມຮູ້ຄວາມສາມາດທາງດ້ານກົດໝາຍທີ່ເປັນລະບົບພື້ນຖານໃຫ້ແກ່ພະນັກງານຫຼັກແຫຼ່ງຂັ້ນແຂວງ ແລະ ເມືອງ.
ພາບ-ຂ່າວ ທອງວັນ ສີສະຫວັນ
ປະເພດຂ່າວ: