ເມືອງ ວັງວຽງ ເປີດການຮຽນ-ການສອນກົດໝາຍໄລຍະສັ້ນ 45 ວັນ.

          ໃນຕອນເຊົ້າຂອງວັນທີ 12 ກຸມພາ 2021 ຢູ່ເມືອງ ວັງວຽງ ແຂວງ ວຽງຈັນ ໄດ້ເປີດຊຸດຝຶກອົບຮົມກົດໝາຍໄລຍະສັ້ນລະບົບ 45 ວັນຊຸດທີ II ຂຶື້ນທີ່ສະໂມສອນກຸ່ມບ້ານ ນາມອນ ໂດຍການເປັນປະທານຂອງ ທ່ານ ນາງ ຈັນສອນ ກົງດາລາ ຮອງຫົວໜ້າພະແນກຍຸຕິທຳແຂວງ ວຽງຈັນ ມີທ່ານ ອຸດາລອນ ໄຫຼໄຊຊະນະ ຫົວໜ້າຫ້ອງການຍຸຕິທຳເມືອງ ວັງວຽງ, ມີຄະນະຮັບຜິດຊອບຂັ້ນເມືອງ, ມີຄູຝຶກ ແລະ ຜູ້ເຂົ້າຮ່ວມຝຶກອົມຮົມເຂົ້າຮ່ວມ.
อาจเป็นรูปภาพของ 6 คน และผู้คนกำลังยืน
          ໃນພິທີ ທ່ານ ອຸດາລອນ ໄຫຼໄຊຊະນະ ໄດ້ລາຍງານການກະກຽມຄວາມພ້ອມໃນການເປີດເຝິກອົບຮົມໂດຍສະເພາະແມ່ນໄດ້ກະກຽມສະຖານທີ່, ຄູຝຶກ, ຜູ້ເຂົ້າຮ່ວມຝິກອົບຮົມ, ເອກະສານຄູ່ມື ແລະ ອຸປະກອນຕ່າງໆເພື່ອຮັບໃຊ້ເຂົ້າໃນການຝຶກອົບຮົມ, ການເປີດຊຸດຝຶກອົບຮົມກົດໝາຍໃນຄັ້ງນີ້ແມ່ນເນັ້ນໃສ່ເປົ້າໝາຍທີ່ຂັ້ນເທິງໄດ້ກຳນົດໃຫ້ເຊັ່ນ ເລຂາພັກບ້ານ, ນາຍບ້ານ,​ ຮອງນາຍບ້ານ, ປກສ-ປກຊ, ເລຂາຊາວໜຸ່ມ, ສະຫະພັນແມ່ຍິງ, ອົງການຈັດຕັ້ງມະຫາຊົນ, ມີຜູ້ເຂົ້າຮ່ວມຝຶກອົບຮົມທັງໝົດ 60 ທ່ານ; ຍິງ 12 ທ່ານ, ມາຈາກ 2 ກຸ່ມບ້ານຄື: ກຸ່ມບ້ານນາມອນ 13 ບ້ານ ແລະ ກຸ່ມບ້ານທ່າເຮືອ 6 ບ້ານ; ມີຄູຝຶກ 29 ທ່ານ, ຍິງ 3 ທ່ານ, ມີ 34 ວິຊາ, ມີ 22,5 ໜ່ວຍກິດ, ມີ 360 ຊົ່ວໂມງ. ຈາກນັ້ນ ທ່ານ ນາງ ຈັນສອນ ກົງດາລາ ຮອງຫົວໜ້າພະແນກຍຸຕິທຳແຂວງ ວຽງຈັນ ກໍໄດ້ກ່າວເປີດພິທີ ແລະ ໄດ້ມີຄຳເຫັນໂອ້ລົມຕໍ່ຜູ້ເຂົ້າຮ່ວມຝຶກອົບຮົມຄັ້ງນີ້ວ່າ: ແມ່ນເພື່ອເປັນການຍົກລະດັບຄວາມຮູ້ທາງດ້ານກົດໝາຍໃຫ້ແກ່ພະນັກງານຫຼັກແຫຼ່ງຮາກຖານຂັ້ນບ້ານຂອງເມືອງ ແລະ ເພື່ອນຳໄປຈັດຕັ້ງຜັນຂະຫຍາຍ ແລະ ໝູນໃຊ້ເຂົ້າໃນວຽກງານທີ່ຕົນຮັບຜິດຊອບໃຫ້ຖືກຕ້ອງສອດຄ່ອງຕາມກົດໝາຍ ແລະ ລະບຽບການ ແນ່ໃສ່ການສ້າງລັດໃຫ້ເປັນລັດທີ່ປົກຄອງດ້ວຍກົດໝາຍເທື່ອລະກ້າວ. ພ້ອມດຽວກັນນັ້ນທ່ານ ຍັງຮຽກຮ້ອງໃຫ້ຄູຝຶກຈົ່ງພ້ອມກັນຖ່າຍທອດຄວາມຮູ້ຄວາມສາມາດໃຫ້ນັກຝຶກອົບຮົມດ້ວຍຮູບແບບການບັນຍາຍເອກະສານທັງເປັນການປຶກສາຫາລືແລກປ່ຽນສົນທະນາດ້ວຍການຍົກພຶດຕິກຳຕົວຈິງໃຫ້ຫຼາຍເພື່ອໃຫ້ນັກຝຶກອົບຮົມໄດ້ນຳໃຊ້ບົດຕົວຈິງເຂົ້າໃນການຈັດຕັ້ງປະຕິບັດໜ້າທີ່ວຽກງານ ໃຫ້ມີປະສິດທິພາບຫຼາຍຂຶ້ນກວ່າເກົ່າ ສ່ວນນັກຝຶກອົບຮົມໃຫ້ເອົາໃຈໃສ່ຄົ້ນຄວ້າຮ່ຳຮຽນ, ຝຶກຝົນຫຼໍ່ຫຼອມຕົນເອງທາງດ້ານແນວຄິດ, ວິຊາສະເພາະທີ່ຂັ້ນເທິງມອບໝາຍໃຫ້ມີຜົນສຳເລັດຕາມລະດັບຄາດໝາຍ.
ຂຽນຂ່າວ-ຖ່າຍພາບ: ພະແນກຍຸຕິທຳແຂວງ ວຽງຈັນ