ແຂວງ ຫຼວງນຳ້ທາ ປະກາດບ້ານແບບຢ່າງປະຕິບັດກົດໝາຍທີ່ ເມືອງ ຫຼວງນໍ້າທາ

          ໃນຕອນເຊົ້າ ຂອງວັນທີ 30 ມິນາ 2021 ທີ່ຜ່ານມາ ຢູ່ທີ່ ບ້ານ ນໍ້າຍາງ ເມືອງ ຫຼວງນໍ້າທາ ແຂວງ ຫຼວງນໍ້າທາ ໄດ້ຈັດພິທີປະກາດບ້ານແບບຢ່າງປະຕິບັດກົດໝາຍຂຶ້ນ ໂດຍການເປັນປະທານຮ່ວມຂອງ ທ່ານ ຫຼ້າປະເສີດ ສີປະເສີດ ກໍາມະການປະຈໍາພັກແຂວງ ເລຂາພັກເມືອງ ເຈົ້າເມືອງ ຫຼວງນໍ້າທາ ແລະ ທ່ານ ຄໍາເຜີຍ ບຸດດີ ຫົວໜ້າຫ້ອງການຍຸຕິທໍາເມືອງ ຫຼວງນໍ້າທາ. ມີຫົວໜ້າຫ້ອງ, ຮອງຫົວໜ້າຫ້ອງການພາຍໃນເມືອງ , ຄະນະພັກຮາກຖານບ້ານ, ຄະນະແກ້ໄຂຂໍ້ຂັດແຍ່ງຂັ້ນບ້ານ, ແຂກຖືກເຊີນ ພໍ່,ແມ່ ປະຊາຊົນພາຍໃນບ້ານ ແລະ ພະນັກງານ-ລັດຖະກອນ ຫ້ອງການຍຸຕິທໍາເມືອງ ເຂົ້າຮ່ວມທັງໝົດ 174 ທ່ານ, ຍິງ 28 ທ່ານ.
          ທ່ານ ຄໍາເຜີຍ ບຸດດີ ຫົວໜ້າຫ້ອງການຍຸຕິທໍາເມືອງ ໄດ້ຂຶ້ນຜ່ານບົດປະເມີນ ມາດຖານຄອບຄົວແບບຢ່າງປະຕິບັດກົດໝາຍ ແລະ ຜົນຂອງການເຄື່ອນໄຫວຈັດຕັ້ງປະຕິບັດວຽກງານ ໃນໄລຍະຜ່ານມາກ່ຽວກັບການສ້າງຄອບຄົວ ຕາມເງື່ອນໄຂ ແລະ ມາດຕະຖານທີ່ທາງກະຊວງຍຸຕິທໍາວາງອອກ. ຈຸດປະສົງ ກໍເພື່ອສ້າງພື້ນຖານໃຫ້ແກ່ ການຄຸ້ມຄອງລັດ, ຄຸ້ມຄອງສັງຄົມ ດ້ວຍລັດຖະທໍາມະນູນ ແລະ ກົດໝາຍໂດຍສະເພາະແມ່ນການຄຸ້ມຄອງ ແລະ ການບໍລິຫານບ້ານໃຫ້ເຄື່ອນໄຫວຕາມກົດໝາຍໄດ້ກໍານົດໄວ້.
          ໃນຕອນທ້າຍ ທ່ານ ຫຼ້າປະເສີດ ສີປະເສີດ ກໍາມະການປະຈໍາພັກແຂວງ ເລຂາພັກເມືອງ ເຈົ້າເມືອງ ຫຼວງນໍ້າທາ ໄດ້ມີຄໍາເຫັນໂອ້ລົມ ທ່ານ ໄດ້ຍ້ອງຍໍຊົມເຊີຍຕໍ່ຜົນງານຂອງບ້ານ ທີ່ຍາດແຍ່ງມາໄດ້ໃນໄລຍະຜ່ານມາ ແລະ ໄດ້ເນັ້ນໜັກບາງຈຸດທີ່ຕ້ອງໄດ້ປັບປຸງຄືນ ການທີ່ຈະກ້າວຂຶ້ນມາເປັນບ້ານແບບຢ່າງປະຕິບັດກົດໝາຍນີ້ ເປັນວຽກງານໜຶ່ງ ທີ່ນອນຢູ່ໃນຂະບວນການກໍ່ສ້າງຮາກຖານການເມືອງ ແລະ ນໍາເອົາຄວາມສະຫງົບ, ຄວາມເປັນລະບຽບຮຽບຮ້ອຍ, ຄວາມຍຸຕິທໍາ ແລະ ຄວາມສີວິໄລ ມາສູ່ສັງຄົມ ໂດຍເລີ່ມຈາກຄອບຄົວ ແລະ ບ້ານເປັນພື້ນຖານ ກ້າວໄປເຖິງການສ້າງລັດ ສປປ ລາວ ໃຫ້ກາຍເປັນລັດທີ່ປົກຄອງດ້ວຍກົດໝາຍເທື່ອລະກ້າວ ແລະ ຕ້ອງໄດ້ຮັກສາມູນເຊື້ອຄວາມສາມັກຄີ ການເຄົາລົບປະຕິບັດກົດໝາຍຢ່າງເຂັ້ມງວດ, ຂໍ້ຂັດແຍ່ງຕ່າງໆພາຍໃນບ້ານຕ້ອງໄດ້ຮັບການໄກ່ເກັ່ຍ ແລະ ແກ້ໄຂຕາມຂັ້ນຕອນຂອງກົດໝາຍ.
ພາບ-ຂ່າວໂດຍ: ສຸມີໄຊ ວົງຕະສີ