ກຳມະບານຮາກຖານ ພະແນກຍຸຕິທຳແຂວງ ອັດຕະປື ເປີດກອງປະຊຸມປະເມີນ ແລະ ສະຫຼຸບຜົນການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ປະຈຳປີ 2020

ໃນຕອນເຊົ້າ ຂອງວັນທີ 29 ກັນຍາ 2020 ທີ່ຜ່ານມາ ຮາກຖານກຳມະບານພະແນກຍຸຕິທຳແຂວງ ອັດຕະປື ໄດ້ເປີດກອງປະຊຸມສະຫຼຸບການເຄື່ອນໄຫວວຽກງານ ແລະ ປະເມີນຂໍ້ແຂ່ງຂັນ 5 ເປັນເຈົ້າ ປະຈຳປີ 2020 ແລະ ວາງທິດທາງປະຈຳປີ 2021 ຂຶ້ນ ຢູ່ທີ່ຫ້ອງປະຊຸມຂອງພະແນກຍຸຕິທຳແຂວງ ໂດຍໃຫ້ກຽດເປັນປະທານຂອງ ສະຫາຍ ຄຳຫຼ້າ ແກ້ວວັນສອນ ເລຂາໜ່ວຍພັກ ຫົວໜ້າພະແນກຍຸຕິທຳແຂວງ ປະທານຮາກຖານກຳມະບານ ແລະ ສະມາຊິກກຳມະບານຂອງພະແນກຍຸຕິທຳເຂົ້າຮ່ວມຢ່າງພ້ອມພຽງ.
ໃນພິທີ ສະຫາຍ ວັນນະເລດ ວິໄລພົນ ກຳມະການໜ່ວຍພັກ ຮອງຫົວໜ້າພະແນກຍຸຕິທຳແຂວງ ຜູ້ຊີ້ນຳວຽກງານອົງການຈັດຕັ້ງມະຫາຊົນ ໄດ້ຂຶ້ນຜ່ານບົດແນະນຳການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ຂອງສະຫະພັນກຳມະບານແຂວງ ເລກທີ 04/ສກຂ, ລົງວັນທີ 19 ຕຸລາ 2016. ພ້ອມດຽວກັນນີ້ ສະຫາຍ ສິລິສັກ ພົງສະຫວັດ ຮອງປະທານຮາກຖານກຳມະບານພະແນກຍຸຕິທຳ ກໍໄດ້ຂຶ້ນຜ່ານບົດສະຫຼຸບຕີລາຄາການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ປີ 2020 ແລະ ໄດ້ຜ່ານແຜນການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ ປະຈຳປີ 2021, ໃນກອງປະຊຸມ ສະມາຊິກກຳມະບານກໍໄດ້ປະກອບຄຳຄິດຄຳເຫັນໃສ່ຮ່າງບົດສະຫຼຸບ ແລະ ທິດທາງແຜນການໃນຕໍ່ໜ້າດ້ວຍຄວາມຮັບຜິດຊອບສູງ. ພ້ອມກັນນັ້ນ ກອງປະຊຸມໄດ້ເອກະພາບຮັບຮອງເອົາບົດສະຫຼຸບ ແລະ ທິດທາງແຜນການ ປີ 2021. ໃນຂະນະດຽວກັນນີ້ກໍ່ໄດ້ມີການປະເມີນຜົນບຸກຄົນ ແລະ ກົມກອງລວມໝູ່ປະຈຳປີ 2020.

ໃນຕອນທ້າຍຂອງກອງປະຊຸມຍັງໄດ້ຮັບຟັງການໂອ້ລົມ ຂອງສະຫາຍ ຄຳຫຼ້າ ແກ້ວວັນສອນ ເລຂາໜ່ວຍພັກ ຫົວໜ້າພະແນກຍຸຕິທຳ ປະທານຮາກຖານກຳມະບານ ຊຶ່ງທ່ານໄດ້ຍ້ອງຍໍຊົມເຊີຍຕໍ່ຜົນງານຂອງສະມາຊິກກຳມະບານແຕ່ລະສະຫາຍທີ່ສາມາດຍາດມາໄດ້ໃນໄລຍະຜ່ານມາ. ໃນນັ້ນ, ທ່ານກໍໄດ້ເນັ້ນໜັກໃຫ້ແຕ່ລະສະຫາຍໃຫ້ເອົາໃຈໃສ່ຮັກສາມູນເຊື້ອ, ເຕົ້າໂຮມຄວາມສາມັກຄີ, ສຶກສາອົບຮົມການເມືອງ-ແນວຄິດໃຫ້ສະມາຊິກພາຍໃນໜ່ວຍຂອງຕົນຢ່າງເປັນປົກກະຕິ, ນຳເອົາບັນດາມະຕິຕົກລົງ ແລະ ນິຕິກຳຕ່າງໆ ໄປຈັດຕັ້ງຜັນຂະຫຍາຍເປັນແຜນວຽກຂອງຕົນໃຫ້ລະອຽດ, ຖືສຳຄັນເອົາການເຊື່ອມຊຶມແນວທາງການເມືອງຢ່າງເປັນປົກກະຕິ ແລະ ເພີ່ມທະວີສ້າງຂະບວນການແຂ່ງຂັນ 5 ເປັນເຈົ້າຂອງກຳມະບານ ຕິດພັນກັບຂະບວນແຂ່ງຂັນຮັກຊາດ ແລະ ໃຫ້ປາກົດຜົນເປັນຈິງເທື່ອລະກ້າວ.

ຂຽນຂ່າວ: ທົງໄຊ ຈຳສີນ.
ຖ່າຍພາບ: ທິດເທວາ ຄົມມາລາ.

ປະເພດຂ່າວ: