ຄະນະໜ່ວຍຊາວໜຸ່ມ ພະແນກຍຸຕິທຳແຂວງ ອັດຕະປື ຮັບນາມມະຍົດ 4 ບຸກ.

ໃນວັນທີ 9 ທັນວາ 2020 ທີ່ຜ່ານມານີ້, ຄະນະໜ່ວຍຊາວໜຸ່ມປະຊາຊົນ ປະຕິວັດລາວ ພະແນກຍຸຕິທຳແຂວງ ອັດຕະປື ໄດ້ຈັດພິທີ ມອບ-ຮັບ ໃບຢັ້ງຢຶນ 4 ບຸກ ຄັ້ງທີ III ຂຶ້ນຢູ່ທີ່ສະໂມສອນພະແນກຍຸຕິທຳ. ພາຍໃຕ້ການເປັນປະທານຂອງ ສະຫາຍ ວິໄລ ໄຊຍະວົງສາ ຄະນະບໍລິຫານງານຊາວໜຸ່ມແຂວງ, ເລຂາໜ່ວຍຊາວໜຸ່ມພະແນກຍຸຕິທຳແຂວງ. ໃຫ້ກຽດເຂົ້າຮ່ວມໂດຍ: ສະຫາຍ ຄຳພາສີ ເວັນມະສອນ ຮອງເລຂາຄະນະບໍລິຫານງານຊາວໜຸ່ມແຂວງ, ມີສະຫາຍ ຄຳຫຼ້າ ແກ້ວວັນສອນ ຫົວໜ້າພະແນກຍຸຕິທຳແຂວງ, ມີແຂກຖືກເຊີນ, ພ້ອມດ້ວຍສະມາຊິກຊາວໜຸ່ມເຂົ້າຮ່ວມ 23 ສະຫາຍ, ຍິງ 9 ສະຫາຍ.

ສະຫາຍ ວິໄລ ໄຊຍະວົງສາ ຄະນະບໍລິຫານງານຊາວໜຸ່ມແຂວງ, ເລຂາໜ່ວຍຊາວໜຸ່ມ ພະແນກຍຸຕິທຳແຂວງ. ໄດ້ຜ່ານບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 4 ບຸກ ປະຈຳປີ 2020. ຊຶ່ງສະຫາຍໄດ້ລາຍງານເຖິງສະພາບລວມຂອງຄະນະໜ່ວຍຊາວໜຸ່ມ ຍາມໃດກໍໄດ້ເອົາໃຈໃສ່ຕໍ່ວຽກງານສຶກສາອົບຮົມການເມືອງ-ແນວຄິດ, ໃນການປະຕິບັດວຽກງານທີ່ພັກ-ລັດ ມອບໝາຍໃຫ້ດ້ວຍຄວາມຮັບຜິດຊອບສູງ. ໜ່ວຍຊາວໜຸ່ມພະແນກຍຸຕິທໍາແຂວງ ອັດຕະປື ມີສະມາຊິກຊາວໜຸ່ມທັງໝົດ 21 ສະຫາຍ, ຍິງ 8 ສະຫາຍ. ຕໍ່ກັບວຽກງານຂະບວນການຄະນະໜ່ວຍຊາວໜຸ່ມຍັງໄດ້ເອົາໃຈໃສ່ຢ່າງຕັ້ງໜ້າ ນຳພາສະມາຊິກຊາວໜຸ່ມສ້າງຂະບວນການເພື່ອຊອກແຫຼ່ງລາຍຮັບຊ່ວຍເຫຼືອຊຶ່ງກັນ ແລະ ກັນ ດ້ວຍຮູບການຕ່າງໆທີ່ຖືກຕ້ອງກົດໝາຍຢ່າງເປັນຂະບວນຟົດຟື້ນ.

ຜ່ານການປະເມີນສົມທຽບກັບມາດຖານໃນແຕ່ລະດ້ານສາມາດປະຕິບັດໄດ້ຄື: ດ້ານແນວຄິດບຸກໄດ້ 90 %, ດ້ານການຝຶກຝົນຫຼໍ່ຫຼອມຮ່ຳຮຽນບຸກໄດ້ 90,4 %, ດ້ານການປັບປຸງການຈັດຕັ້ງບຸກໄດ້ 90 % ແລະ ດ້ານວິຊາຊີບສ້າງວຽກເຮັດງານທຳບຸກໄດ້ 90,3 %. ຕໍ່ຜົນການປະເມີນແຕ່ລະດ້ານເຫັນວ່າສາມາດປະຕິບັດໄດ້ລື່ນຄາດໝາຍທີ່ແຜນການໄດ້ວາງໄວ້ ຈຶ່ງໄດ້ປະກາດມອບນາມມະຍົດເປັນຄະນະໜ່ວຍຊາວໜຸ່ມຕາມເນື້ອໃນຂໍ້ແຂ່ງຂັນ 4 ບຸກ ແລະ ໄດ້ຜ່ານທິດທາງແຜນການ ໃນປີຕໍ່ໜ້າ ຈາກນັ້ນ, ກໍມອບໃບຢັ້ງຢືນນາມມະຍົດໜ່ວຍຊາວໜຸ່ມ 4 ບຸກ ຄັ້ງທີ III. ໃຫ້ກຽດຂຶ້ນມອບໂດຍສະຫາຍ ຄຳພາສີ ເວັນມະສອນ ຮອງເລຂາຄະນະບໍລິຫານງານຊາວໜຸ່ມແຂວງ ອັດຕະປື.

ຂ່າວໂດຍ: ທົງໄຊ ຈຳສິນ

ຖ່າຍພາບ: ທິດເທວາ ຄົມມາລາ

ປະເພດຂ່າວ: