ພະແນກຍຸຕິທຳແຂວງ ອັດຕະປື ປະເມີນ ແລະ ສະຫຼຸບການຈັດຕັ້ງປະຕິບັດວຽກງານພາຍໃນພັກໃນໜຶ່ງປີຜ່ານມາ

ໃນວັນທີ 24-25 ພະຈິກ 2020 ຜ່ານມານີີ້ ໜ່ວຍພັກພະແນກຍຸຕິທຳແຂວງ ອັດຕະປື ໄດ້ຈັດກອງປະຊຸມປະເມີນສະມາຊິກພັກ ແລະ ໜ່ວຍພັກປະຈຳປີ 2020 ຂື້ນ ທີ່ຫ້ອງປະຊຸມພະແນກຍຸຕິທຳແຂວງ ໂດຍການເປັນປະທານຂອງ ສະຫາຍ ຄຳຫຼ້າ ແກ້ວວັນສອນ ເລຂາໜ່ວຍພັກພະແນກຍຸຕິທຳແຂວງ ອັດຕະປື ມີຄະນະພັກ ແລະ ສະມາຊິກພັກເຂົ້າຮ່ວມ.

ສະຫາຍ ວິໄລ ໄຊຍະວົງສາ ຫົວໜ້າຂະແໜງຈັດຕັ້ງພະນັກງານ ແລະ ກວດກາ ໄດ້ຂຶ້ນຜ່ານບົດສະຫຼຸບການເຄື່ອນໄຫວຈັດຕັ້ງປະຕິບັດວຽກງານພາຍໃນພັກ ປະຈຳປີ 2020 ແລະ ທິດທາງແຜນການປະຈຳປີ 2021. ຈາກນັ້ນ, ສະຫາຍ ຄຳຫຼ້າ ແກ້ວວັນສອນ ໄດ້ໃຫ້ກຽດຂຶ້ນຜ່ານຄຳເເນະນຳ ເລກທີ 60/ຄຈຂ, ລົງວັນທີ 29 ພຶດສະພາ 2018 ວ່າດ້ວຍການເພີ່ມທະວີ ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ. ກອງປະຊຸມໄດ້ຜ່ານບົດສຳຫຼວດຕົນເອງຂອງສະມາຊິກພັກ ພ້ອມທັງປະກອບຄຳຄິດຄຳເຫັນ, ຕໍານິສົ່ງຂ່າວຊຶ່ງກັນ ແລະ ກັນ ເພື່ອປັບປຸງແກ້ໄຂໃນຕໍ່ໜ້າ ຕາມ 5 ເນື້ອໃນ ຄື: ດ້ານຄຸນທາດການເມືອງ, ດ້ານແນວຄິດ, ດ້ານສະຕິຕໍ່ການຈັດຕັ້ງ ແລະ ລະບຽບວິໄນຂອງພັກ, ດ້ານແບບແຜນ ແລະ ວິທີເຮັດວຽກ, ຄວາມຮັບຜິດຊອບຕໍ່ໜ້າທີ່ການເມືອງ. ຜ່ານການປະເມີນ ເຫັນວ່າມີສະມາຊິກພັກແຂງ ຈຳນວນ 14 ສະຫາຍ, ຍິງ 5 ສະຫາຍ ເທົ່າກັບ 87,5%, ກາງ 2 ສະຫາຍ ຍິງ 1 ສະຫາຍ ເທົ່າກັບ 12,5 % ແລະ ໜ່ວຍພັກ ປະເມີນໄດ້ 92,51 % ຈັດປະເພດເປັນໜ່ວຍພັກແຂງ.

ຕອນທ້າຍກອງປະຊຸມ ສະຫາຍ ເລຂາໜ່ວຍພັກ ກໍໄດ້ມີຄຳເຫັນ ໂອ້ລົມຕໍ່ກອງປະຊຸມ ໂດຍເນັ້ນໜັກໃຫ້ສະມາຊິກພັກທຸກສະຫາຍ ຈົ່ງໄດ້ເອົາໃຈໃສ່ປັບປຸງ ແກ້ໄຂຈຸດອ່ອນ, ຂໍ້ຄົງຄ້າງ ຂອງຕົນເອງ ແລະ ເສີມຂະຫຍາຍດ້ານຕັ້ງໜ້າ ເພື່ອເຮັດສໍາເລັດໜ້າທີ່ການເມືອງທີ່ພັກ ແລະ ລັດມອບໝາຍໃຫ້ ດ້ວຍຄວາມຮັບຜິດຊອບສູງ ແລະ ສູ້ຊົນ ໃຫ້ໜ່ວຍພັກພະແນກຍຸຕິທຳ ໄດ້ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນໃນປີຕໍ່ໄປ.

ຂຽນຂ່າວ-ຖ່າຍພາບ: ທົງໄຊ ຈຳສິນ

ປະເພດຂ່າວ: