ຫ້ອງການຍຸຕິທຳເມືອງ ພູວົງ ເປີດຝືກອົມຮົມກົດໝາຍໄລຍະສັ້ນ 45 ວັນ ໃຫ້ຮາກຖານບ້ານ ຊຸດທີ II

          ໃນຕອນບ່າຍ ວັນທີ 27 ມັງກອນ 2021 ທີ່ຜ່ານມາ, ຫ້ອງການຍຸຕິທຳເມືອງ ພູວົງ ແຂວງ ອັດຕະປື ໄດ້ຈັດພິທີເປີດຊຸດຝືກຮົມກົດໝາຍໄລຍະສັ້ນ 45 ວັນ ຂຶ້ນທີ່ບ້ານ ສົມບູນ. ໃຫ້ກຽດເປັນປະທານ ຂອງທ່ານ ຄຳຊຽງ ພິມມະຈັນ ຄະນະປະຈຳພັກເມືອງ ຮອງເຈົ້າເມືອງ ພູວົງ ທັງເປັນຜູ້ຊີ້ນຳວຽກງານຂົງເຂດວັດທະນະທຳ-ສັງຄົມ, ໃຫ້ກຽດເຂົ້າຮ່ວມມີທ່ານ ຄຳຫຼ້າ ແກ້ວວັນສອນ ເລຂາໜ່ວຍພັກ ຫົວໜ້າພະແນກຍຸຕິທຳແຂວງ, ທ່ານ ວັນນະສັກ ວິໄລເນືອງ ຫົວໜ້າຫ້ອງການຍຸຕິທຳເມືອງ ພູວົງ, ມີບັນດາຄະນະປະຈຳ, ຄະນະພັກ ຫົວໜ້າຂະແໜງ, ຫົວໜ້າ ແລະ ຮອງຫົວໜ້າຫ້ອງການອ້ອມຂ້າງເມືອງ, ຫົວໜ້າ ແລະ ຮອງກອງບັນຊາການ ປກຊ-ປກສ ແລະ ຜູ້ເຂົ້າຮ່ວມຝຶກອົບຮົມທີ່ມາຈາກບ້ານ ສົມບູນເຂົ້າຮ່ວມຢ່າງພ້ອມພຽງ.

          ໃນພິທີ ທ່ານ ບຸນໂຮມ ພົມມະຈັນ ຮອງຫົວໜ້າຫ້ອງການຍຸຕິທຳເມືອງ ໄດ້ຜ່ານຂໍ້ຕົກລົງຂອງທ່ານເຈົ້າເມືອງ ວ່າດ້ວຍການອະນຸມັດເປີດຊຸດຝືກອົບຮົມກົດໝາຍໄລຍະສັນ 45 ວັນ ໃຫ້ແກ່ຮາກຖານບ້ານ ຮຸ່ນທີ II ປະຈຳສົກປີ 2021, ຂໍ້ຕົກລົງ ວ່າດ້ວຍການແຕ່ງຕັ້ງຊຸດຝືກອົບຮົມກົດໝາຍໄລຍະສັ້ນ 45 ວັນ ໃຫ້ແກ່ຮາກຖານບ້ານ ຮຸ່ນທີ II ປະຈຳສົກປີ 2021, ຂໍ້ຕົກລົງ ວ່າດ້ວຍການອະນຸມັດລາຍຊື່ຜູ້ເຂົ້າຮ່ວມຝືກອົບຮົມກົດໝາຍໄລຍະສັ້ນ 45 ວັນ ໃຫ້ແກ່ຮາກຖານບ້ານ ຮຸ່ນທີ II ປະຈຳສົກປີ 2021 ມີ ຈຳນວນທັງໝົດ 53 ຄົນ ຍິງ 7 ຄົນ. ຈາກນັ້ນ, ທ່ານ ວັນນະສັກ ວິໄລເນືອງ ຫົວໜ້າຫ້ອງການຍຸຕິທຳເມືອງ ພູວົງ ໄດ້ຂື້ນຜ່ານການຈັດຕັ້ງປະຕິບັດຝືກອົບຮົມກົດໝາຍໄລຍະສັ້ນ 45 ວັນ; ໃນພິທີດັ່ງກ່າວ, ທ່ານ ຄຳຫຼ້າ ແກ້ວວັນສອນ ເລຂາໜ່ວຍພັກ ຫົວໜ້າພະແນກຍຸຕິທຳແຂວງ ໄດ້ມີຄຳເຫັນບາງບັນຫາທີ່ສຳຄັນ ທ່ານຍັງໄດ້ເນັ້ນໜັກໃຫ້ເອົາໃຈໃສ່ຕໍ່ວຽກງານຍຸຕິທຳຮາກຖານ ເປັນຕົ້ນວຽກງານສ້າງບຸກຄະລາກອນກົດໝາຍໃຫ້ແກ່ຮາກຖານບ້ານ, ວຽກງານປັບປຸງຄະນະແກ້ໄຂຂໍ້ຂັດແຍ່ງຂັ້ນບ້ານ, ວຽກງານສ້າງຄອບຄົວ ແລະ ບ້ານແບບຢ່າງປະຕິບັດກົດໝາຍ ແລະ ວຽກງານຍຸຕິທຳເດັກ.

          ໃນພິທີ ທ່ານ ຄຳຊຽງ ພິມມະຈັນ ຄະນະປະຈຳພັກເມືອງ ຮອງເຈົ້າເມືອງ ພູວົງ ໄດ້ມີຄຳເຫັນໂອ້ລົມຕໍ່ກອງປະຊຸມ ຕໍ່ກັບບັນດາທ່ານທີ່ຖືກແຕ່ງຕັ້ງ ແລະ ຜູ້ເຂົ້າຮ່ວມທີ່ເຂົ້າຮ່ວມທຸກທ່ານ ຕ້ອງເອົາໃຈໃສ່ປະຕິບັດໜ້າທີ່ຂອງຕົນ ຕາມແນວທາງຂອງພັກ-ລັດ ມອບໝາຍເຮັດໃຫ້ພັກນັກງານອ້ອມຂ້າງເມືອງ ແລະ ຮາກຖານບ້ານໃຫ້ມີຄວາມຮູ້ພື້ນຖານທາງດ້ານກົດໝາຍ ແລະ ຮູ້ເຕັກນິກໃນການແຕ່ງເອກະສານທາງລັດຖະການ.

ຂຽນຂ່າວ ແລະ ຖ່າຍພາບໂດຍ : ທົງໄຊ ຈຳສິນ