ພະແນກຍຸຕິທຳແຂວງ ອຸດົມໄຊ ເຊື່ອມຊຶມ ແລະ ຈັດຕັ້ງຜັນຂະຫຍາຍເອກະສານວາລະແຫ່ງຊາດ

Primary tabs

          ໃນຕອນເຊົ້າ ວັນທີ 22 ທັນວາ 2021 ຜ່ານມາ ທີ່ຫ້ອງປະຊຸມຂອງພະແນກຍຸຕິທຳແຂວງ ອຸດົມໄຊ ໄດ້ຈັດກອງປະຊຸມເຊື່ອມຊຶມ ແລະ ຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ- ການເງີນ ແລະ ແກ້ໄຂບັນຫາຢາເສບຕິດ ໂດຍການເປັນປະທານຂອງ ທ່ານ ສອນສຸວັນ ປັນຍາວົງ ກຳມະການພັກແຂວງ ຫົວໜ້າພະແນກຍຸຕິທຳແຂວງ, ມີຮອງເລຂາໜ່ວຍພັກ ຮອງຫົວໜ້າພະແນກ, ມີບັນດາຫົວໜ້າ - ຮອງຫົວໜ້າຂະແໜງ ແລະ ພະນັກງານວິຊາການພະແນກຍຸຕິທຳແຂວງ ເຂົ້າຮ່ວມ.
          ກອງປະຊຸມ ຜູ້ເຂົ້າຮ່ວມໄດ້ຮັບຟັງການຜ່ານເນື້ອໃນເອກະສານທີ່ສຳຄັນເປັນຕົ້ນແມ່ນເນື້ອໃນ ຄຳສັ່ງຂອງກົມການເມືອງ ສູນກາງພັກ ວ່າດ້ວຍການເພີ່ມທະວີການນຳພາ ຊີ້ນຳຂອງຄະນະພັກແຕ່ລະຂັ້ນ ໃນການຈັດຕັ້ງປະຕິບັດມາດຕະການແກ້ໄຂຄວາມຫຍຸ້ງຍາກດ້ານເສດຖະກິດ-ການເງີນ, ຂໍ້ຕົກລົງຂອງທ່ານເຈົ້າແຂວງວ່າດ້ວຍການຈັດຕັ້ງປະຕິບັດວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງີນ ແຕ່ປີ 2021-2023, ຮັບຟັງວາລະແກ້ໄຂບັນຫາຢາເສບຕິດ ແລະ ເອກະສານອື່ນໆອີກຈຳນວນໜຶ່ງ, ມີຂໍ້ຕົກລົງຂອງທ່ານຫົວໜ້າພະແນກຍຸຕິທຳແຂວງ ວ່າດ້ວຍການແຕ່ງຕັ້ງຄະນະຮັບຜິດຊອບຈັດຕັ້ງ ແລະ ຜັນຂະຫຍາຍ ສອງວາລະແຫ່ງຊາດແຕ່ ປີ 2021-2023.
          ໃນນັ້ນ ຜູ້ເຂົ້າຮ່ວມກອງປະຊຸມ ກໍໄດ້ພ້ອມກັນຍົກສູງຄວາມຮັບຜິດຊອບຂອງຕົນຄົ້ນຄວ້າ ເຊື່ອມຊຶມ ປະກອບຄຳຄິດຄຳເຫັນໃສ່ບັນຫາສຳຄັນຕ່າງໆເພື່ອໃຫ້ສາມາດກຳນົດໄດ້ເນື້ອໃນຄວາມໝາຍສຳຄັນໃຫ້ເລິກເຊີ່ງ ເປັນເອກະພາບສູງຕໍ່ເນື້ອໃນ ແລະ ວິທີຈັດຕັ້ງປະຕິບັດສອງວາລະດັ່ງກ່າວເພື່ອນຳໄປຈັດຕັ້ງປະຕິບັດໃນຂະແໜງການ ແລະ ຄວາມຮັບຜິດຊອບຂອງຕົນໃຫ້ປະກົດຜົນເປັນຈິງ.
ພາບ ແລະ ຂ່າວ: ສີສະຫວາດ ອິ່ນແກ້ວມະນີ
ປະເພດຂ່າວ: