ເມືອງ ຫຼາ ແຂວງ ອຸດົມໄຊ ເປີດຊຸດຝືກອົບຮົມກົດໝາຍໄລຍະສັ້ນ 45 ວັນ ໃຫ້ພະນັກງານຫຼັກແຫຼ່ງ

ຊຸດຝຶກອົບຮົມກົດໝາຍໄລຍະສັ້ນ 45 ວັນ ຊຸດທີ II ຂອງເມືອງ ຫຼາ ໄດ້ຈັດຂຶ້ນໃນ ຕອນເຊົ້າຂອງວັນທີ 9 ຕຸລາ 2020 ຢູ່ທີ່ ສະໂມສອນຂອງເມືອງ ໂດຍເປັນປະທານຮ່ວມ ຂອງທ່ານ ພັທ ສຸລີ ດວງພອນໄຊ ຄະນະປະຈຳພັກເມືອງ ຫົວໜ້າກອງບັນຊາການ ປກສ ເມືອງ ຫຼາ, ທ່ານ ສີຖານ ມະນີໄຊ ຮອງເລາຂາໜ່ວຍພັກ ຮອງຫົວໜ້າພະແນກຍຸຕິທຳແຂວງ ອຸດົມໄຊ, ມີຄະນະພັກ, ຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ, ມີພະນັກງານວິຊາການ, ແຂກຖືກເຊີນ, ຄູຝຶກ ແລະ ນັກຝຶກອົບຮົມເຂົ້າຮ່ວມຢ່າງພ້ອມພຽງ.
ທ່ານ ສົມໝາຍ ພູມມີສຸກ ຫົວໜ້າຫ້ອງການຍຸຕິທຳເມືອງ ຫຼາ ໄດ້ຂຶ້ນຜ່ານ ຂໍ້ຕົກລົງຂອງເຈົ້າເມືອງ ວ່າດ້ວຍການອະນຸມັດ ເປີດຊຸດຝຶກອົບຮົມກົດໝາຍໄລຍະສັ້ນ 45 ວັນ, ໃຫ້ພະນັກງານຫຼັກແຫຼ່ງອ້ອມຂ້າງເມືອງ ພາຍໃນເມືອງ ຫຼາ ແຂວງ ອຸດົມໄຊ ຊຸດທີ II ປະຈຳປີ 2020 ແລະ ບົດລາຍງານ ກ່ຽວກັບການກະກຽມເປີດຊຸດຝຶກອົບຮົມກົດໝາຍໃນຄັ້ງນີ້ ການເປີດຊຸດຝຶກອົບຮົມກົດໝາຍສັ້ນ 45 ວັນ,ໃນຄັ້ງນີ້ ແມ່ນເພື່ອຍົກລະດັບຄວາມຮູ້ທາງດ້ານກົດໝາຍໃຫ້ເປັນລະບົບ ເພື່ອສ້າງເງື່ອນໄຂໃຫ້ແກ່ການຄຸ້ມຄອງລັດ, ຄຸ້ມຄອງສັງຄົມດວ້ຍກົດໝາຍໃຫ້ມີປະສິດທິພາບ ແລະ ປະສິດທິຜົນສູງສຸດ.

ໃນຕອນທ້າຍປະທານໄດ້ມີຄຳເຫັນໂອ້ລົມ ກ່ອນອື່ນ ທ່ານສະແດງຄວາມຍ້ອງຍໍຊົມເຊີຍຕໍ່ຄະນະພັກ, ການນຳຂັ້ນເມືອງທີ່ເຫັນເຖິງຄວາມໝາຍຄວາມສຳຄັນໃນການເປີດຊຸດຝຶກອົບຮົມ ແລະ ຍັງໄດ້ເນັ້ນໜັກຕໍ່ຄະນະຮັບຜິດຊອບ ຄູ - ອາຈານ ຕະຫຼອດຮອດນັກຝຶກອົບຮົມໃນຄັ້ງນີ້ ຈົ່ງພ້ອມກັນຕັ້ງໃຈສຶກສາ-ຮຳ່ຮຽນ, ແລກປ່ຽນປະສົບການ ແລະ ຍາດແຍ່ງເອົາຄວາມຮູ້, ໄປຈັດຕັ້ງປະຕິບັດວຽກງານໃຫ້ມີຜົນປະໂຫຍດສູງສຸດ ຕາມຈຸດປະສົງ ແລະ ຄາດໝາຍທີ່ວາງໄວ້.

ຂຽນໂດຍ ນາງ ພູຄຳ ຫັດສະດີ
ຖ່າຍພາບ: ແສງສະຫວ່າງ ອີນທະລັງສີ

ປະເພດຂ່າວ: