ເມືອງ ຮຸນ ເປີດຊຸດຝຶກອົບຮົມກົດໝາຍໄລຍະສັ້ນ 45 ວັນ

ຊຸດຝຶກອົບຮົມກົດໝາຍໄລຍະສັ້ນ 45 ວັນ ຊຸດທີ II ຂອງເມືອງ ຮຸນ ແຂວງ ອຸດົມໄຊ ໄດ້ຈັດຂື້ນໃນຕອນເຊົ້າຂອງວັນທີ 12 ຕຸລາ 2020 ຢູ່ທີ່ ສະໂມສອນຂອງເມືອງ ໂດຍເປັນປະທານຮ່ວມ ຂອງທ່ານ ບຸນທັນ ສຸພັດທອນ ຄະນະປະຈຳພັກເມືອງ ຮອງເຈົ້າເມືອງ ຮຸນ, ທ່ານ ບຸນຈັນ ສີບຸນຕາ ຄະນະໜ່ວຍພັກ ຮອງຫົວໜ້າພະແນກຍຸຕິທຳແຂວງ ອຸດົມໄຊ, ມີຄະນະພັກເມືອງ, ຫົວໜ້າ, ຮອງຫົວໜ້າຫ້ອງການອ້ອມຂ້າງເມືອງ, ມີພະນັກງານວິຊາການ, ແຂກເຊີນ, ຄູຝຶກ ແລະ ສຳມະນາກອນຝຶກອົບຮົມເຂົ້າຮ່ວມ.
ໃນພິທີທ່ານ ວິໄຊເຮີ ພັນດາລີ ຫົວໜ້າຫ້ອງການຍຸຕິທຳເມືອງ ຮຸນ ໄດ້ຂື້ນຜ່ານ ຂໍ້ຕົກລົງຂອງເຈົ້າເມືອງ ວ່າດ້ວຍການອະນຸມັດ ເປີດຊຸດຝຶກອົບຮົມກົດໝາຍໄລຍະສັ້ນ 45 ວັນ ແລະ ລາຍງານ ກ່ຽວກັບການກະກຽມເປີດຊຸດຝຶກອົບຮົມກົດໝາຍ ຊຸດທີ II ປະຈຳປີ 2020, ເປົ້າໝາຍຜູ້ເຂົ້າຝຶກອົບຮົມໃນຄັ້ງນີ້ ແມ່ນ ພະນັກງານຫຼັກແຫຼ່ງອ້ອມຂ້າງເມືອງ ຮຸນ ແລະ ກອງພົນທະຫານຮາບທີ 3 ເຂົ້າຝຶກອົບຮົມທັງໝົດ 41 ທ່ານ, ຍິງ 4 ທ່ານ ການເປີດຊຸດຝຶກອົບຮົມກົດໝາຍໄລຍະສັ້ນ 45 ວັນໃນຄັ້ງນີ້ ແມ່ນເພື່ອຍົກລະດັບຄວາມຮູ້ທາງດ້ານກົດໝາຍໃຫ້ເປັນລະບົບ ເພື່ອສ້າງເງື່ອນໄຂໃຫ້ແກ່ການຄຸ້ມຄອງລັດ, ຄຸ້ມຄອງສັງຄົມດວ້ຍກົດໝາຍໃຫ້ມີປະສິດທິພາບ ແລະ ປະສິດທິຜົນສູງສຸດ. ຈາກນັ້ນກໍ່ຍັງໄດ້ມອບເຄື່ອງອຸປະກອນຮັບໃຊ້ວຽກງານຍຸຕິທຳຮາກຖານອີກຈຳນວນໜື່ງ

ໃນຕອນທ້າຍ ຄະນະປະທານ ໄດ້ມີຄຳເຫັນໂອ້ລົມກ່ອນອື່ນບັນດາທ່ານກໍ່ສະແດງຄວາມຍ້ອງຍໍຊົມເຊີຍຕໍ່ຄະນະພັກ, ການນຳຂັ້ນເມືອງ ທີ່ເຫັນເຖິງຄວາມໝາຍຄວາມສຳຄັນໃນການເປີດຊຸດຝຶກອົບຮົມໃນຄັ້ງນີ້ ແລະ ຍັ້ງໄດ້ເນັ້ນຕໍ່ຄະນະຮັບຜິດຊອບ ຄູ - ອາຈານ ຕະຫຼອດຮອດສຳມະນາກອນຝຶກອົບຮົມໃນຄັ້ງນີ້ ຈົ່ງພ້ອມກັນຕັ້ງໃຈສຶກສາ-ຮຳ່ຮຽນ, ແລກປ່ຽນປະສົບການ ແລະ ຍາດແຍ່ງເອົາຄວາມຮູ້, ໄປຈັດຕັ້ງປະຕິບັດວຽກງານໃຫ້ມີຜົນປະໂຫຍດສູງສຸດ ຕາມຈຸດປະສົງ ແລະ ຄາດໝາຍທີ່ວາງໄວ້.

ຂຽນໂດຍ ນາງ ພູຄຳ ຫັດສະດີ
ຖ່າຍພາບ: ສຸວັນນີ ຈັນນະຄອນ

ປະເພດຂ່າວ: