ເມືອງ ຫຼາ ປະກາດບ້ານ ຫ້ວຍຈາຍ ເປັນບ້ານແບບຢ່າງປະຕິບັດກົດໝາຍ ແລະ ບ້ານສາມັກຄີປອງດອງ

          ວັນທີ 8 ມັງກອນ 2021 ຢູ່ທີບ້ານ ບ້ານ ຫ້ວຍຈາຍ ເມືອງ ຫຼາ ແຂວງ ອຸດົມໄຊ ໄດ້ຈັດພິທີປະກາດບ້ານແບບຢ່າງປະຕິບັດກົດໝາຍ ແລະ ບ້ານສາມັກຄີປອງດອງຂຶ້ນ ໂດຍການເປັນປະທານຂອງ ທ່ານ ຄຳແພງ ອໍລະວົງ ຄະນະປະຈຳພັກເມືອງ ປະທ່ານແນວລາວສ້າງຊາດ ເມືອງຫຼາ, ມີທ່ານ ສົມໝາຍ ພູມມີສຸກ ຫົວໜ້າຫ້ອງການຍຸຕິທຳເມືອງຫຼາ ມີຄະນະພັກຮາກຖານບ້ານ, ຄະນະແກ້ໄຂຂໍ້ຂັດແຍ່ງຂັ້ນບ້ານ, ແຂກຖືກເຊີນ ແລະ ປະຊາຊົນພາຍໃນບ້ານເຂົ້າຮ່ວມທັງໝົດ 186 ທ່ານ, ຍິງ 98 ທ່ານ.
          ທ່ານ ພັດ ຮອງນາຍບ້ານ ຫວ້ຍຈາຍ ໄດ້ຂຶ້ນຜ່ານບົດສະຫຼຸບຜົນຂອງການເຄື່ອນໄຫວຈັດຕັ້ງປະຕິບັດວຽກງານໃນໄລຍະຜ່ານມາກ່ຽວກັບການສ້າງຄອບຄົວ ແລະ ບ້ານແບບຢ່າງປະຕິບັດກົດໝາຍ ຕາມເງື່ອນໄຂ ແລະ ມາດຕະຖານທີ່ກະຊວງຍຸຕິທຳວາງອອກ, ຈຸປະສົງເພື່ອສ້າງພື້ນຖານໃຫ້ແກ່ການຄຸ້ມຄອງລັດ, ຄຸ້ມຄອງສັງຄົມດວ້ຍລັດຖະທຳມະນູນ ແລະ ກົດໝາຍ, ໂດຍສະເພາະ ແມ່ນການຄຸ້ມຄອງ ແລະ ການບໍລິຫານບ້ານໃຫ້ເຄື່ອນໄຫວໃຫ້ຖືກຕ້ອງ ແລະ ສອດຄ່ອງຕາມກົດໝາຍກຳນົດໄວ້. ພາຍຫຼັງສຳເລັດການຜ່ານບົດສະຫຼຸບກໍໄດ້ມີ ການມອບໃບຢັ້ງຢືນໃຫ້ແກ່ຄອບຄົວແບບຢ່າງປະຕິບັດກົດໝາຍຈຳນວນ 61 ຄອບຄົວ. ໃຫ້ກຽດມອບໂດຍ ທ່ານ ສົມໝາຍ ພູມມີສຸກ ຫົວໜ້າຫ້ອງການຍຸຕິທຳເມືອງ ຫຼາ.
          ໃນຕອນທ້າຍປະທານກໍໄດ້ມີຄຳເຫັນໂອ້ລົມຕໍ່ພິທີ ກ່ອນອື່ນທ່ານໄດ້ສະດງຄວາມຍ້ອງຍໍຊົມເຊີຍຕໍ່ຜົນງານຂອງບ້ານທີ່ຍາດແຍ່ງມາໄດ້ໃນໄລຍະຜ່ານມາ ແລະ ທ່ານຍັງຮຽກຮ້ອງໃຫ້ຄະນະພັກຮາກຖານບ້ານ ແລະ ປະຊາຊົນພາຍໃນບ້ານເອົາໃຈບາງດ້ານ ຄື:
1. ສືບຕໍ່ຕັ້ງໜ້າປັບປຸງພາຍໃນບ້ານໃຫ້ມີຄວາມໜັກແໜ້ນ, ເຂັ້ມແຂງທາງດ້ານແນວຄິດ, ການຈັດຕັ້ງ, ແບບແຜນວີທີເຮັດວຽກໃຫ້ຖືກຕ້ອງ ແລະ ສອດຄ່ອງ ຕາມ ກົດໝາຍ ແລະ ລະບຽບຢ່າງເຂັ້ມງວດ;
2. ສືບຕໍ່ເພີ່ມທະວີຄວາມສາມັກຄີປອງດອງພາຍໃນບ້ານໃຫ້ມີຄວາມສະຫງົບ, ມີຄວາມເປັນລະບຽບຮຽບຮ້ອຍ ແລະ ຄວາມຍຸຕິທຳພາຍໃນບ້ານ;
3. ສືບຕໍ່ເຂົ້າຮ່ວມຮັບຟັງການໂຄສະນາເຜີຍແຜ່ກົດໝາຍຕ່າງໆທີ່ຂັ້ນເທິງລົງມາເຜີຍແຜ່ໃນແຕ່ລະໄລຍະ;
4. ສືບຕໍ່ແກ້ໄຂປາກົດການຫຍໍ້ທໍ້ ຫຼື ບັນຫາຕ່າງໆພາຍໃນບ້ານທີ່ເຫັນວ່າຍັງບໍ່ຖືກຕ້ອງຕາມ ກົດໝາຍ ແລະ ລະບຽບການທີ່ວາງອອກ.
ຂຽນຂ່າວ: ນາງ ພູຄຳ ຫັດສະດີ
ຖ່າຍພາບ ແສງສະຫວ່າງ ອີນທະລັງສີ