ຫົວໜ້າຫ້ອງການຍຸຕິທຳເມືອງ ເມິງ ລົງເຄື່ອນໄຫວໂຄສະນາເຜີຍແຜ່ກົດໝາຍ ແລະ ຕິດຕາມກວດກາຊຸກຍູ້ວ່າດ້ວຍການສ້າງຄອບຄົວ ແລະ ບ້ານແບບຢ່າງປະຕິບັດກົດໝາຍ

Primary tabs

          ໃນວັນທີ 28 ເມສາ 2022 ນີ້, ທ່ານ ທອງລຸນ ວິໄລທອງ ຫົວໜ້າຫ້ອງການຍຸຕິທຳເມືອງ ເມິງ ພ້ອມດ້ວຍຄະນະ ລົງເຄື່ອນໄຫວໂຄສະນາເຜີຍແຜ່ກົດໝາຍ ແລະ ຜ່ານຂໍ້ຕົກລົງ ຂອງລັດຖະມົນຕີກະຊວງຍຸຕິທຳວ່າດ້ວຍ ການສ້າງຄອບຄົວ ແລະ ບ້ານແບບຢ່າງປະຕິບັດກົດໝາຍ ໃຫ້ແກ່ປະຊາຊົນ ບ້ານ ຈ້ອມແຈ້ງ ກຸ່ມ ຜາດຳ ມີປະຊາຊົນ ເຂົ້າຮ່ວມທັງໝົດ 79 ຄົນ, ຍິງ 27 ຄົນ.
อาจเป็นรูปภาพของ 6 คน, ผู้คนกำลังนั่ง และ ผู้คนกำลังยืน
          ການລົງເຄື່ອນໄຫວໂຄສະນາເຜີຍແຜ່ກົດໝາຍໃນຄັ້ງນີ້ ເພື່ອເຮັດໃຫ້ການຈັດຕັ້ງບ້ານ ແລະ ປະຊາຊົນບັນດາເຜົ່າໄດ້ຮັບຮູ້ ແລະ ເຂົ້າໃຈຕໍ່ແນວທາງຂອງພັກ, ລັດຖະທຳມະນູນ, ກົດໝາຍ ແລະ ລະບຽບການຂອງລັດທີ່ວາງອອກໃນແຕ່ລະໄລຍະ, ເພື່ອຍົກສູງ ສະຕິໃນການເຄົາລົບກົດໝາຍ, ຫັນການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ ເທື່ອລະກ້າວ.
          ກົດໝາຍທີ່ນໍາມາໂຄສະນາເຜີຍແຜ່ໃນຄັ້ງນີ້ ມີບາງມາດຕາຂອງ ປະມວນກົດໝາຍແພ່ງ, ປະມວນກົດໝາຍອາຍາ, ໃຫ້ສະມາຊິກທຸກຄົນໃນຄອບຄົວ ໄດ້ຮັບຮູ້ເຂົ້າໃຈຢ່າງທົ່ວເຖິງ. ຜ່ານການໂຄສະນາເຜີຍແຜ່ກົດໝາຍ ເຫັນວ່າປະຊາຊົນໄດ້ມີຄວາມສົນໃຈ ແລະ ໄດ້ຍົກເອົາບັນຫາທີ່ເກີດຂື້ນຕົວຈິງຢູ່ໃນສັງຄົມມາສົນທະນາແລກປ່ຽນ ເພື່ອໃຫ້ພະນັກງານຜູ້ເຜີຍແຜ່ໄດ້ອະທິບາຍ, ຊີ້ແຈງໃຫ້ຄວາມເຫັນທາງດ້ານກົດໝາຍ.
          ພ້ອມກັນນັ້ນ ຍັງໄດ້ຜ່ານຂໍ້ຕົກລົງ ຂອງລັດຖະມົນຕີກະຊວງຍຸຕິທຳ ວ່າດ້ວຍການສ້າງຄອບຄົວ ແລະ ບ້ານແບບຢ່າງປະຕິບັດກົດໝາຍ ໃຫ້ປະຊາຊົນພາຍໃນບ້ານໄດ້ຮັບຮູ້ ແລະ ເຂົ້າໃຈກ່ຽວກັບຄວາມໝາຍ ແລະ ຄວາມສຳຄັນໃນການສ້າງຄອບຄົວ ແລະ ບ້ານແບບຢ່າງປະຕິບັດກົດໝາຍ. ຍັງໄດ້ຕິດຕາມ, ກວດກາ ແລະ ຊຸກຍູ້, ປະເມີນບ້ານຈ້ອມແຈ້ງ ໃຫ້ກາຍເປັນ ຄອບຄົວ ແລະ ບ້ານແບບຢ່າງປະຕິບັດກົດໝາຍໃນຕໍ່ໜ້າ.
ຂຽນຂ່າວ-ຖ່າຍພາບ: ອຳໄພ ພົມປະດິດ