ເມືອງ ຮຸນ ແຂວງ ອຸດົມໄຊ ໂຄສະນາເຜີຍແຜ່ ດໍາລັດ ແລະ ຄໍາແນະນໍາ ວ່າດ້ວຍການຊ່ວຍເຫຼືອທາງດ້ານກົດໝາຍ

          ໃນວັນທີ 28 - 30 ມີນາ 2011 ຜ່ານມາ ຫ້ອງການຍຸຕິທໍາ ເມືອງ ຮຸນ ແຂວງ ອຸດົມໄຊ ໄດ້ຈັດພິທີ ໂຄສະນາເຜີຍແຜ່ດໍາລັດ ສະບັບເລກທີ 77/ລບ, ລົງວັນທີ 28 ກຸມພາ 2018 ວ່າດ້ວຍການຊ່ວຍເຫຼືອທາງດ້ານກົດໝາຍ ໂດຍບໍ່ເສຍຄ່າ, ຄໍາແນະນໍາ ສະບັບເລກທີ 1077/ກຍ, ລົງວັນທີ 3 ກັນຍາ 2018 ວ່າດ້ວຍການຈັດຕັ້ງປະຕິບັດ ການຊ່ວຍເຫຼືອທາງດ້ານກົດໝາຍ, ການຊ່ວຍເຫຼືອທາງດ້ານກົດໝາຍ ເຄື່ອນທີ່, ເຜີຍແຜ່ຂໍ້ຕົກລົງສະບັບເລກທີ 2399/ກຍ, ລົງວັນທີ 7 ທັນວາ 2017 ຂອງກະຊວງຍຸຕິທໍາ ວ່າດ້ວຍການສ້າງຄອບຄົວ ແລະ ບ້ານແບບຢ່າງປະຕິບັດກົດໝາຍ ແລະ ແນະນໍາ ການແກ້ໄຂຂໍ້ຂັດແຍ່ງຂັ້ນບ້ານ ຢູ່ທີ່ກຸ່ມບ້ານ ໂພນໄຊ ມີບ້ານ ໂພນໄຊ ແລະ ບ້ານ ກະຕ່າງຢາ.
          ໃນການລົງໂຄສະນາເຜີຍແຜ່ໃນຄັ້ງນີ້ ນຳພາໂດຍ ທ່ານ ນາງ ຫຼ້າກິ່ງຄໍາ ຈັນທະລັງສີ ຮອງຫົວໜ້າຫ້ອງການຍຸຕິທໍາເມືອງ, ທ່ານ ວັດທະນາ ສຸກັນຍາ ແລະ ທ່ານ ເຈືອງ ສີດາງ ປະທານ ບ້ານ ໂພນໄຊ ແລະ ບ້ານ ກະຕ່າງຢາ ມີອົງການປົກຄອງບ້ານ ແລະ ພໍ່ແມ່ປະຊາຊົນເຂົ້າຮ່ວມຮັບຟັງທັງຫມົດ 163 ຄົນ, ຍິງ 82 ຄົນ; ມີເດັກເຂົ້າຮ່ວມຮັບຟັງທັງໝົດ 78 ຄົນ, ຍິງ 43 ຄົນ ການໂຄສະນາໃນຄັ້ງນີ້ແມ່ນເພື່ອໃຫ້ປະຊາຊົນຮັບຮູ້ກ່ຽວກັບດຳລັດ, ຄໍາແນະນໍາ ການຊ່ວຍເຫຼືອທາງດ້ານກົດໝາຍ, ຂັ້ນຕອນ ແລະ ວິທີແກ້ໄຂຂໍ້ຂັດແຍ່ງຂັ້ນບ້ານ ພ້ອມທັງປະເມີນຄອບຄົວ ແລະ ບ້ານແບບຢ່າງປະຕິບັດກົດຫມາຍ ຫຼັງຈາກນັ້ນທາງທີມງານ ຫ້ອງການຍຸຕິທໍາ ກໍ່ໄດ້ມອບ ໂປຼດສະເຕີ ການຊ່ວຍເຫຼືອທາງດ້ານກົດຫມາຍ ໂດຍບໍ່ເສຍຄ່າ ແລະ ໂປຼດສະເຕີ ຂັ້ນຕອນການແກ້ໄຂຂໍ້ຂັດແຍ່ງຂັ້ນບ້ານ ໃຫ້ບ້ານ, ໂຮງຮຽນ, ໂຮງໝໍນ້ອຍ ແລະ ປກສ ເມືອງ ຮຸນ ເພື່ອໂຄສະນາເຜີຍແຜ່ໃຫ້ປະຊາຊົນພາຍໃນບ້ານ ແລະ ນັກຮຽນທີ່ໄດ້ຮັບຮູ້ນຳອີກ.
          ໃນຕອນທ້າຍພິທີ ທ່ານ ນາງ ຫຼ້າກິ່ງຄໍາ ຈັນທະລັງສີ ຮອງຫົວໜ້າຫ້ອງການຍຸຕິທໍາ ກໍໄດ້ມີຄໍາເຫັນໂອ້ລົມ ກ່ອນອື່ນທ່ານກໍໄດ້ຍ້ອງຍໍຊົມເຊີຍທາງທີມງານ ແລະ ພໍ່,ແມ່ ປະຊາຊົນທີ່ເຂົ້າຮ່ວມຮັບຝັງ ການລົງໂຄສະນາເຜີຍແຜ່ບັນດາດໍາລັດ ແລະ ຄໍາແນະນໍາໃນຄັ້ງນີ້ຢ່າງສຸດໃຈ. ທ່ານກໍໄດ້ເນັ້ນຫນັກ ບາງບັນຫາໃຫ້ປະຊາຊົນມີສະຕິຕື່ນຕົວເຄົາລົບປະຕິບັດຕາມລັດຖະທໍາມະນູນ ແລະ ກົດໝາຍອື່ນໆ ໃຫ້ເຂັ້ມງວດພ້ອມກັນສ້າງຄອບຄົວ ແລະ ບ້ານຂອງຕົນໃຫ້ເປັນບ້ານແບບຢ່າງປະຕິບັດກົດຫມາຍໃນຕໍ່ຫນ້າ.
ຂຽນຂ່າວ ແລະ ຖາຍພາບ: ທ່ານ ກັນຫາ ອິນສົມພອນ