ພະແນກຍຸຕິທຳແຂວງ ໄຊຍະບູລີໄດ້ເອົາໃຈໃສ່ໃນໂຄສະນາເຜີຍແຜ່ກົດໝາຍ

ໃນຕອນເຊົ້າຂອງວັນທີ 9 ຕຸລາ 2020 ຢູ່ທີ່ໂຮງຮຽນ ມສ ນາຍາວ ເມືອງ ໄຊຍະບູລີ ແຂວງ ໄຊຍະບູລີ ໄດ້ຈັດພິທີ ໂຄສະນາເຜີຍແຜ່ກົດໝາຍ ພາຍໃຕ້ການເປັນປະທານຮ່ວມ ລະຫວ່າງ ທ່ານ ສົມລິດ ອ່ອນຕາ ຄະນະພັກ ຮອງຫົວໜ້າພະແນກຍຸຕິທຳແຂວງ, ທ່ານ ບັນດິດ ທິແກ້ວ ອຳນວຍການໂຮງຮຽນ ມສ ນາຍາວ ແລະ ທ່ານ ນ. ຍຸພິນ ນາຍບ້ານ ນາຍາວ ມີບັນດາທ່ານຄະນະບ້ານ, ຄູ-ອາຈານ ແລະ ນັກຮຽນ ແຕ່ຊັ້ນ ມ5 - ມ7 ໄດ້ເຂົ້າທັງໝົດຈຳນວນ 193 ຄົນ,ຍິງ 109 ຄົນ.
ຈຸດປະສົງຂອງການລົງໂຄສະນາເຜີຍແຜ່ກົດໝາຍໃນຄັ້ງນີ້ ແມ່ນເພື່ອນຳເອົາແນວທາງນະໂຍບາຍຂອງພັກ, ກົດໝາຍຂອງລັດ ລວມເຖິງພາລະບົດບາດຂອງຂະແໜງການຍຸຕິທຳ ທີ່ຕິດພັນກັບສະພາບການດຳລົງຊີວິດຂອງສັງຄົມລົງມາເຜີຍແຜ່. ຊຶ່ງທັງໝົດນີ້ ແມ່ນເພື່ອເຮັດໃຫ້ຂົງເຂດການສຶກສາ (ຄູ-ອາຈານ, ນັກຮຽນ ຕະຫຼອດຮອດອົງການປົກຄອງບ້ານ) ໄດ້ຮັບຮູ້ ແລະ ເຂົ້າໃຈກ່ຽວກັບບັນດາຂໍ້ກຳນົດກົດໝາຍ, ລະບຽບການຕ່າງໆຂອງລັດ, ນິຕິກຳທີ່ສຳຄັນຕິດພັນກັບຂົງເຂດຄວາມຮັບຜິດຊອບຂອງຕົນ, ສິດ ແລະ ພັນທະ ທາງດ້ານກົດໝາຍຂອງພົນລະເມືອງລາວ, ການກະທຳທີ່ຖືວ່າເປັນການກະທຳຜິດທາງອາຍາ ແລະ ການວາງໂທດໃສ່ການກະທຳຜິດຂອງເດັກ, ການປົກປ້ອງສິດ ແລະ ຜົນປະໂຫຍດຂອງເດັກ, ລະບຽບການສັນຈອນໃນຖະໜົນ, ການລະເມີດກົດຈະລາຈອນ ທີ່ພາໃຫ້ເກີດອຸບບັດຕິເຫດ ຕິດພັນກັບວຽກງານການສຶກສາ ທັງນີ້ກໍ່ເພື່ອເປັນການຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆ ທີ່ເກີດຂຶ້ນໃນສັງຄົມໃຫ້ຫຼຸດນ້ອຍຖອຍລົງ.

ໃນຕອນທ້າຍ ທ່ານ ສົມລິດ ອ່ອນຕາ ຄະນະພັກ ຮອງຫົວໜ້າພະແນກຍຸຕິທຳແຂວງ ກໍ່ໄດ້ມີຄຳເຫັນສັງລວມ ແລະ ໂອ້ລົມຕໍ່ກອງປະຊຸມ ແລະ ທ່ານໄດ້ຍົກໃຫ້ເຫັນບາງບັນຫາທີ່ພົ້ນເດັ່ນຕໍ່ການຈັດຕັ້ງປະຕິບັດກົດໝາຍ, ບັນຫາທີ່ເກີດຂື້ນໃນສັງຄົມ ແລະ ສະເໜີກ່ຽວກັບພາລະບົດບາດຂອງຂະແໜງການຍຸຕິທຳໃຫ້ແກ່ຜູ້ເຂົ້າຮ່ວມຮັບຟັງ ແລະ ໄດ້ເນັ້ນໜັກໃຫ້ສະມາຊິກພັກ, ພະນັກງານ ຄູ-ອາຈານ, ນ້ອງນັກຮຽນ ຕະຫຼອດຮອດພະນັກງານປົກຄອງບ້ານ ນາຍາວ ຈົ່ງໄດ້ພ້ອມກັນເພີ່ມທະວີ ນຳເອົາແນວທາງຂອງພັກກໍ່ຄືກົດໝາຍຂອງລັດ ໄປໝຸນໃຊ້ເຂົ້າໃນການຈັດຕັ້ງປະຕິບັດໜ້າທີ່ການເມືອງ ທີ່ຢູ່ໃນຄວາມຮັບຜິດຊອບຂອງຕົນ, ເປັນເຈົ້າການໃນການຄົ້ນຄ້ວາ-ຮ່ຳຮຽນ ຕໍ່ລັດຖະທຳມະນູນ, ກົດໝາຍ ແລະ ລະບຽບການຂອງລັດ ທີ່ວາງອອກແຕ່ລະໄລຍະ, ພ້ອມກັນເຄົາລົບ ແລະ ປະຕິບັດກົດໝາຍຢ່າງເຂັ້ມງວດ.

ຂຽນຂ່າວໂດຍ: ທ່ານ ໂກສິດ ສິງສະຖິດ ຫົວໜ້າຂະແໜງກົດໝາຍ.

ປະເພດຂ່າວ: