ແຂວງ ໄຊຍະບູລີ ເປີດຝຶກອົບຮົມກົດໝາຍໄລຍະສັ້ນ 45 ວັນ ໃຫ້ພະນັກງານຫຼັກແຫຼ່ງ

Primary tabs

          ໃນວັນທີ 26 ຕຸລາ 2021 ໄຊຍະບູລີ ໄດ້ເປີດຊຸດການຝຶກອົບຮົມກົດໝາຍຂັ້ນພື້ນຖານ ລະບົບບໍາລູງ 45 ວັນ ໃຫ້ພະນັກງານຫຼັກແຫຼ່ງຂອງແຂວງ ທີ່ມາຈາກບັນດາພະແນກການ, ກົມກອງ, ວິສາຫະກິດ ອ້ອມຂ້າງແຂວງ ຊຶ່ງມີນັກຝຶກຮົມ ທັງໝົດ 50 ທ່ານ, ຍິງ 18 ທ່ານ.
          ແຕ່ພາຍຫຼັງ ເລີ່ມຮຽນມາເປັນປົກກະຕິ ໄດ້ 2 ອາທິດ (ໃນວັນທີ 10 ພະຈິກ 2021 ໄດ້ 10 ວິຊາຮຽນ) ຈາກນັ້ນ ໄດ້ມີການແຜ່ລະບາດຂອງພະຍາດໂຄວິດ Covid 19 ນໍາເຂົ້າ ແລະ ຊຸມຊົນ ຈໍານວນຫຼາຍພາຍໃນແຂວງ ໄຊຍະບູລີ ຊຶ່ງໄດ້ມີແຈ້ງການຂອງຫ້ອງວ່າການແຂວງ ສະບັບເລກທີ468/ຫວຂ.ຊຍ, ລົງວັນທີ 5 ພະຈິກ 2021 ວ່າດ້ວຍການຍົກລະດັບ ມາດຕະການປ້ອງກັນຄວບຄຸມ ແລະ ສະກັດກັ້ນການລະບາດຂອງພະຍາດໂຄວິດ COVID-19. ດັ່ງນັ້ນ ຄະນະຮັບຜິດຊອບການຮຽນ-ການສອນ ຈຶ່ງໄດ້ປຶກສາຫາລືກັນ ພ້ອມກັນເຫັນດີຕົກລົງເປັນເອກະພາບ ໃຫ້ຢຸດເຊົາ ການຮຽນ-ການສອນແບບເຊິ່ງໜ້າ, ຫັນມາຮຽນ-ມາສອນ ລະບົບທາງອອນລາຍ ໃນລະບົບ Zoom ເພື່ອໃຫ້ສໍາເລັດຕາມແຜນການທີ່ວາງໄວ້ ແລະ ຮັບປະກັນຄຸນນະພາບຂອງການຝຶກອົບຮົມ ໂດຍມີການຕິດຕາມ, ກວດກາຈາກຄະນະຮັບຜິດຊອບຢ່າງໃກ້ສິດ ແລະ ເປັນປະຈໍາ, ຊຶ່ງເລີ່ມຮຽນລະບົບອອນລາຍ ແຕ່ວັນທີ 11 ພະຈິກ 2021 ເປັນຕົ້ນມາ. ຜ່ານການຮຽນ-ການສອນ ທາງລະບົບທາງອອນລາຍ Zoom ສັງເກດວ່າ: ນັກຝຶກອົບຮົມແຕ່ລະທ່ານສາມາດເຂົ້າຮ່ວມໄດ້ທັງໝົດ, ມີຄວາມຮັບຜິດຊອບສູງ, ມີຄວາມກະຕື້ລືລົ້ນແລກປ່ຽນບົດຮຽນເຊິ່ງກັນ ແລະ ກັນ ແລະ ຍົກບັນຫາມາສົນທະນາແລກປ່ຽນ ນຳຄູອາຈານ ເຮັດໃຫ້ການຮຽນ-ການສອນ ມີບັນຍາກາດຟົດຟື້ນ. ເຖິງຢ່າງໃດກໍຕາມ ຄະນະຮັບຜິດຊອບການຮຽນ-ການສອນ ກໍຈະສືບຕໍ່ຕິດຕາມ ກະຕຸກຊຸກຍູ້ການຮຽນ- ການສອນໃນລະບົບທາງອອນລາຍ Zoom ຈົນກວ່າຈະມີຄໍາສັ່ງໃຫ້ມີການປ່ຽນແປງ ແລະ ເຮັດໃຫ້ການຮຽນ-ການສອນ ດຳເນີນໄປດ້ວຍດີ.
ພາບໂດຍ: ທ່ານ ພຽງປະດິດ ຄໍາພາ ແລະ ຂ່າວໂດຍ: ນາງ ແສງຄໍາລຽງ ຮັກປະດິດ
ປະເພດຂ່າວ: