ພະແນກຍຸຕິທຳແຂວງ ໄຊຍະບູລີລົງໂຄສະນາເຜີຍແຜ່ກົດໝາຍໃຫ້ກໍາລັງປະກອບອາວຸດ

ວັນທີ 21 ກໍລະກົດ 2020 ທີ່ຜ່ານມາ ຢູ່ທີ່ສະໂມສອນຂອງກອງບັນຊາການທະຫານແຂວງ ໄຊຍະບູລີ ໄດ້ຈັດພິທີໂຄສະນາເຜີຍແຜ່ກົດໝາຍ ໃຫ້ກໍາລັງປະກອບອາວຸດ (ກອງບັນຊາການທະຫານແຂວງໄຊຍະບູລີ) ໂດຍພາຍໃຕ້ການເປັນປະທານຮ່ວມຂອງ ທ່ານ ກາວີ ເກດດົມລິ ຫົວໜ້າພະແນກຍຸຕິທຳແຂວງ ແລະ ທ່ານ ໄວຍາກອນ ເພັດສະລາດ ຮອງຫົວໜ້າກອງບັນຊາການທະຫານແຂວງ ມີບັນດາ ຄະນະພັກ, ຄະນະບັນຊາ, ຫົວໜ້າພະແນກ, ຮອງພະແນກ, ນາຍ ແລະ ພົນທະຫານເຂົ້າຮ່ວມທັງໝົດ 68 ທ່ານ, ຍິງ 3 ທ່ານ.

ຈຸດປະສົງ ເພື່ອເຮັດໃຫ້ນາຍ ແລະ ພົນທະຫານຢູ່ກອງບັນຊາການທະຫານແຂວງ ໄຊຍະບູລີ ໄດ້ຮັບຮູ້, ເຂົ້າໃຈ ຕໍ່ແນວທາງນະໂຍບາຍຂອງພັກ, ກົດໝາຍ ແລະ ລະບຽບການຂອງລັດວາງອອກໃນແຕ່ລະໄລຍະ, ຈໍາແນກໄດ້ມິດ-ສັດຕູຢ່າງຈະແຈ້ງ, ຮູ້ນໍາໃຊ້ກົດໝາຍເຂົ້າໃນການປະຕິບັດໜ້າທີ່ວຽກງານຂອງຕົນຢ່າງຖືກຕ້ອງ, ດໍາລົງຊີວິດປະຈໍາວັນດ້ວຍຄວາມປອດໃສຂາວສະອາດ. ກົດໝາຍທີ່ນໍາມາໂຄສະນາເຜີຍແຜ່ຄັ້ງນີ້ ມີ ບາງມາດຕາຂອງລັດຖະທຳມະນູນ, ປະມວນກົດໝາຍແພ່ງ, ກົດໝາຍວ່າດ້ວຍທະບຽນສານ, ກົດໝາຍວ່າດ້ວຍການຈັດຕັ້ງປະຕິບັດຄຳຕັດສີນຂອງສານ, ບາງເນື້ອໃນທີ່ສໍາຄັນຂອງກົດໝາຍ ແລະ ນິຕິກຳ ໃນຂົງເຂດຍຸຕິທຳ ທີ່ຕິດພັນກັບການດຳລົງຊີວິດຂອງປະຊາຊົນ ກໍຄືກໍາລັງປະກອບອາວຸດ.

ຕອນທ້າຍ ທ່ານ ຫົວໜ້າພະແນກຍຸຕິທຳແຂວງ ກໍໄດ້ມີຄຳເຫັນໂອ້ລົມແກ່ຜູ້ເຂົ້າຮ່ວມຮັບຟັງ, ກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ການປະຕິບັດໜ້າທີ່ຂອງກອງບັນຊາການທະຫານແຂວງໃນໄລຍະຜ່ານມາ ແລະ ເນັ້ນໜັກໃຫ້ອ້າຍເອື້ອຍນ້ອງນາຍ ແລະ ພົນທະຫານ ຈົ່ງເພີ່ມທະວີຄວາມເອົາໃຈໃສ່ ໃນການນຳເອົາແນວທາງນະໂຍບາຍຂອງພັກ ກໍຄືກົດໝາຍຂອງລັດ ໄປໝູນໃຊ້ເຂົ້າໃນການຈັດຕັ້ງປະຕິບັດໜ້າທີ່ການເມືອງຂອງຕົນ, ເອົາໃຈໃສ່ປະຕິບັດວຽກງານທີ່ຢູ່ໃນຄວາມຮັບຜິດຊອບຂອງຕົນໃຫ້ໄດ້ຮັບຜົນສໍາເລັດ, ເປັນເຈົ້າການໃນການຄົ້ນຄ້ວາຮໍ່າຮຽນກົດໝາຍ, ລະບຽບການຂອງລັດວາງອອກໃນແຕ່ລະໄລຍະ ພ້ອມທັງເຄົາລົບ ແລະ ປະຕິບັດກົດໝາຍຢ່າງເຂັ້ມງວດ, ເພື່ອເປັນແບບຢ່າງໃນການຕີຖອຍປາກົດການຫຍໍ້ທໍ້ຕ່າງໆ ຢູ່ໃນສັງຄົມໃຫ້ຫຼຸດໜ້ອຍຖອຍລົງເທື່ອລະກ້າວ.

ຂຽນຂ່າວ ແລະ ຖ່າຍພາບໂດຍ: ໂກສິດ ສິງສະຖິດ