ໝ່ວຍຮາກຖານກຳມະບານພະແນກຍຸຕິທຳແຂວງ ເປີດຂະບວນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ.

          ໃນຕອນບ່າຍຂອງວັນທີ 1 ເມສາ 2021 ຜ່ານມາ ຮາກຖານກຳມະບານພະແນກຍຸຕິທຳແຂວງ ໄຊສົມບູນ ຈັດພິທີ ເປີດຂະບວນການຈັດຕັ້ງເນື້ອໃນຂໍ້ແຂ່ງຂັນ 5 ເປັນເຈົ້າຂຶ້ນ ຢູ່ທີ່ຫ້ອງປະຊຸມສານປະຊາຊົນແຂວງ ໂດຍການເປັນປະທານຂອງສະຫາຍ ເຢີຊົ່ງ ໄຊຊາ ປະທານຮາກຖານກຳມະບານພະແນກຍຸຕິທຳແຂວງ ເປັນກຽດເຂົ້າຮ່ວມຂອງ ສະຫາຍ ອຸດອນ ສິງດາລາ ກໍາມະການພັກແຂວງ, ເລຂາໝ່ວຍພັກພະແນກຍຸຕິທຳ, ຫົວໜ້າພະແນກຍຸຕິທຳແຂວງ ມີສະຫາຍ ຈູຢ່າງ ກຣາຈັງ ຮອງປະທານສະຫະພັນກຳມະບານແຂວງ, ມີປະທານ-ຮອງປະທານຮາກຖານກຳມະບານກຸ່ມປົກປ້ອງກົດໝາຍ ແລະ ມີຕາງໝ້າຮາກຖານກໍາມະບານພະແນກແຮກສ່ຽວ ພ້ອມດ້ວຍສະມາຊິກຮາກຖານກໍາມະບານພະແນກຍຸຕິທໍາເຂົ້າຮ່ວມ.
          ສະຫາຍ ເຢີຊົ່ງ ໄຊຊາ ປະທານຮາກຖານກຳມະບານພະແນກຍຸຕິທຳແຂວງ ໄດ້ຂື້ນຜ່ານແຜນການເປິດຂະບວນການແຂ່ງຂັນ 5 ເປັນເຈົ້າ ປະຈໍາປີ 2021 ຊື່ງແຜນດັ່ງກ່າວປະກອບດ້ວຍ ຈຸດປະສົງ, ລະດັບຄາດໝາຍ, ເນື້ອໃນຂໍ້ແຂ່ງຂັນ 5 ເປັນເຈົ້າ, ຄາດໝາຍສູ້ຊົນປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ແລະ ວິທີຈັດຕັ້ງປະຕິບັດ ຂໍ້ແຂ່ງຂັນ 5 ເປັນເຈົ້າ, ທັງນີ້ ກໍ່ເພື່ອເຮັດໃຫ້ພະນັກງານສະມາຊິກກໍາມະບານ ສາມາດກໍາໄດ້ເນື້ອໃນລວມ ບັນດາມາດຖານ, ເງື່ອນໄຂ ແລະ ບາດກ້າວໃນການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ. ແນໃສ່ສ້າງຄວາມເປັນເອກະພາບໃນການຊີ້ນໍາ-ນໍາພາ, ການຊຸກຍູ້, ຕິດຕາມ, ກວດກາ ແລະ ປະເມີນຜົນການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ; ຫລັງຈາກນັ້ນ, ສະມາຊິກຮາກຖານກໍາມະບານພະແນກຍຸຕິທໍາໄດ້ຂຶ້ນຈັບມື ພ້ອມກັນນໍາເອົາບັນດາເນື້ອໃນຂໍ້ແຂ່ງຂັນ 5 ເປັນເຈົ້າ ຂອງກໍາມະບານລາວ ໄປຜັນຂະຫຍາຍ ແລະ ຈັດຕັ້ງປະຕິບັດ ໃຫ້ສໍາເລັດຕາມແຜນທີ່ວາງໄວ້.
          ໃນຕອນທ້າຍສະຫາຍ ຈູຢ່າງ ກຣາຈັງ ຮອງປະທານສະຫະພັນກໍາມະບານແຂວງ ແລະ ສະຫາຍ ອຸດອນ ສິງດາລາ ກໍາມະການພັກແຂວງ ເລຂາໜ່ວຍພັກພະແນກຍຸຕິທໍາແຂວງ ກໍ່ໄດ້ຜັດປ່ຽນກັນມີຄໍາເຫັນໂອ້ລົມຕໍ່ພິທີ ຊື່ງທັງສອງສະຫາຍໄດ້ຮຽກຮ້ອງໃຫ້ໜ່ວຍຮາກຖານກໍາມະບານຕະຫລອດຮອດສະມາຊິກກໍາມະບານພາຍໃນໝ່ວຍ ຈົ່ງເປັນເຈົ້າການສືກສາອົບຮົມການເມືອງ-ແນວຄິດ ໃຫ້ເປັນປົກກະຕິ, ເປັນເຈົ້າການຝືກຝົນຫລໍ່ຫລອມຕົນເອງ, ມີຄວາມຫ້າວຫັ້ນໃນການຈັດຕັ້ງປະຕິບັດໜ້າທີ່ວຽກງານວິຊາສະເພາະໃຫ້ມີຄວາມຮັບຜິດຊອບສູງ, ໄປຄຽງຄູ່ກັບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າຂອງກໍາມະບານລາວໃຫ້ປະກົດຜົນເປັນຈິງ.
ພາບ,ຂ່າວ: ຈາກພະແນກຍຸຕິທໍາແຂວງ
ປະເພດຂ່າວ: