ແຂວງ ບໍ່ແກ້ວ

ຂ່າວການເຄື່ອນໄຫວ ແລະ ບົດຄວາມອື່ນໆ

3 ເມືອງ ຂອງແຂວງ ບໍ່ແກ້ວເປີດຫ້ອງການຊ່ວຍເຫຼືອທາງດ້ານກົດໝາຍ

ໃນລະຫວ່າງວັນທີ 26-29 ພຶດສະພາ 2020 ທີ່ຜ່ານມາ ທ່ານ ບຸນຊ່ວງ ທະວີສັກ ຮອງຫົວໜ້າກົມສົ່ງເສີມລະບົບຍຸຕິທຳ ກະຊວງຍຸຕິທຳ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມ ແລະ ຊຸກຍູ້ ການກະກຽມຄວາມພ້ອມໃຫ້ແກ່ການເປີດຫ້ອງການຊ່ວຍເຫຼືອທາງດ້ານກົດໝາຍ ປະຈຳຢູ່ຫ້ອງການຍຸຕິທໍາ 3 ເມືອງ ຂອງແຂວງ ບໍ່ແກ້ວຄື: ເມືອງ ຕົ້ນເຜິ້ງ, ເມືອງ ເມິງ ແລະ ເມືອງ ຜາອຸດົມ. ມີ ທ່ານ ວິພົງ ບົວອາໄພ ຮອງຫົວໜ້າພະແນກຍຸຕິທໍາແຂວງ ບໍ່ແກ້ວ, ຫົວໜ້າ, ຮອງຫົວຫ້ອງການ ພ້ອມດ້ວຍພະນັກງານວິຊາການຂອງຫ້ອງການຍຸຕິທໍາທັງ 3 ເມືອງ ແລະ ຕາງໜ້າໂຄງການ lao/031 ຂອງປະເທດລຸກຊໍາບ໋ວກເຂົ້າຮ່ວມ.

ພິທີສອບເສັງຄັດເລືອກເອົາພະນັກງານ-ລັດຖະກອນໃໝ່ ປະຈຳປີ 2020

ວັນທີ 2 ມິຖຸນາ 2020 ທີ່ຜ່ານມາ ຢູ່ທີ່ຫ້ອງປະຊຸມພະແນກຍຸຕິທຳແຂວງ ບໍ່ແກ້ວ ໄດ້ຈັດພິທີສອບເສັງຄັດເລືອກເອົາພະນັກງານ-ລັດຖະກອນໃໝ່ ປະຈຳປີ 2020 ຂຶ້ນ ໂດຍພາຍໃຕ້ການເປັນປະທານຂອງ ທ່ານ ຄຳຫຼ້າ ອຸດທະຍອດ ກໍາມະການພັກແຂວງ, ຫົວໜ້າພະແນກຍຸຕິທຳແຂວງ ບໍ່ແກ້ວ, ມີບັນດາຄະນະຮັບຜິດຊອບ, ອະນຸກໍາມະການສອບເສັງ, ຕະຫຼອດຮອດນັກສອບເສັງເຂົ້າຮ່ວມ.

ພະແນກຍຸຕິທຳແຂວງ ບໍ່ແກ້ວເຂົ້າຮ່ວມພິທີປູກຕົ້ນໄມ້ແຫ່ງຊາດ

ເພື່ອເຮັດໃຫ້ການສະເຫຼີມສະຫຼອງວັນປູກຕົ້ນໄມ້ແຫ່ງຊາດ ປີ 2020 ດໍາເນີນໄປດ້ວຍບັນຍາກາດອັນຟົດຟື້ນ ສະນັ້ນ, ໃນຕອນເຊົ້າຂອງວັນທີ 1 ມິຖຸນາ 2020 ພະແນກຍຸຕິທຳແຂວງ ບໍ່ແກ້ວ ໄດ້ເຂົ້າຮ່ວມພິທີປູກຕົ້ນໄມ້ ຊຶ່ງໄດ້ຈັດຂຶ້ນຢູ່ທີ່ບໍລິເວນສະໜາມກິລາແຂວງ ບໍ່ແກ້ວ ນຳພາໂດຍ ທ່ານ ຄໍາຫຼ້າ ອຸດທະຍອດ ກຳມະການພັກແຂວງ, ຫົວໜ້າພະແນກຍຸຕິທໍາແຂວງ ບໍ່ແກ້ວ, ມີບັນດາຄະນະພະແນກ, ຫົວຫນ້າ ແລະ ຮອງຫົວໜ້າຂະແໜງ ພ້ອມດ້ວຍພະນັກງານ-ລັດຖະກອນເຂົ້າຮ່ວມ.

ຫົວໜ້າພະແນກຍຸຕິທໍາແຂວງ ບໍ່ແກ້ວລົງຊຸກຍູ້ວຽກງານຍຸຕິທໍາຮາກຖານ

ໃນວັນທີ 28 ພຶດສະພາ 2020 ທີ່ຜ່ານມາ ທ່ານ ຄຳຫຼ້າ ອຸດທະຍອດ ຫົວໜ້າພະແນກຍຸຕິທຳແຂວງ ບໍ່ແກ້ວ ພ້ອມດ້ວຍຄະນະ ໄດ້ລົງເຄື່ອນໄຫວ ແລະ ຊຸກຍູ້ວຽກງານຍຸຕິທຳຮາກຖານຢູ່ ເມືອງ ປາກທາ ໃຫ້ກຽດຕ້ອນຮັບໂດຍ ທ່ານ ສົມສິດ ລາດສະວົງ ຫົວໜ້າຫ້ອງການຍຸຕິທຳເມືອງ ປາກທາ ພ້ອມດ້ວຍຄະນະ ແລະ ພະນັກງານ-ລັດຖະກອນ ພາຍໃນຫ້ອງການຍຸຕິທຳເມືອງເຂົ້າຮ່ວມ.

ພະແນກຍຸຕິທໍາແຂວງ ບໍ່ແກ້ວ ຫວນຄືນມູນເຊື້ອວັນສໍາຄັນຂອງຊາດ

ວັນທີ 27 ພຶດສະພາ 2020 ທີ່ຜ່ານມາ ພະແນກຍຸຕິທຳແຂວງ ບໍ່ແກ້ວ ໄດ້ຈັດພິທີປາຖະກະຖາ ຫວນຄືນມູນເຊື້ອ 2 ວັນປະຫວັດສາດທີ່ສຳຄັນຄື: ວັນຜ່າວົງປິດລ້ອມຂອງກອງພັນທີ 2 ວິລະຊົນທີ່ທົ່ງໄຫຫີນ ແຂວງ ຊຽງຂວາງ ຄົບຮອບ 61 ປີ (18/5/1959 - 18/5/2020) ແລະ ວັນວິລະກໍາໂຕນຄຸກຢ່າງມະຫັດສະຈັນ ຂອງບັນດາທ່ານຜູ້ນໍາ ແນວລາວຮັກຊາດ ຄົບຮອບ 60 ປີ (24/5/1960 - 24/5/2020) ໃຫ້ກຽດເຂົ້າຮ່ວມເປັນປະທານ ແລະ ປາຖະກະຖາໂດຍ ທ່ານ ສຸລິເດດ ບັນດາກອນ ຮອງຫົວໜ້າພະແນກຍຸຕິທໍາແຂວງ ບໍ່ແກ້ວ, ມີບັນດາຫົວໜ້າຂະແໜງ, ຮອງຫົວໜ້າຂະແໜງ ແລະ ພະນັກງານ-ລັດຖະກອນ ວິຊາການ ພາຍໃນພະແນກເຂົ້າຮ່ວມທັງໝົດ 22 ທ່ານ, ຍິງ 9 ທ່ານ.

Pages