ກອງປະຊຸມໃຫຍ່ ສະໄໝວິສາມັນທະນາຍຄວາມທົ່ວປະເທດ ທີ່ ກະຊວງຍຸຕິທຳ

          ໃນລະຫວ່າງວັນທີ 29-30 ມີນາ 2021 ສະພາທະນາຍຄວາມແຫ່ງ ສປປ ລາວ ໄດ້ຈັດກອງປະຊຸມສະໄໝວິສາມັນຂອງຕົນ ຂຶ້ນຢູ່ທີ່ຫ້ອງປະຊຸມໃຫຍ່ຂອງກະຊວງຍຸຕິທຳ ພາຍໃຕ້ການເປັນປະທານຂອງ ທ່ານ ຄຳໃສ ສຸລິນທອນ ປະທານສະພາທະນາຍຄວາມລາວ; ໂດຍການເປັນກຽດເຂົ້າຮ່ວມຂອງ ທ່ານ ເກດສະໜາ ພົມມະຈັນ ຄະນະປະຈຳພັກ, ປະທານກວດກາຄະນະບໍລິຫານງານພັກ ກະຊວງຍຸຕິທຳ. ມີບັນດາຄະນະບໍລິຫານງານສະພາທະນາຍຄວາມ, ບັນດາຫົວໜ້າ, ຮອງຫົວໜ້າຫ້ອງການສະພາທະນາຍຄວາມປະຈຳແຂວງ; ໜ່ວຍສະພາທະນາຍຄວາມປະຈຳເມືອງໃນນະຄອນຫຼວງວຽງຈັນ ພ້ອມດ້ວຍແຂກຖືກເຊີນເຂົ້າຮ່ວມ ຈຳນວນ 87 ທ່ານ, ຍິງ 21 ທ່ານ.
          ກອງປະຊຸມໃນຄັ້ງນີ້ ໄດ້ປຶກສາຫາລືບັນຫາສຳຄັນຕ່າງໆ ເປັນຕົ້ນ ແຜນພັດທະນາສະພາທະນາຍຄວາມ ແຕ່ປີ 2021-2025; ການປັບປຸງກົດໝາຍວ່າດ້ວຍ ສະພາທະນາຍຄວາມ, ປັບປຸງກົດລະບຽບພາຍໃນ ແລະ ປຶກສາຫາລືກັນກ່ຽວກັບໃບມອບສິດໃນການເປັນຜູ້ຕາງໜ້າ. ຫຼັງຈາກນັ້ນ ຜູ້ເຂົ້າຮ່ວມກອງປະຊຸມ ຍັງໄດ້ຮັບຟັງການເຜີຍແຜ່ ດຳລັດວ່າດ້ວຍ ການຊ່ວຍເຫຼືອທາງດ້ານກົດໝາຍ.
          ພິເສດ ກອງປະຊຸມ ຍັງໄດ້ຮັບຟັງການໂອ້ລົມຂອງ ທ່ານ ເກດສະໜາ ພົມມະຈັນ ຄະນະປະຈຳພັກ, ປະທານກວດກາຄະນະບໍລິຫານງານພັກກະຊວງຍຸຕິທຳ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ການປະຕິບັດໜ້າທີ່ວຽກງານຂອງສະພາທະນາຍຄວາມທີ່ໄດ້ຮັບຜົນສຳເລັດເປັນຢ່າງດີ. ພ້ອມນັ້ນ, ທ່ານຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ ແລະ ຂໍ້ຄົງຄ້າງ. ຊຶ່ງທ່ານໄດ້ຮຽກຮ້ອງໃຫ້ສະພາທະນາຍຄວາມລາວ ສືບຕໍ່ປັບປຸງແບບແຜນວິທີເຮັດວຽກ, ກົນໄກການຕິດຕໍ່ພົວພັນພາຍໃນອົງກອນ ໃຫ້ແທດເໝາະກັບສະພາບຄວາມເປັນຈິງ; ຍົກລະດັບຄວາມຮູ້ຄວາມສາມາດໃຫ້ແກ່ສະມາຊິກທະນາຍຄວາມໃຫ້ມີຄວາມຊຳນິຊຳນານໃນການຈັດຕັ້ງປະຕິບັດໜ້າທີ່ຂອງຕົນ ສ້າງຄວາມເຊື່ອໝັ້ນໃຫ້ແກ່ປະຊາຊົນທີ່ມາຮັບໃຊ້ບໍລິການ.
ຫຼັງຈາກນັ້ນ, ຍັງໄດ້ມີການມອບໃບກຽດຕິຄຸນ ໃຫ້ແກ່ບັນດາບໍລິສັດ ແລະ ບຸກຄຸນ ທີ່ໄດ້ປະກອບສ່ວນເຂົ້າໃນວຽກງານທະນາຍຄວາມໃນໄລຍະຜ່ານມາ ໃຫ້ກຽດມອບໂດຍ ທ່ານ ຄຳໃສ ສຸລິນທອນ ປະທານສະພາທະນາຍຄວາມລາວ ນຳອີກ.
ຂຽນຂ່າວ-ຖ່າຍພາບ: ຊາຍພິມພອນ ສີຣິວົງໄຊ
ປະເພດຂ່າວ: