ລັດຖະມົນຕີກະຊວງຍຸຕິທໍາ ຕ້ອນຮັບການເຂົ້າຢ້ຽມຢາມຂອງ ເອກອັກຄະລັດຖະທູດປະເທດເຢຍລະມັນ ປະຈຳ ສປປ ລາວ

Primary tabs

          ໃນຕອນບ່າຍວັນທີ 28 ເມສາ 2022 ທີ່ຫ້ອງຮັບແຂກ ກະຊວງຍຸຕິທໍາ ທ່ານ ໄພວີ ສີບົວລິພາ ລັດຖະມົນຕີກະຊວງຍຸຕິທໍາ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຢາມ ຂອງ ທ່ານ ນາງ ອານແນດຕ໌ ນົບໂບລສ໌ (Annette KNOBLCH) ເອກອັກຄະລັດຖະທູດ ເຢຍລະມັນ ປະຈຳ ສປປ ລາວ ພ້ອມດ້ວຍຄະນະ.
อาจเป็นรูปภาพของ 7 คน, ผู้คนกำลังยืน และ สถานที่ในร่ม
          ໃນໂອກາດນີ້ ທ່ານ ໄພວີ ສີບົວລິພາ ລັດຖະມົນຕີກະຊວງຍຸຕິທໍາ ກໍໄດ້ສະແດງຄວາມຍ້ອງຍໍຊົມເຊີຍ ແລະ ຂອບໃຈ ຕໍ່ການເຂົ້າຢ້ຽມຢາມ ພ້ອມທັງລາຍງານການພົວພັນຮ່ວມມືກັນ ລະຫວ່າງ ກະຊວງຍຸຕິທຳ ແລະ ລັດຖະບານປະເທດເຢຍລະມັນ ນັບແຕ່ປີ 2017 ລັດຖະບານປະເທດເຢຍລະມັນ ໄດ້ໃຫ້ການຊ່ວຍເຫຼືອກະຊວງຍຸຕິທຳ ຜ່ານແຜນງານ CEGGA (ເຊກາ) ຊຶ່ງໄດ້ໃຫ້ການຊ່ວຍເຫຼືອທາງດ້ານເຕັກນິກ-ວິຊາການ ແລະ ດ້ານງົບປະມານເຂົ້າໃນວຽກງານການສ້າງລັດທີ່ປົກຄອງດ້ວຍກົດໝາຍ ຢູ່ ສປປ ລາວ ເປັນຕົ້ນ ການສ້າງ ແລະ ປັບປຸງກົດໝາຍ, ສ້າງສະຕິເຄົາລົບກົດໝາຍ ແລະ ສ້າງຄວາມເຂັ້ມແຂງໃຫ້ພະນັກງານໂຄສະນາເຜີຍແຜ່ກົດໝາຍ; ສ້າງຂີດຄວາມສາມາດໃຫ້ແກ່ຄູ-ອາຈານ ສະຖາບັນຍຸຕິທຳແຫ່ງຊາດ; ສ້າງຄວາມເຂັ້ມແຂງໃຫ້ແກ່ວຽກງານຍຸຕິທຳຮາກຖານ ແລະ ສ້າງລະບົບຖານຂໍ້ມູນສະຖີຕິເບື້ອງຕົ້ນໃຫ້ກະຊວງຍຸຕິທຳ ຢູ່ໃນຂັ້ນກະກຽມຈັດຕັ້ງປະຕິບັດ, ຄົ້ນຄວ້າເກັບກຳຂໍ້ມູນກ່ຽວກັບຄວາມຕ້ອງການຊ່ວຍເຫຼືອທາງດ້ານກົດໝາຍຂອງປະຊາຊົນ. ຈາກນັ້ນ, ທ່ານ ນາງ ອານແນດຕ໌ ນົບໂບລສ໌ ກໍໄດ້ສະແດງຄວາມຂອບໃຈຢ່າງສູງຕໍ່ການຕ້ອນຮັບອັນແສນອົບອຸ່ນ ແລະ ອວຍພອນໄຊອັນປະເສີດມາຍັງ ທ່ານລັດຖະມົມຕີກະຊວງຍຸຕິທໍາ ພ້ອມທັງສັນຍາວ່າຈະສືບຕໍ່ຊ່ວຍເຫຼືອ ແລະ ໃຫ້ການຮ່ວມມືຕໍ່ຂະແໜງຍຸຕິທໍາ ໃຫ້ຫຼາຍຂຶ້ນກວ່າເກົ່າ.
          ໃນຕອນທ້າຍ ທ່ານ ໄພວີ ສີບົວລິພາ ລັດຖະມົນຕີກະຊວງຍຸຕິທຳ ກໍໄດ້ສະແດງຄວາມຂອບໃຈ ແລະ ໄດ້ອວຍພອນໃຫ້ທ່ານ ນາງ ອານແນດຕ໌ ນົບໂບລສ໌ ຈົ່ງມີສຸຂະພາບເຂັ້ມແຂງ ປະສົບຜົນສໍາເລັດ ໃນການປະຕິບັດໜ້າທີ່ ຢູ່ ສປປ ລາວ.
ຂ່າວ-ພາບ: ນາງ ບຸນຖອມ ພະສະແຫວງ