Submitted by wickyboubphalyvanh on
ເພື່ອສ້າງຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງໃຫ້ແກ່ຄະນະພັກ, ຄະນະນຳ, ພະນັກງານ-ລັດຖະກອນ, ອົງການປົກຄອງບ້ານ ຕະຫຼອດຮອດພໍ່ແມ່ປະຊາຊົນພາຍໃນ ເມືອງໄຊເສດຖາ ໃຫ້ມີຄວາມຮັບຮູ້ເຂົ້າໃຈ ແລະ ເອົາໃຈໃສ່ຈັດຕັ້ງປະຕິບັດວຽກງານທະບຽນສານເວົ້າລວມ, ເວົ້າສະເພາະແມ່ນວຽກງານທະບຽນສານ ໃນຕໍ່ໜ້າໃຫ້ມີຄວາມເຂັ້ມງວດ, ໃນຕອນເຊົ້າຂອງວັນທີ 19 ທັນວາ 2017 ທີ່ຜ່ານມາ ຫ້ອງການຍຸຕິທຳເມືອງໄຊເສດຖາສົມທົບກັບຄະນະພັກ, ຄະນະນຳເມືອງໄຊເສດຖາ ໄດ້ຈັດຕັ້ງເຜີຍແຜ່ກົດໝາຍວ່າ ດ້ວຍທະບຽນສານ ແລະ ຄຳສັ່ງເລກທີ 10/ນຍ, ລົງວັນທີ 01 ເມສາ 2016 ວ່າດ້ວຍການເພີ່ມທະວີຄວາມເອົາໃຈໃສ່ຕໍ່ກັບວຽກງານທະບຽນສານ ຊຶ່ງໄດ້ຈັດຂຶ້ນຢູ່ທີ່ສະໂມສອນຂອງຫ້ອງວ່າການປົກຄອງ ເມືອງໄຊເສດຖາ ໂດຍມີ ທ່ານ ນຽມ ສຸພັນຄ້ຳມະວົງ ຮອງຫົວໜ້າກົມທະບຽນສານ ກະຊວງຍຸຕິທຳ, ເຂົ້າຮ່ວມ ມີທ່ານ ບຸນປິ່ງ ປັນຍາຈິດ ຮອງເຈົ້າເມືອງໄຊເສດຖາ, ບັນດາຫ້ອງການ, ຫົວໜ່ວຍທຸລະກິດ, ບັນດານາຍບ້ານ ແລະ ປະຊາຊົນ ພາຍໃນເມືອງເຂົ້າຮ່ວມ.
ໂອກາດດັ່ງກ່າວນີ້ ທ່ານ ນຽມ ສຳພັນຄ້ຳມະວົງ ຮອງຫົວໜ້າກົມທະບຽນສານ ກະຊວງຍຸຕິທຳ ໄດ້ເຜີຍແຜ່ເນື້ອໃນຈິດໃຈຂອງກົດໝາຍວ່າດ້ວຍ ທະບຽນສານ ແລະ ຄຳສັ່ງ ເລກທີ 10/ນຍ, ລົງວັນທີ 01 ເມສາ 2016 ກ່ຽວກັບການເພີ່ມທະວີຄວາມເອົາໃຈໃສ່ຕໍ່ວຽກທະບຽນສານ ຊຶ່ງທ່ານໄດ້ຍົກໃຫ້ເຫັນພາລະບົດບາດ, ສິດ ແລະ ໜ້າທີ່ຂອງອົງການທະບຽນສານ, ຄວາມໝາຍ, ຄວາມສຳຄັນ, ຈຸດປະສົງ ແລະ ຄຸນຄ່າຂອງ ວຽກງານທະບຽນສານ ໂດຍສະເພາະແມ່ນການຢັ້ງຢືນຄວາມຖືກຕ້ອງຂອງເອກສານຂອງອົງການທະບຽນສານ ໂດຍສະເພາະແມ່ນຕໍ່ກັບສັນຍາ ແລະ ເອກະສານປະເພດຕ່າງໆ ກ່ອນທີ່ບຸກຄົນ ແລະ ນິຕິບຸກຄົນຈະນຳໄປປະຕິບັດ ຫຼື ເປັນເອກະສານອ້າງອີງ, ຄວນໃຫ້ມີການຢັ້ງຢືນຖືກຕ້ອງກັບຄວາມເປັນຈິງ ແລະ ໃຫ້ສອດຄ່ອງກັບກົດໝາຍ ເຮັດແນວນີ້ກໍເພື່ອເປັນການຫຼີກລ້ຽງຂໍ້ຂັດແຍ່ງທີ່ຈະເກີດຂຶ້ນໃນຕໍ່ໜ້າ.
ຂ່າວ: ປາວີຄຳ ເພັດທະລາກຸນ
ພາບ: ສຸກສາຄອນ ຈັນທະວຸດ