ສະຖາບັນຍຸຕິທໍາແຫ່ງຊາດ ໄດ້ຈັດເປີດຊຸດຝຶກອົບຮົມທັກສະ ແລະ ວິທີການສອນຫຼັກສູດກໍ່ສ້າງວິຊາຊີບທະບຽນສານ

Primary tabs

          ໃນຕອນເຊົ້າຂອງວັນທີ 30 ສິງຫາ 2021 ຢູ່ທີ່ໂຮງແຮມເມືອງ ແທ໋ງ ນະຄອນຫຼວງວຽງຈັນ ໄດ້ເປີດຊຸດຝຶກອົບຮົມທັກສະ ແລະ ວິທີການສອນຫຼັກສູດກໍ່ສ້າງວິຊາຊີບທະບຽນສານທາງອອນລາຍຂຶ້ນ ໂດຍການເປັນປະທານຂອງທ່ານ ເກດສະໜາ ພົມມະຈັນ ຮອງລັດຖະມົນຕີກະຊວງຍຸຕິທໍາ ມີທ່ານ ບຸນຕາ ສ.ຜາບມີໄຊ ຫົວໜ້າສະຖາບັນຍຸຕິທໍາແຫ່ງຊາດ ທ່ານ ຫງວ໋ຽນຊວນທູ ຜູ້ອໍານວຍການສະຖາບັນຍຸຕິທໍາຫວຽດນາມ ມີຄະນະບໍລິຫານ, ຄະນະຊ່ວຍວຽກໂຄງການ, ນາຍແປພາສາ ແລະ ອາຈານ ທັງສອງຝ່າຍ ພ້ອມດ້ວຍນັກຝຶກອົບຮົມຂອງລາວເຂົ້າຮ່ວມ.
          ຈຸດປະສົງຂອງຂອງການຝຶກອົບຮົມໃນຄັ້ງນີ້ ກໍເພື່ອເປັນການເສີມສ້າງທັກສະຄວາມຮູ້ ຄວາມສາມາດ ໃຫ້ແກ່ບຸກຄະລາກອນທີ່ຮັບຜິດຊອບວຽກງານສະເພາະດ້ານ ກ່ຽວກັບຫຼັກສູດກໍ່ສ້າງວິຊາຊີບທະບຽນສານຕາມຫຼັກສູດທີ່ໄດ້ຮັບການຮັບຮອງ, ການນໍາສະເໜີເນື້ອໃນວິທີການສອນ, ຄວາມຮູ້ພື້ນຖານ ແລະ ທັກສະລົງເລິກວຽກງານທະບຽນສານ ແລກປ່ຽນປະສົບການໃນການສອນຫຼັກສູດກໍ່ສ້າງວິຊາຊີບທະບຽນສານໃຫ້ເປັນເອກະພາບ. ສໍາລັບການຝຶກອົບຮົມແມ່ນຮູບແບບອອນລາຍ ມີ 5 ຈຸດຄື: ນະຄອນຫຼວງວຽງຈັນ-ນະຄອນຫຼວງຮ່າໂນ້ຍ, ແຂວງ  ຫຼວງພະບາງ, ແຂວງ ສະຫວັນນະເຂດ ແລະ ແຂວງ ຈໍາປາສັກ. ສໍາລັບວິຊາທີ່ນໍາມາຝຶກອົບຮົມໃນຄັ້ງນີ້ ແມ່ນໄດ້ຮວບຮວມເອົາຄວາມຮູ້ພື້ນຖານກ່ຽວກັບວິຊາຊີບທະບຽນສານ, ທັກສະພື້ນຖານ ແລະ ສະພາບແວດລ້ອມວິຊາຊີບການ ເຄື່ອນໄຫວວິຊາຊີບທະບຽນສານ, ທັກສະລົງເລິກຂະແໜງວິຊາຊີບທະບຽນສານ, ຫຼັກສູດກໍ່ສ້າງວິຊາຊີບທະບຽນສານ ແລະ ທົດລອງຫຼັກສູດກໍ່ສ້າງວິຊາຊີບຢູ່ສະຖາບັນຍຸຕິທໍາແຫ່ງຊາດ.
          ໃນຕອນທ້າຍຂອງພິທີ ທ່ານ ເກດສະໜາ ພົມມະຈັນ ປະທານກອງປະຊຸມ ກໍໄດ້ໃຫ້ກຽດໂອ້ລົມ ໂດຍທ່ານໄດ້ເນັ້ນໜັກໃຫ້ຜູ້ເຂົ້າຮ່ວມຝຶກອົບຮົມວິຊາຊີບທະບຽນສານໃນຄັ້ງນີ້ ຈົ່ງພ້ອມກັນຕັ້ງໃຈສຶກສາຄົ້ນຄ້ວາຮໍ່າຮຽນ, ແລກປ່ຽນຄໍາຄິດຄໍາເຫັນ ແລະ ຍາດແຍ່ງເອົາຄວາມຮູ້ຄວາມສາມາດນໍາຄູ-ອາຈານ ເພື່ອຈະໄດ້ເອົານໍາໄປໝູນໃຊ້ຜັນຂະຫຍາຍເຂົ້າໃນວຽກງານຕົວຈິງໃຫ້ເກີດຜົນປະໂຫຍດຫຼາຍສູງສຸດ.
ຂ່າວ: ໄຊຍະສິດ ພາບ: ສົມຫວັງ
ປະເພດຂ່າວ: