ຫົວໜ້າພະແນກຍຸຕິທຳແຂວງ ຊຽງຂວາງລົງຊຸກຍູ້ວຽກງານວິຊາສະເພາະຢູ່ຫ້ອງການຍຸຕິທຳເມືອງ ຜາໄຊ

ໃນວັນທີ 12 ພະຈິກ 2020 ຜ່ານມານີ້ ທ່ານ ມົນຕີ ສີອຸດົມ ຫົວໜ້າພະແນກຍຸຕິທຳແຂວງ ຊຽງຂວາງ ພ້ອມດ້ວຍຄະນະ ໄດ້ລົງຊຸກຍູ້ວຽກງານວິຊາສະເພາະຢູ່ຫ້ອງການຍຸຕິທຳເມືອງ ຜາໄຊ ເປັນກຽດເຂົ້າຮ່ວມໂດຍທ່ານ ສິງໄພ ພິມມະວົງ ຮອງເຈົ້າເມືອງ ຜາໄຊ ມີທ່ານ ບົວສອນ ທຳມະວົງ ຫົວໜ້າຫ້ອງການຍຸຕິທຳເມືອງ, ມີບັນດາຫົວໜ້າ, ຮອງຫົວໜ້າໜ່ວຍງານ ແລະ ພະນັກງານວິຊາການເຂົ້າຮ່ວມຈຳນວນ 14 ທ່ານ, ຍິງ 2 ທ່ານ.

ທ່ານ ບົວສອນ ທຳມະວົງ ຫົວໜ້າຫ້ອງການຍຸຕິທຳເມືອງ ໄດ້ຜ່ານບົດສະຫຼຸບການເຄື່ອນໄຫວຈັດຕັ້ງປະຕິບັດໜ້າທີ່ວຽກງານໃນ 9 ເດືອນ ປີ 2020 ທີ່ຫ້ອງການຍຸທຳເມືອງ ສາມາດຍາດມາໄດ້ ດັ່ງນີ້: ວຽກງານຈັດຕັ້ງປະຕິບັດຄຳຕັດສີນຂອງາສານ ມີຄະດີຄ້າງມາ 14 ເລື່ອງ, ແພ່ງ 11 ເລື່ອງ, ຮັບຄະດີເຂົ້າໃໝ່ 2 ເລື່ອງ, ແພ່ງ 1 ເລື່ອງ, ລວມ 16 ເລື່ອງ, ແພ່ງ 12 ເລື່ອງ, ພວມຈັດຕັ້ງປະຕິບັດ 16 ເລື່ອງ, ແພ່ງ 12 ເລື່ອງ; ຄົ້ນຄວ້າ, ກວດກາ ຄວາມຖືກຕ້ອງຂອງສັນຍາປະເພດຕ່າງໆກ່ອນເຊັນຢັ້ງຢືນໄດ້ ທັງໝົດ 18 ສະບັບ; ໃຫ້ຄຳປຶກສາທາງດ້ານກົດໝາຍໄດ້ 14 ຄັ້ງ; ປະເມີນບ້ານ ແລະ ຄອບຄົວແບບຢ່າງປະຕິບັດກົດໝາຍໄດ້ 3 ບ້ານ ມີ 177 ຄອບຄົວ; ໂຄສະນາເຜີຍແຜ່ກົດໝາຍໄດ້ 3 ຄັ້ງ ມີ 3 ບ້ານ ມີຜູ້ເຂົ້າຮ່ວມຮັບຟັງທັງໝົດ 115 ຄົນ, ຍິງ 64 ຄົນ.

ໃນຕອນທ້າຍ ທ່ານ ມົນຕີ ສີອຸດົມ ແລະ ທ່ານ ສິງໄພ ພິມມະວົງ ກໍໄດ້ມີຄຳເຫັນຕໍ່ກອງປະຊຸມ ໃນເບື້ອງຕົ້ນທ່ານໄດ້ຍ້ອງຍໍຊົມເຊີຍຕໍ່ຜົນງານການຈັດຕັ້ງປະຕິບັດວຽກງານທີ່ຫ້ອງການຍຸຕິທຳເມືອງ ຜາໄຊ ຍາດມາໄດ້ໃນໄລຍະຜ່ານມາ ແລະ ເນັ້ນບາງບັນຫາທີ່ຕ້ອງສືບຕໍ່ຈັດຕັ້ງປະຕິບັດໃຫ້ໄດ້ຕາມຄາດໝາຍທີ່ວາງໄວ້ ພ້ອມນັ້ນກໍຕ້ອງໄດ້ຍົກສູງຄຸນນະພາບຂອງພະນັກງານໃຫ້ມີຄວາມອຸ່ນອ່ຽນ ທຸ່ນທ່ຽງ ໃນການປະຕິບັດວຽກງານວິຊາສະເພາະໃຫ້ສອດຄ່ອງກັບກົດໝາຍ, ເອົາໃຈໃສ່ສຶກສາອົບຮົມການເມືອງ-ແນວຄິດ ພະນັກງານໃຫ້ມີຄວາມສາມັກຄີຢ່າງແໜ້ນແຟ້ນ ແລະ ເພີ່ມຂອດການປະສານງານກັບພາກສ່ວນອື່ນທີ່ກ່ຽວຂ້ອງ ພ້ອມນັ້ນພະແນກຍຸຕິທຳແຂວງໄດ້ມອບ ເຄື່ອງສາຍແອວຊີດີ 1 ຊຸດ ແລະ ລຳໂພງ 1 ໜ່ວຍ ໃຫ້ຫ້ອງການຍຸຕິທຳເມືອງ ເພື່ອປະກອບເຂົ້າໃນການປະຕິບັດໜ້າທີ່ວຽກງານໃຫ້ມີຄວາມສະດວກ, ສະບາຍ, ເຄື່ອງດັ່ງກ່າວແມ່ນໄດ້ຮັບການຊ່ວຍເຫຼືອຈາກແຜນງານການມີສ່ວນຮ່ວມຂອງປະຊາຊົນຕໍ່ວຽກງານປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (CEGGA) ໂດຍຜ່ານກົມໂຄສະນາເຜີຍແຜ່ກົດໝາຍ ກະຊວງຍຸຕິທຳ.

ຂ່າວ-ພາບ: ພະແນກຍຸຕິທຳແຂວງ ຊຽງຂວາງ

ປະເພດຂ່າວ: