ທ່ານ ຮັກສາການ ຫົວໜ້າພະແນກຍຸຕິທໍາແຂວງ ບໍລິຄຳໄຊ ລົງເຄື່ອນໄຫວຊຸກຍູ້ວຽກງານຍຸຕິທໍາຮາກຖານ

          ໃນລະຫວ່າງວັນທີ 23-24 ມີຖຸນາ 2021 ຜ່ານມາ ທ່ານ ບົວພັນ ຈັນທະວິລຸນ ຮັກສາການຫົວໜ້າພະແນກຍຸຕິທໍາແຂວງ ບໍລິຄໍາໄຊ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມ ແລະ ຊຸກຍູ້ວຽກງານຍຸຕິທໍາຮາກຖານຢູ່ ເມືອງ ວຽງທອງ ແລະ ເມືອງ ໄຊຈໍາພອນ ແຂວງ ບໍລິຄຳໄຊ ໃຫ້ກຽດຕ້ອນຮັບໂດຍ ຫົວໜ້າຫ້ອງການຍຸຕິທໍາເມືອງ ພ້ອມດ້ວຍຄະນະ ທັງສອງເມືອງ.
          ໃນໂອກາດລົງເຄື່ອນໄຫວວຽກງານໃນຄັ້ງນີ້ ທ່ານ ຮັກສາການຫົວໜ້າພະແນກກໍໄດ້ຮັບຟັງການລາຍງານກ່ຽວກັບສະພາບການເຄື່ອນໄຫວປະຕິບັດໜ້າທີ່ວຽກງານໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ ຂອງເມືອງ ວຽງທອງ ແລະ ເມືອງ ໄຊຈໍາພອນ ເປັນຕົ້ນ ວຽກງານຍຸຕິທໍາຮາກຖານ ຄຽງຄູ່ກັບວຽກງານວິຊາສະເພາະ, ພ້ອມທັງຍົກໃຫ້ເຫັນດ້ານດີ, ດ້ານອ່ອນ ແລະ ຂໍ້ຄົງຄ້າງຈໍານວນໜຶ່ງທີ່ຈະຕ້ອງໄດ້ແກ້ໄຂ.
          ເນື່ອງໃນໂອກາດດັ່ງກ່າວ ທ່ານ ຮັກສາການຫົວໜ້າພະແນກຍຸຕິທໍາແຂວງ ບໍລິຄໍາໄຊ ກໍໄດ້ມີຄໍາເຫັນໂອ້ລົມໃຫ້ທິດຊີ້ນໍາ ຕໍ່ການຊີ້ນໍາ-ນໍາພາ ຂອງຄະນະຫ້ອງການຍຸຕິທໍາເມືອງ ຊຶ່ງທ່ານໄດ້ເນັ້ນໜັກໃຫ້ຫົວໜ້າຫ້ອງການຍຸຕິທໍາເມືອງ ທັງສອງເມືອງ ຈົ່ງພ້ອມກັນເອົາໃຈໃສ່ສືບຕໍ່ຜັນຂະຫຍາຍດ້ານດີ, ປັບປຸງດ້ານອ່ອນ ແລະ ເອົາໃຈໃສ່ແກ້ໄຂຂໍ້ຄົງຄ້າງ ໃນການຈັດຕັ້ງປະຕິບັດວຽກງານວິຊາສະເພາະຂອງຕົນໃຫ້ບັນລຸຕາມແຜນການທີ່ວາງໄວ້, ປະສານສົມທົບກັບພາກສ່ວນທີ່ກ່ຽວຂ້ອງພາຍໃນເມືອງ ເຊັ່ນ ບັນດາຂະແໜງການທີ່ມີກົດໝາຍ, ປະສານກັບອໍານາດການປົກຄອງບ້ານ, ໂຮງຮຽນ ແລະ ກົມກອງຕ່າງໆ ເພື່ອປັບປຸງທາງດ້ານແບບແຜນວິທີເຮັດວຽກໃຫ້ມີຄວາມໜັກແໜ້ນ, ຖືກຕ້ອງ ແລະ ສອດຄ່ອງ, ສືບຕໍ່ປັບປຸງດ້ານບຸກຄະລາກອນ ຈັດວາງບຸກຄະລາກອນທີ່ມີຄວາມສາມາດເຂົ້າໃນແຕ່ລະໜ່ວຍງານຢ່າງເໜາະສົມ ແລະ ເອົາໃຈໃສ່ປະສານງານກັບພາກສ່ວນທີ່ກ່ຽວຂ້ອງລະຫວ່າງເມືອງກັບແຂວງເພື່ອເຮັດໃຫ້ວຽກງານຍຸຕິທໍາຮາກຖານສຳເລັດຕາມແຜນການທີ່ວາງໄວ້.
ຂ່າວ: ບຸນເລີດ
ພາບ: ນາງ ສຸກສາຄອນ