ພະແນກຍຸຕິທຳແຂວງ ບໍ່ແກ້ວ ປະເມີນພະນັກງານ-ລັດຖະກອນ ແລະ ຄັດເລືອກຜົນງານປະຈໍາປີ 2020

ໃນວັນທີ 12 -13 ພະຈິກ 2020 ທີ່ຜ່ານມາ ພະແນກຍຸຕິທຳແຂວງ ບໍ່ແກ້ວ ໄດ້ຈັດກອງປະຊຸມປະເມີນຜົນການຈັດຕັ້ງປະຕິບັດໜ້າທີ່ວຽກງານຂອງພະນັກງານ-ລັດຖະກອນ ແລະ ຄັດເລືອກຜົນງານ ປະຈໍາປີ 2020 ຂຶ້ນໂດຍການເປັນປະທານຂອງ ທ່ານ ຄຳຫຼ້າ ອຸດທະຍອດ ກຳມະການພັກແຂວງ ຫົວໜ້າພະແນກຍຸຕິທຳແຂວງ ມີຄະນະພະແນກ, ຄະນະຮັບຜິດຊອບຂັ້ນແຂວງ, ຜູ້ຕ່າງໜ້າຈາກພະແນກພາຍໃນແຂວງ, ຫົວໜ້າ, ຮອງຫົວໜ້າຂະແໜງ ແລະ ວິຊາການພາຍໃນພະແນກຍຸຕິທຳເຂົ້າຮ່ວມທັງໝົດ 26 ທ່ານ, ຍິງ 13 ທ່ານ.

ທ່ານ ຄຳຫຼ້າ ອຸດທະຍອດ ກຳມະການພັກແຂວງ ຫົວໜ້າພະແນກຍຸຕິທຳແຂວງ ໄດ້ກ່າວວ່າ: ການປະເມີນຜົນການຈັດຕັ້ງປະຕິບັດໜ້າທີ່ວຽກງານວິຊາສະເພາະຂອງພະນັກງານ-ລັດຖະກອນ ແລະ ການຄັດເລືອກຜົນງານຂອງບຸກຄົນ ຄັ້ງນີ້ ເພື່ອຊອກໃຫ້ເຫັນບຸກຄົນດີເດັ່ນ ໃນການປະຕິບັດໜ້າທີ່ວຽກງານໃນຄວາມຮັບຜິດຊອບ, ມີການຕໍານິ, ຕິຊົມ ເພື່ອປັບປຸງດ້ານອ່ອນເຮັດໃຫ້ພະນັກງານ-ລັດຖະກອນໄດ້ຮັບການປັບປຸງແກ້ໄຂໃຫ້ດີຂຶ້ນໃນຕໍ່ໜ້າ.

ທ່ານ ວິພົງ ບົວອາໄພ ຮອງຫົວໜ້າພະແນກຍຸຕິທຳແຂວງ ໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານຂອງພະແນກຍຸຕິທຳແຂວງ ບໍ່ແກ້ວ ປະຈໍາປີ 2020 ພ້ອມທັງວາງທິດທາງແຜນການປະຈໍາປີ 2021 ຕື່ມອີກ ຈາກນັ້ນ ພະນັກງານ-ລັດຖະກອນແຕ່ລະທ່ານ ກໍໄດ້ຜ່ານໃບປະເມີນຜົນງານຂອງຕົນເອງໃຫ້ໝູ່ຄະນະປະກອບຄໍາຄິດ, ຄຳເຫັນ, ຄຳຕໍານິ ຕິຊົມ ເພື່ອກໍ່ສ້າງຊ່ວຍເຫຼືອເຊິ່ງກັນ ແລະ ກັນຢ່າງກົງໄປກົງມາ ເພື່ອນໍາໄປປັບປຸງແກ້ໄຂໃນຕໍ່ໜ້າ ແລະ ເສີມຂະຫຍາຍດ້ານດີ.

ໃນນາມເປັນປະທານກອງປະຊຸມ ທ່ານ ຄຳຫຼ້າ ອຸດທະຍອດ ກຳມະການພັກແຂວງ ຫົວໜ້າພະແນກຍຸຕິທຳແຂວງ ກໍໄດ້ມີຄໍາເຫັນໂອ້ລົມ ຕໍ່ພະນັກງານ-ລັດຖະກອນ ໂດຍທ່ານໄດ້ເນັ້ນໜັກໃຫ້ຄະນະພັກ-ຄະນະນໍາ, ພະນັກງານພະແນກຍຸຕິທໍາແຂວງ ຈົ່ງເຊີດຊູຄວາມຮັບຜິດຊອບການເມືອງ, ຕ້ອງເປັນແບບຢ່າງນໍາໜ້າ, ມີຄວາມຈົ່ງຮັກພັກດີໃນການປະຕິບັດໜ້າທີ່ວຽກງານຍົກສູງຄຸນທາດການເມືອງ, ຄຸນສົມບັດ ສິນທໍາປະຕິວັດ, ດໍາລົງຊີວິດຢ່າງປອດໃສ ເຊື່ອໝັ້ນຕໍ່ການນໍາພາຂອງພັກ-ລັດ, ມີຄວາມສັດຊື່ບໍລິສຸດ, ມີນໍ້າໃຈປະຢັດ, ຕ້ານການຟູມເຟືອຍ, ມີຄວາມອົດທົນ ແລະ ເສີມຂະຫຍາຍຈຸດດີ, ແກ້ໄຂຈຸດອ່ອນ ແລະ ຂໍ້ຄົງຄ້າງ, ມີການຫັນປ່ຽນຢ່າງຈະແຈ້ງ, ປະກອບສ່ວນຢ່າງຕັ້ງໜ້າເຂົ້າໃນການປະຕິບັດແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມ ແລະ ພັດທະນາວຽກງານພະແນກຍຸຕິທຳໃຫ້ມີປະສິດທິຜົນຢ່າງບໍ່ຢຸດຢັ້ງ.

ຂຽນຂ່າວ-ຖ່າຍພາບໂດຍ: ພຸດທະຈັກ ວິໄລພອນ

ປະເພດຂ່າວ: