ກອງປະຊຸມປະກອບຄຳເຫັນໃສ່ຮ່າງຄຳແນະນຳຂອງເຈົ້າເມືອງ ກ່ຽວກັບການພັດທະນາວຽກງານຍຸຕິທຳຮາກຖານປະຈຳປີ 2021 ທີ່ ເມືອງ ວຽງຈັນ ແຂວງ ວຽງຈັນ.

          ໃນຕອນເຊົ້າຂອງວັນທີ 30 ມີນາ 2021 ຢູ່ທີ່ຫ້ອງວ່າການປົກຄອງເມືອງ ວຽງຄຳ ແຂວງ ວຽງຈັນ ໄດ້ຈັດກອງປະຊຸມປຶກສາຫາລືປະກອບຄຳເຫັນໃສ່ຮ່າງ ຄຳແນະນຳຂອງເຈົ້າເມືອງກ່ຽວກັບການພັດທະນາວຽກງານຍຸຕິທຳຮາກຖານ ປະຈຳປີ 2021 ຂຶ້ນພາຍໃຕ້ການເປັນປະທານ ຂອງ ທ່ານ ພອນແກ້ວ ຂຸນພົນ ຄະນະປະຈຳພັກແຂວງ ເລຂາພັກເມືອງ ເຈົ້າເມືອງ ວຽງຄຳ, ມີ ທ່ານ ປອ. ຈອມຄຳ ບຸບຜາລີວັນ ຫົວໜ້າກົມສົ່ງເສີມລະບົບຍຸຕິທຳ, ທ່ານ ບຸນຕາ ສ.ຜາບມີໄຊ ຫົວໜ້າສະຖາບັນຍຸຕິທຳແຫ່ງຊາດ, ທ່ານ ບຸນລ້ອມ ດວງມາລາ ຮອງຫົວໜ້າກົມໂຄສະນາເຜີຍແຜ່ກົດໝາຍ ແລະ ພາກສ່ວນທີ່ກ່ຽວຂ້ອງເຂົ້າຮ່ວມຈຳນວນ 27 ທ່ານ, ຍິງ 8 ທ່ານ.
          ໃນພິທີ ທ່ານ ວິກອນ ບຸນວິໄລ ຮອງຫົວໜ້າກົມໂຄສະນາເຜີຍແຜ່ກົດໝາຍ (ພະນັກງານລົງຮາກຖານ) ໄດ້ຜ່ານຮ່າງບົດສະເໜີການພັດທະນາວຽກງານຍຸຕິທຳຮາກຖານຂອງກະຊວງຍຸຕິທຳ ຈາກນັ້ນ, ທ່ານ ຫົວໜ້າຫ້ອງການຍຸຕິທຳເມືອງ ວຽງຄຳ ໄດ້ຜ່ານຮ່າງຄຳແນະນຳຂອງເຈົ້າເມືອງກ່ຽວກັບການພັດທະນາວຽກງານຍຸຕິທຳປະຈຳປີ 2021 ເພື່ອໃຫ້ຜູ້ເຂົ້າຮ່ວມປະກອບຄຳຄິດ, ຄຳເຫັນໃສ່ຮ່າງຄຳແນະນຳສະບັບດັ່ງກ່າວ. ຄຳແນະນຳສະບັບນີ້ປະກອບມີ 4 ໝວດ, 13 ມາດຕາ ຈຸດປະສົງກໍເພື່ອດຳເນີນຕາມ 5 ເນື້ອໃນຕົ້ນຕໍຂອງວຽກງານຍຸຕິທຳຮາກຖານ ເປັນຕົ້ນ ວຽກງານການສ້າງບ້ານແບບຢ່າງປະຕິບັດກົດໝາຍ, ວຽກງານໂຄສະນາເຜີຍແຜ່ນິຕິກຳ, ວຽກງານໄກ່ເກັ່ຍຂໍ້ຂັດແຍ່ງຂັ້ນບ້ານ, ວຽກງານຍຸຕິທຳເດັກ ແລະ ວຽກງານຍົກລະດັບຄວາມຮູ້ທາງດ້ານກົດໝາຍ. ຈາກນັ້ນ, ຜູ້ເຂົ້າຮ່ວມກໍໄດ້ປະກອບຄຳຄິດ, ຄຳເຫັນຢ່າງກົງໄປກົງມາ ເພື່ອເຮັດໃຫ້ຄຳແນະນຳສະບັບດັ່ງກ່າວມີເນື້ອໃນຄົບຖ້ວນ ແລະ ສາມາດນຳໄປຈັດຕັ້ງປະຕິບັດໃຫ້ທັນກັບເວລາ.
ຂ່າວ: ບຸນຖອມ; ພາບ: ສຸກສາຄອນ
ປະເພດຂ່າວ: