ພະແນກຍຸຕິທຳແຂວງ ສະຫວັນນະເຂດ ຈັດພິທີປາຖະກະຖາ ສອງວັນສຳຄັນຂອງຊາດ.

          ໃນຕອນເຊົ້າຂອງວັນທີ 1 ເມສາ 2021 ຢູ່ທີ່ຫ້ອງປະຊຸມພະແນກຍຸຕິທຳແຂວງ ສະຫວັນນະເຂດ ໄດ້ຈັດພິທີປາຖະກະຖາວັນສ້າງຕັ້ງພັກປະຊາຊົນ ປະຕິວັດລາວ ແລະ ວັນຄຽດແຄ້ນຂອງປະຊາຊົນລາວ ໃຫ້ພະນັກງານ-ລັດຖະກອນພາຍໃນພະແນກຍຸຕິທຳແຂວງ ໂດຍການເປັນປະທານຂື້ນປາຖະກະຖາຂອງ ທ່ານ ຄຳສິງເພັດ ໄຊຍະພອນ ຮອງຫົວໜ້າພະແນກຍຸຕິທຳແຂວງ, ມີບັນດາພະນັກງານ-ລັດຖະກອນຂອງພະແນກຍຸຕິທຳ ແລະ ນັກສຶກສາຝຶກງານຈາກສະຖາບັນຍຸຕິທຳແຫ່ງຊາດ ສາຂາແຂວງ ສະຫວັນນະເຂດເຂົ້າຮ່ວມນຳລວມທັງໝົດ 39 ທ່ານ, ຍິງ 18 ທ່ານ.
          ໃນພິທີດັງກ່າວນີ້ ທ່ານ ຄຳສິງ ເພັດໄຊຍະພອນ ໄດ້ເລົ່າຄືນເຖິງການກຳເນີດພັກປະຊາຊົນປະຕິວັດລາວຂອງເຮົາ , ຜົນສຳເລັດແຫ່ງການຊີ້ນຳ -ນໍາພາຂອງພັກປະຊາຊົນປະຕິວັດລາວ ແລະ ການເສິມຂະຫຍາຍມູນເຊື້ອຂອງພັກປະຊາຊົນປະຕິວັດລາວ. ໃນພິທີ ທ່ານຍັງໄດ້ເວົ້າເຖິງ ວັນທີ 21 ມີນາ 1946, ເປັນວັນທີ່ຝັງຄວາມຄຽດແຄ້ນຂອງປະຊາຊົນລາວທີ່ມີຕໍ່ສັດຕູ, ວັນນັກຮົບເສຍອົງຄະ ແລະ ເສຍສະລະ ເພື່ອຊາດ, ເພື່ອປະຊາຊົນ ຈາກນັ້ນທ່ານກໍ່ໄດ້ເລົ່າຄືນ ສະພາບ, ການກະກຽມການຕໍ່ສູ້ຕ້ານພວກລ່າເມືອງຂື້ນຝະລັ່ງຂອງໜ່ວຍພັກເມືອງ ທ່າແຂກ, ເຫດການໃນການຕໍ່ສູ້ຢ່າງພິລະອາດຫານຂອງທະຫານ ແລະ ປະຊາຊົນຢູ່ເມືອງ ທ່າແຂກ ແລະ ໄດ້ເລົ່າຄືນຄວາມໝາຍຄວາມສຳຄັນຂອງບັ້ນຮົບເມືອງ ທ່າແຂກ.
ຂຽນຂ່າວ : ລຳເງິນ ໄຊຍະວົງສາ
ພາບ: ໄພລີ ມະນີໂຄດ